گشتمان هه‌ڵه‌يم

شفق نيوز

يه‌يش بيجگه‌ ئه‌وه‌ك وه‌ دڵ ئه‌نقه‌ز يا دوير له‌ ئه‌نقه‌ز غه‌ڵه‌ت يه‌قه‌مان ئه‌گريد، ك فريه‌جار خود ئاده‌ميزاد خوه‌ی ئه‌دێده‌ مايه‌ی ئه‌و هه‌ڵه‌، يا دوينيد هه‌ڵه‌ی كه‌سيگ تر ئه‌دێده‌ هووكار دروسبوين كاره‌سات.

ئمڕوو فريه‌يگ له‌ هه‌ڵه‌يلمان وه‌ ئاشكرا دياره‌و ره‌نگه‌و داگه‌ له‌بان كار و ژيانمان، ته‌نانه‌ت ره‌نگدانه‌وه‌ی فريه‌يگيش وه‌ئاشكرا له‌بان ژيان و كار و چالاكی رووژانه‌يش وه‌دی ئه‌كريه‌يد.

يه‌كيگ له‌و هه‌ڵه‌يلمانه‌ ك ئمڕوو وه‌ئاشكرا دياره‌، ئه‌ويش ئه‌وه‌سه‌ ك هه‌ر يه‌كيگ وه‌ ئاوازيگ ئه‌خوه‌نيد له‌باوه‌ت مه‌سه‌له‌ی دويا رويداگه‌يل روی وه‌ڕوی بوينه‌وه‌ی وه‌ڵاته‌گه‌مان وه‌رانوه‌ر ترۆريسته‌يل، ك تائيسه‌ فريه‌يگ له‌ ئيمه‌ نه‌تويه‌نستيمنه‌ يه‌كتری قه‌بول بكه‌يم.

ئمجا گشتمان هه‌ڵه‌يم ك پابه‌ندبوين نيشتمانيمان جوور خواست نيه‌و ئنتمای نه‌ته‌وه‌ييمان كزه‌و زوورممان خوه‌مان وه‌خاوه‌ن ئی وڵات ونيشتمانه‌ نازانيم و هه‌ر كه‌سيگ له‌ليمان ئه‌را به‌رژه‌وه‌ندی خوه‌ی كار ئه‌كاو گيان ته‌بايی و وه‌خشينمان كزه‌و هايمنه‌ هه‌وڵ چاڵ كه‌نين ئه‌را يه‌كتری و ره‌خنه‌ له‌ يه‌كتری قه‌بول ناكه‌يم و ئه‌گه‌ريش يه‌كهه‌ڵويست نه‌ويمن ئه‌وه‌ يه‌كتری وه‌ خيانه‌تكار ئه‌يه‌يمنه‌ قه‌ڵه‌م.

دی نوڕيد جوور ئه‌وه‌ك بويشيد ئيمه‌ رووڵه‌ی ئی وڵاته‌ نه‌ويم، سه‌ده‌ها كاره‌سات نه‌خوازرياگ يه‌قه‌مان گرتگه‌، وه‌لی هويچ په‌نديگ له‌و كاره‌ساته‌يله‌ وه‌رنه‌گرتيمنه‌، ك يه‌يش هه‌ڵه‌س، ئنجا وه‌ قسه‌و باس هويچ نه‌مه‌ندگه‌ دابينی نه‌كه‌يم، وه‌لی وه‌ كرده‌وه‌ هويچ نه‌كرديمه‌.

تا ئيسه‌يش پرسيار له‌ خوه‌مان نه‌كرديمنه‌ ئه‌راچه‌ دژايه‌تی يه‌كتری بكه‌يم، كی قانجاز ئه‌كا له‌ دژايه‌تی يه‌كتری، تا ئيسه‌ دگان وه‌و راسيه‌ نه‌نايمنه‌ ك خوه‌مان زه‌ره‌دمه‌ن يه‌كه‌ميم، پرسيار له‌ خوه‌مان نه‌كرديمنه‌ ئه‌راچه‌ هه‌ڵوژاردن ئه‌نجام ئه‌يه‌يم، ئايا له‌ مانای راسكانی ديموكراسی ره‌سيمنه‌سه‌و، ئه‌گه‌ر باوه‌ڕ وه‌ ئاكام هه‌ڵوژاردن نه‌يريم ئه‌ی ئه‌راچه‌ ئه‌نجامی ئه‌يه‌يم، ئه‌گه‌ر جوور برا پۆسته‌يل دابه‌ش بكه‌يم ئه‌راچه‌ هه‌ڵوژاردن ئه‌نجام بيه‌يم، ئه‌گه‌ر هه‌ڵه‌ نه‌ويم ئه‌گونجيه‌يد ئاكام هه‌ڵوژاردن بخه‌يمنه‌ كنار، تا ئيسه‌ ئيمه‌ ئه‌وه‌ك ئويشيمنه‌ی كار وه‌پی ناكه‌يم.

تا ئيسه‌ وه‌ كرده‌وه‌و گيان نه‌ته‌وه‌يی هوير له‌ يه‌كڕزی و ته‌بايی نه‌كرديمنه‌و ئه‌وه‌ك له‌ به‌رژه‌وه‌نديمان بدێ ئه‌خه‌يمنه‌ی پشتگووش و تائيسه‌يش نه‌ڕه‌سيمنه‌سه‌ ئه‌و باوه‌ڕه‌ ك ته‌بايی و يه‌كڕزی زامن سه‌ركه‌فتنمانه‌و تا ئيسه‌ يه‌ك هه‌ڵويست نييم له‌ بڕياره‌يل چاره‌نويسساز، ته‌نانه‌ت ئه‌ڕای چوينه‌يل سه‌رۆك بارزانييش ئه‌را سه‌روه‌خۆيی كوردستان شيه‌وكردن جياواز ئه‌رای ئه‌كريه‌يد، ئمجا ئايا كه‌سيگ تر ديريم بيجگه‌ سه‌رۆك بارزانی له‌ هه‌وڵ ته‌بايی و يه‌كڕزی و هه‌وڵه‌يل نه‌ته‌وه‌يی په‌رووشتر تر بدێ، يه‌يش هه‌ڵه‌يگ تره‌ ك خوه‌مان له‌و راسيه‌ دويره‌و ئه‌خه‌يم، ك هه‌ر وه‌و خاتريشه‌ ئويشيم با هه‌ڵه‌يلمان وه‌ هه‌ڵه‌ چاره‌سه‌ر نه‌كه‌يم.

شێركۆ حه‌بيب

ج . أ