چوێن توێه‌نى بوێده‌ قسه‌كه‌رێگ سه‌ركه‌فتگ و په‌سه‌ن كریاگ لاێ مه‌ردم

شفق نيوز

 

ئه‌وه‌ چشتێگ ئاساییه‌ ، ئه‌گه‌ر له‌ وه‌خت قسه‌ كردن ڕوێ وه‌ ڕوێ به‌عزێ كیشه‌ و گیر و گرفت بوێد ، وه‌تایبه‌ت ئه‌گه‌ر كه‌سێگ شه‌رمن یان گوشه‌گیر بوێد.
قسه‌ كردن له‌وه‌رده‌م ژماره‌ێ فه‌ره‌ێگ له‌ مه‌ردم كار ئاسانێگ نییه‌ ، وه‌تایبه‌ت له‌ وه‌ختێگ بتوێه‌نى به‌عزى چشت روونه‌و بكه‌ێد یا چشتێگ سابت بكه‌ێد ، زه‌روریه‌ هوكاره‌ بوێد چوێن زانیارى و هێوركردنه‌وه‌گاند ئه‌ڕا گوش ته‌كن وه‌شێوه‌ێ سه‌ركه‌فتگ و باوه‌ڕ وه‌ پێ كریاگ نه‌قڵ بكه‌ێد ، تا گوش ته‌كن وه‌ئاسانی له‌ مه‌به‌ستد حاڵى بووگ و گوش به‌ێگه‌ قسه‌گاند ، له‌ێره‌ هه‌یشت رێگا چاره‌ خه‌یمنه‌ ڕوێ ئه‌ڕا ئه‌وه‌گ بوێده‌ قسه‌كه‌رێگ وه‌توانا و جی ڕه‌زامه‌ندى مه‌ردم.  
1-خوه‌نستن
زورم مه‌ردم له‌ شوون ته‌واو كردن قوناغه‌یل خوه‌ندن ، كتاو نیه‌خوه‌نن ، چوێن هانه‌ ئه‌و باوه‌ڕه‌ دى نیاز وه‌خوه‌نستن نه‌ێرن ، له‌ وه‌ختێگ ئایم هه‌ر بڕوا نامه‌ێگ وه‌ده‌س بارێگ ، خوه‌ندن كتاو فه‌ره‌ گرنگه‌ ئه‌ڕاێ تا بتوێه‌نێ له‌ كاره‌گانێ سه‌ركه‌فتگ بووگ ، زورم ئه‌وانه‌گ سه‌ركه‌فتن وه‌ده‌س هاوردنه‌ ، ڕوژانه‌ 30 خوله‌ك كتاو خوه‌نستنه‌. خوه‌نستن كتاو یا هه‌ر بابه‌تێگ نویسریاگ ، هوێر و زانیارید فراوانه‌و كه‌ێگ و كومه‌كد كه‌ێگ ئه‌ڕا ئه‌وه‌گ وه‌شێوه‌ێ سه‌ركه‌فتگ له‌ ژیان ڕوژانه‌د قسه‌ بكه‌ێد.
2- خوه‌د ئاماده‌ بكه‌
قسه‌كه‌ر سه‌ركه‌فتگ و په‌سه‌ن كریاگ لای مه‌ردم ، هه‌میشه‌ زانێگ له‌ باوه‌ت چه‌ قسه‌ كه‌ێگ ، له‌ دریژایێ دیمانه‌ و كونگره‌ و ووتار پێشكه‌ش كردنه‌گانێ زانێ چه‌ ئوێشێ ، له‌وه‌ر ئه‌وه‌گ ووته‌گانێ ئاماده‌ كردێه‌ و گشت زانیارێێگ سه‌باره‌ت وه‌ باوه‌ته‌گه‌ خوه‌نستگه‌سه‌و. وه‌ختێگ قسه‌گاند ئاماده‌ كه‌ێد ، فێر نمونه‌ێ خاس بكه‌ و ئه‌گه‌ر توێه‌نید له‌چه‌ن سه‌رچاوه‌ زانیارى ده‌رباره‌ێ باوه‌ته‌گه‌د گرده‌و بكه‌ ، چوێن سه‌رچاوه‌یل فه‌ره‌ێ زانیارى كومه‌كد كه‌ێگ تا وه‌شێوه‌ێ خاسترێگ هوێر و ئه‌ڕا چگنه‌گاند بخه‌یده‌ ڕوێ.
باێه‌د قسه‌گاند بێزاركه‌ر نه‌ون و وه‌شێوه‌ێگ بوون ك سه‌رنج گشت كه‌سێگ بكیشێگ ، هه‌میش باێه‌د زانیاری فه‌ره‌ له‌ بان باوه‌ته‌گه‌د داشتوێد ، ئه‌ڕا ئه‌وه‌گ بتوێه‌نێ هه‌ر پرسیارێگ جواو به‌یده‌و.  
3- ڕاهێنان یا ته‌مرین
زورم ئه‌و كه‌سه‌یله‌ ك له‌ قسه‌ كردن و ووتار خوه‌نستن سه‌ركه‌فتگن ئوێشن : ڕاز سه‌ركه‌فتنێان ئه‌وه‌سه‌ ك هه‌میشه‌ ته‌مرین كه‌ن له‌ بان قسه‌كردن ، له‌وه‌ر ئه‌وه‌گ ڕاهێنان یا ته‌مرین كومه‌ك كه‌ێگ ئه‌ڕا ئه‌وه‌گ هه‌ڵه‌ یا غه‌ڵته‌گان ده‌سنیشان بكه‌ێد  و زوان جه‌سته‌ و قسه‌گاند پوخته‌ بوون ، ئمجا توێه‌نی ڕاهێنان یا ته‌مرین له‌ وه‌رده‌م خانه‌واده‌گه‌د یا هاوڕێه‌گاند بكه‌ێد ، یا له‌وه‌رده‌م جامه‌ك وه‌متمانه‌وه‌ بوسیه‌ید و وه‌شێوه‌ێگ روشن قسه‌ بكه‌ید و له‌ قسه‌كردن گت نه‌كه‌ێ ، ئه‌گه‌ریش له‌ قسه‌ كردن هه‌ڵه‌ یا غه‌له‌ت كردى ڕخد نه‌چوگ ، چوێن هه‌ڵه‌گان كومه‌كد كه‌ن تا زیاتر سه‌ركه‌فتگ بوێد.
