تامان شاكر: پارته‌یل ئسلام سیاسى توان وه‌ره‌ودویا بچیمن!

شفق نيوز

ئاده‌میزاد بچه‌سپنێد، پارته‌یل ئسلام سیاسى، ك پشتگیرى له‌ ده‌یشته‌و ئه‌رایان تیه‌ید، وه‌رده‌وامى ده‌نه‌ هه‌ڵمه‌ته‌گه‌یان دژ وه‌ ژنه‌یل كوردستانى و بژارده‌ى ڕووشنهویر" تامان شاكر ڕاوێژكار یا مستشار وه‌زیر ڕووشنهویرى له‌ حكوومه‌ت هه‌رێم كوردستان له‌ په‌یوه‌ندییگ ته‌له‌فۆنى تایبه‌ت وه‌ ماڵپه‌ڕ شه‌فه‌ق، ئه‌وه‌ئاشكرا كرد، و زیاتریش وت:" دیاره‌ ك ئه‌وه‌گ هاووڵاتیه‌یل له‌ ناوه‌ند و پارێزگایه‌یل ناوڕاس و باشوور تویشى تیه‌ن له‌ كه‌مه‌وكردن ئازادیه‌یل مه‌ده‌نى كه‌مه‌ كه‌مه‌ وه‌ره‌و باكوور، وه‌ره‌و هه‌رێم كوردستان خشه‌كه‌ید له‌ سایه‌ى ئه‌و كه‌شوهه‌واى ئازادیه‌ ك وه‌ته‌نیا بویه‌سه‌ به‌ش پیاوه‌یل ئسلام سیاسى له‌ ژیر دروشم یا شعار (وه‌رگرى له‌ ئاداب گشتى).

تامان شاكر زیاتریش وت :"كێشه‌گه‌ ها ئه‌ورا ك بڕیگ له‌ پیاوه‌یل دینى توان وه‌ره‌ودویا بووه‌نه‌مان و قه‌ڵبه‌وبوونه‌بان دیموكراسى؛ وه‌ ڕیگه‌ى كاریگه‌رییان له‌بان مه‌ردم كوومه‌ڵگا و ده‌سخستن وه‌ناو كێشه‌یل ده‌وڵه‌ت و كوومه‌ڵگاى مه‌ده‌نى".

جه‌ختیش له‌بان ئه‌وه‌ كرد ك:"زوورمى مه‌ردم كوردستان موسڵمانن، وه‌لى ئیمه‌ نیه‌توایمن ئه‌و تاریخ پڕ له‌ كاره‌ساته‌یل سیاسیه‌ دوباره‌وه‌ بكه‌یمن، چوینكه‌ ئیمه‌ دیموكراسى هه‌ڵوژانیمن و نیه‌توایمن پیاوه‌یل دینى ده‌س بخه‌نه‌ ناو كاروبار ده‌وڵه‌ت".

له‌باوه‌ت ئه‌و ناڕه‌زایى ده‌ربڕین و خودنیشانداینه‌یله‌ ك داواى خاسسازى ئازادى، و یه‌كسانى له‌ ناوبه‌ین ژن و پیاو كه‌ن، تامان شاكر ئویشى:" ئیمه‌ وه‌رده‌وامى ده‌یمنه‌ ناڕه‌زایى ده‌ریڕین و خودنیشانداینه‌یل خوه‌مان تا ئه‌و وه‌خته‌گ كاروه‌ده‌سه‌یل هه‌رێم قانوونه‌یلیگ ته‌شریع كه‌ن ئه‌را مسۆگه‌ر كردن یه‌كسانى ژن و پیاو و داناین مه‌رج و شه‌رته‌یل قانوونى ك دژ وه‌ هه‌ر كه‌سیگ وسیه‌ن هه‌وڵ ده‌ید ده‌س بنه‌یده‌ بان ئازادیه‌یل مه‌ده‌نى، و له‌ هه‌مان وه‌خت ڕووشنهویره‌یل و چالاكوانه‌یل كوومه‌ڵگاى مه‌ده‌نى له‌ سه‌رۆك هه‌رێم كوردستان و سه‌رۆكایه‌تى حكوومه‌ت هه‌رێم و په‌رله‌مان داواكردن بازنه‌ى به‌شدارى ژن كورد ك خه‌بات گه‌ورایگ داشتن له‌خاتر ئازادى و دیموكراسى و وه‌رگریكردن له‌ مافه‌یل نه‌ته‌وه‌ى كورد و مقه‌یه‌تیكردن ژیانمان، ك وه‌ نویسانن و خوتبه‌یل بڕیگ له‌ پیاوه‌یل دینى هه‌ڕه‌شه‌ دریاسه‌لى".

