بیلا تنیش بویده‌ ئه‌نشتاین

شفق نيوز

چوینكه‌ هویچ چشتیگ مه‌حاڵ نیه‌ ئه‌را ئاده‌میزاد ئه‌گه‌ر وه‌ ئه‌قڵ ره‌فتار بكاو په‌ند له‌ ئه‌زموون رووژگار وه‌ربگرێد. وه‌تایبه‌ت رووژگار ئمڕوومان هه‌وه‌جه‌ وه‌ ئه‌وه‌ دیرێ داناین یا ئبداع له‌تى بكریه‌ێد و خزمه‌ت وه‌ ئنسانیه‌ت له‌تى ئه‌نجام بدریه‌ێد، چوینكه‌ رووژگاریگ له‌ئه‌زموون پیشینه‌یل ده‌رسیگ بویه‌ ئه‌را نه‌وه‌یل تازه‌و ئیسه‌یش سه‌رده‌م پیشكه‌فتن و تازه‌گه‌ریه‌و چشته‌یل فره‌یگ ئه‌را ئاده‌میزاد ئاسانه‌و بویه‌ وه‌گووره‌ى سه‌رهه‌ڵداین ته‌كنۆلۆژیاو نزیكه‌وبوین جه‌هان دویر له‌گشت كه‌سیگ.
هه‌ر له‌ى باوه‌ته‌وه‌ رووژیگ له‌رووژان ئویشن گوایا ئه‌نشتاین فره‌ بیزار بویه‌ له‌وتنه‌وه‌ى ده‌رسه‌یل یا ده‌رسداین و هه‌ر له‌وه‌ر ئه‌وه‌یش چه‌نه‌ها نامه‌ وه‌پى ره‌سیگ له‌لایه‌ن زانكۆ یا جامعه‌و دامه‌زریاگه‌یل تایبه‌ته‌وه‌، ئنجا یه‌یش كه‌فته‌ڕى بچووگ ئه‌را زانكۆ ئه‌را ئه‌وه‌ك ده‌رس خوندكاره‌یل به‌یگ ، وه‌لى فره‌ ناڕه‌حه‌ت و بیتاقه‌ت بوى، شۆفیره‌گه‌ى وته‌پى: گه‌وره‌م زانم جه‌نابد له‌جواودانه‌وه‌ى پرسیاره‌یل جاڕس بویده‌و تاقه‌ت نه‌یرید جواو به‌ید، چه‌ویشید ئه‌گه‌ر من ئمڕوو له‌جیاى جه‌نابد ده‌رسیان بیه‌م وه‌تایبه‌ت من قژم جویر قژ تنه‌و تاڕاده‌یگ شكڵمان وه‌ك یه‌كه‌و هه‌میشه‌ گووش له‌ده‌رسه‌یلد گرتمه‌و فكره‌ى خاسیگ دیرم له‌ده‌رسداین و له‌خوه‌ده‌وه‌ یاى گرتمه‌!! ئه‌نشتاین فكره‌ى شۆفیره‌گه‌ى وه‌دڵى بوى و یه‌كسه‌ر جنگه‌یلیان ئه‌وه‌ز كردن، ئنجا وه‌ختى ره‌سینه‌ قاعه‌ى ده‌رسداین شۆفیره‌گه‌ چیه‌ شوون پیشكه‌شكردن ده‌رس و ئه‌نشتاین له‌ڕز پشته‌وه‌ وه‌جنگ شۆفیریه‌وه‌ دانیشت، ده‌رس و محازره‌گه‌یش وه‌بى كیشه‌و گرفت چیه‌ڕییه‌وه‌ تا ئه‌و وه‌خته‌ پرۆفیسۆریگ پرسیار قورسیگ كرد تا ئه‌نشتاین شه‌رمه‌زار بكا، له‌ورایش شۆفیره‌گه‌ خه‌نست و وته‌ پرۆفیسۆره‌گه‌: پرسیاره‌گه‌د فره‌ ساده‌س من ئیسه‌ ئویشمه‌ شۆفیره‌گه‌م ك له‌ڕز پشته‌وه‌ دانیشتگه‌ جواود به‌یگه‌وه‌، ئه‌نشتاین وه‌شیوه‌یگ جواوى داره‌وه‌ پرۆفیسۆره‌گه‌ شه‌رمه‌زار كرد.
بیگومان ئیمه‌ له‌ى داستانه‌ بایه‌سه‌ هووكاره‌ى ئه‌وه‌ بویمن ك هه‌ر كه‌سیگ هه‌وڵ چشتیگ بیه‌یگ هه‌ر بایه‌سه‌ بڕه‌سیگه‌پى، چوینكه‌ ئه‌نشتاین و كه‌سه‌یل تر دانه‌ركار یا موبدع ئه‌وانیش هه‌ر جویر ئیمه‌ ئاده‌میزادن، وه‌لى وه‌هه‌وڵ وتواناى خوه‌یان تویه‌نستنه‌ بڕه‌سنه‌ ئه‌و ئاسته‌ ك خزمه‌ت وه‌ ئنسانیه‌ت بكه‌ن. وه‌ل ئه‌وه‌یشا هویچ وه‌ختى قاپى زانست و پیشكه‌فتن له‌ڕوى هویچ كه‌سیگ نه‌وه‌سیاگه‌و هه‌ر كه‌سیگ بتوایگ نزیكه‌و بووگ له‌ پیشكه‌فتن بایه‌سه‌ هه‌وڵ بیه‌ێد.
ئیمه‌ له‌هه‌مان وه‌خت تویه‌نیم نه‌ف له‌ئه‌زموون كه‌سه‌یل تر وه‌ربگریم و هویچ كه‌سیگ وه‌ كه‌م نه‌زانیم و بیجگه‌ ئه‌وه‌یش ره‌خنه‌و پیشنیاره‌یل مه‌ردمیش وه‌ئاسایى وه‌ربگریم و نه‌ڕه‌جیه‌یم له‌و ره‌خنه‌یله‌ ك تیه‌یگه‌ تویشمان، چوینكه‌ نه‌بایه‌د ئاده‌میزاد هه‌میشه‌ خوه‌ى سه‌ركه‌فتگ و بى غه‌ڵه‌ت دابنه‌یگ و بویشیگ من ته‌واوم، چوینكه‌ كه‌سه‌یلیگ هه‌ن زیره‌كترن له‌لیدو تویه‌نید نه‌ف له‌لیان وه‌ربگریدو له‌وه‌رخاتر یایگرتن هه‌میشه‌ بایه‌سه‌ پرسیار بكه‌یم نه‌ك ئه‌را ده‌رخستن، به‌ڵكوو ئه‌را ئه‌وه‌ك بتویه‌نیم نه‌ف وه‌كه‌سه‌یل تر بڕه‌سنیم و ئه‌و زانست و زانیاریه‌ ك ده‌سمان كه‌فیگ جیوازى بكه‌یم ئه‌را مه‌ردمان تر.