4- وه‌شێوه‌ێگ قسه‌ بكه‌ ك سه‌رنج گشت كه‌سێگ بكیشید
سه‌ختترین چشت له‌ وه‌خت قسه‌كردن ئه‌وه‌سه‌ ك چوێن سه‌رنج گوش ته‌كنه‌یل وه‌ره‌و لاى خوه‌د بكیشی ، قسه‌كه‌ر سه‌ركه‌فتگ باێه‌د بزانێگ له‌ سه‌ره‌تاێ قسه‌گانێ چوین سه‌رنج بینه‌ره‌یل وه‌ره‌و لاێ خوه‌ێ بكیشێ ، هه‌میشه‌ پێشه‌كى گرنگ و گه‌ورا ئه‌ڕا قسه‌ یا ووتاره‌گه‌د ئاماده‌ بكه‌ ئه‌ڕا ئه‌وه‌گ گشت كه‌سێگ گوش له‌لید بته‌كنێ.  
5- وه‌ده‌نگ به‌رز قسه‌ بكه‌
وه‌خت فه‌ره‌ێگ تواێگ تا بتوێه‌نى هوكاره‌ بوێد چوین وه‌شێوه‌ێ ره‌سا و وه‌ده‌نگێگ به‌رز قسه‌ بكه‌ێد ، باێه‌د گشت ڕوژێگ ڕاهێنان یا ته‌مرین بكه‌ید ته‌نانه‌ت ئه‌گه‌ر تائیسه‌یش هوێچ دیمانه‌ێگ پێشكه‌ش نه‌كردوێد ، چوێن له‌ ئاینده‌ نیاز وه‌ێ شارازاییه‌ په‌یا كه‌ید.
6-زوان جه‌سته‌د وه‌كار بار
زوان جه‌سته‌ هێزێگ گه‌ورا دێرێ ئه‌گه‌ر وه‌شێوه‌ێ خاس وه‌كارێ بارید ، ئه‌وانه‌گ وه‌زوان جه‌سته‌ قسه‌ كه‌ن ، فه‌ره‌ جور كه‌سێگ باوه‌ڕ وه‌ خوه‌ێ داشتوگ ده‌ركه‌فێگ ، توێه‌نى له‌و ڕیه‌وه‌ په‌یامه‌گه‌د وه‌ئاسانى بڕه‌سنید و مه‌ردمیش خاس له‌ لید حالى بوون. شێوه‌ێ قسه‌كردند ، ڕوخسارد ، شێوه‌ێ وسیان و جوێله‌د فه‌ره‌ گرنگن ، گه‌شه‌ بێه‌ جوێلانن ده‌س و ده‌ربڕینه‌گان و ڕوخسارد ، هوكاره‌ بوو ك چوێن په‌یوه‌ندى چه‌ود بپارێزید ،  گوش له‌واكانتر بته‌كن ، هه‌ر وه‌ختێگ لازم بوێ بخه‌ن ، گشت ئه‌و چشته‌یله‌ هیلن بوێده‌ قسه‌كه‌رێگ سه‌ركه‌فتگ.
7-هوشیار بوو بزان چه‌ئویشید
وه‌ختێگ قسه‌كه‌ید ، وه‌ته‌نیا هوێر له‌ قسه‌گاند بكه‌ره‌و ، گرنگ نییه‌ چ كێشه‌ێگ له‌ ژیان دیرى ، له‌ وه‌خت قسه‌ كردن كیشه‌گاند له‌ هوێره‌و بوه‌ ، جه‌خت بكه‌ بان بیرو ئه‌ڕا چگنه‌گاند ، ئاگا بوو بزان چه‌ئوێشى؟
 8- باوه‌ڕ وه‌خوه‌د بوێند زێاێه‌و بكه‌
ئه‌گه‌ر له‌ وه‌راوه‌ر گوش ته‌كنه‌یلد باوه‌ڕ وه‌خوه‌د  نه‌یاشتوێد ، ئه‌وه‌ وه‌هوێچ شێوه‌ێگ ، قسه‌گاند نیه‌ونه‌ جى ڕه‌زامه‌ندى وه‌رانوه‌ره‌گه‌د ، چوێنكه‌ مه‌ردم باوه‌ڕ وه‌ قسه‌گاند نیه‌كه‌ن ، باوه‌ڕ وه‌خوه‌د داشتوو  تا مه‌ردمیش باوه‌ڕ وه‌ پید بكه‌ن.
وه‌ روونى قسه‌ بكه‌ ، په‌یوه‌ندى چه‌وه‌یلد وه‌ل گوش ته‌كن دروس بكه‌ ، بخه‌ن ، راسگو بوو ، ئه‌گه‌ر باوه‌ر وه‌خوه‌دیش نه‌یرى ، وه‌جورێگ خوه‌د ده‌ربخه‌ ك چمانێ باوه‌ڕ وه‌ خوه‌د دیری ،  


سه‌رچاوه‌‌/womanitely.com