له‌باوه‌ت دویدمان ئه‌و داواكاریه‌یله‌ ك چه‌ن لایه‌نیگ  تواستنه‌ ڕویوه‌ر یا مه‌ساحه‌ى ئازادى له‌ هه‌رێم كه‌مه‌و بكریه‌ید، تامان شاكر گوزراش له‌ ترس ودڵه‌ڕاوكى خوه‌ى كرد له‌وه‌گ له‌ ناوه‌ند(حكوومه‌ت عیراق) ڕوى ده‌ید له‌ پشتگووشخستن و په‌راوێزخستن یا تهمیش نه‌خشوده‌ور ژنه‌یل و وت :"ئیمه‌ نیه‌توایم له‌تارى حكوومه‌ت عیراقه‌و بكه‌یمن، چوینكه‌ ئیمه‌ فیدرالى دیریمن و ماوه‌ى دویر ودریژیگ بڕیمنه‌ له‌ ڕیگه‌ى دیموكراسى، و ئه‌و حكوومه‌ت عیراقیه‌ ك وه‌ى دویاخره‌ دامه‌رزیا ژن له‌تى نادیاره‌ و نه‌خشوده‌ورى پشتگووش خریاس، ئیمه‌یش نیه‌توایمن ئه‌یه‌ له‌ هه‌رێم ڕوى بیه‌ید".

له‌ باوه‌ت ئه‌وه‌گ پیاویگ دینى نویسانیه‌سه‌ى له‌ كتابه‌گه‌ى ك وه‌ناو (ڕاسى گومكریاى)ه‌ و بوخت كرده‌ تامان شاكر و چه‌ن ژنیگتر وه‌ په‌رشوبڵاوكردن گه‌ناته‌كارى وبه‌رپاكردن گیروگرفته‌یل كوومه‌ڵایه‌تى و سیاسى له‌ هه‌رێم كوردستان، تامان شاكر ئه‌وه‌ ئاشكراكرد ك :"پیاویگ دینى له‌ هه‌ولێر كتابیگ وه‌و ناوه‌ دانایه‌ و له‌تى ناو خوه‌م چه‌ن ژنیگ چالاك له‌ وه‌رگریكردن له‌ ماف ژنه‌یل و ئه‌و بوخته‌یله‌ كرده‌پیمانه‌وه‌، چوینكه‌ ئیمه‌ وه‌رگرى له‌ ماف ژنه‌یل كه‌یمن و داواى یه‌كسانى كه‌یمن وه‌ل پیاوه‌یلا، و دیاره‌ ك ئسلوبه‌گه‌ى گاڵداین بوى دژ وه‌ ئیمه‌ و ، ئیمه‌یش له‌ قه‌زا شكاتى كردیمن ك وه‌زاره‌ت ڕووه‌شنهویرى مووڵه‌ت چاپكردن 1500 دانه‌ له‌ كتابه‌گه‌ى داسه‌پى وه‌لى ئه‌و هاتیه‌ 15000 دانه‌ له‌لى چاپكردیه‌، وه‌چه‌واشه‌ى رینمایه‌یل قانوونى".

له‌هه‌مان وه‌خت تامان شاكر ستایش پیاوه‌یل دینى نیشتمانپه‌روه‌ر وڕووشنفكر كرد ك وه‌رگرى له‌ مافه‌یل مه‌ده‌نى كه‌ن و توان كوومه‌ڵگاى كوردستانى پیشبكه‌فێد.

له‌باوه‌ت ئازادیه‌یل مه‌ده‌نى له‌ هه‌رێم كوردستان، تامان شاكر ئه‌وه‌ ئاشكراكرد ك :"ئازادیه‌یل مه‌ده‌نى له‌ هه‌رێم هانه‌ خه‌یر و له‌ سلێمانى و دهۆك له‌ هه‌ولێر خاستره‌كن، وه‌لى ئیمه‌ نیگه‌رایمن له‌باوه‌ت ئازادى ڕاده‌ربڕین و حه‌یفمان تیه‌ید له‌ بڕیگ ئجرائات، جوور ئه‌وه‌گ تویش نویسه‌ر و ئه‌دیب فه‌رهاد پیرباڵ هات و شه‌ش مانگ حوكمى دریا له‌وه‌ر ته‌رجه‌مه‌كردن فه‌سڵیگ له‌ كتاب(نزهه‌ الألباب فی مالایوجد فی كتاب) ئه‌را زووان كوردى و ئى كتابیشه‌ یه‌كیگه‌ له‌ كتابه‌یل ناوبانگ و وه‌رده‌س له‌ جه‌هان ئسلامى؛ و ئومیدواریمن ئى جووره‌ حوكمه‌یلیگ له‌ ئاینده‌ نه‌وینیمن.