مه‌زڵوميه‌ت فه‌يله‌يل.. ياساى پرس و پرسكارى ئاگريان ناكوشنێده‌و

شفق نيوز

دوسيه‌يليگ فه‌يلى هه‌ن كه‌فتنه‌سه‌ بن دوسيه‌يل عراقى و چه‌وه‌ڕى ئه‌وه‌ ئه‌كه‌ن كه‌سه‌يليگ درارنه‌ى و تووزه‌گه‌ى بانى بماڵن، ئمجا ده‌نگه‌يليگ فه‌يلى هه‌ن ناژنه‌فيه‌ن و كيشه‌يليگ هه‌ن چه‌وه‌ڕى چاره‌سه‌رن، ئه‌و تاوانه‌يليشه‌ ك ئه‌نجام دريان ئه‌و عراقيه‌يله‌ ناڵانن وه‌ده‌سيه‌وه‌و تائيسه‌يش شوونه‌وارى هه‌ر دياره‌ و فريه‌يگيش له‌ليان دابه‌ش بوينه‌ له‌ زوورم وڵاته‌يل دونيا.

تاوانه‌يل ته‌سفير و ته‌هجير و بيسه‌روشوونكردن و زيندانى و گرتن و ده‌سوه‌سه‌ركردن ئه‌را ساڵه‌يل فريه‌يگ پشت وه‌ تومه‌ت يا كرده‌وه‌يگ يا زه‌فتكردن هه‌ق كه‌سيگ نه‌وه‌ساوێد و ده‌يان هه‌زار كه‌س له‌ده‌سى ناڵانيان و شۆفينيه‌يل و كينه‌تداره‌يل له‌ به‌عسيه‌يل و قه‌وميه‌يل و عرووبيه‌يل مكوڕ بوين له‌بان ئه‌نجامداينى، ك هه‌رچه‌نى مه‌ردمانيگ وسيان وه‌لياناو ئنساف مه‌زڵوميه‌ت كرديان و داواى هاوردنه‌وه‌ى مافه‌يليان كرديان و حكومه‌تيش هاوكارى مه‌زڵوميه‌ت كورده‌يل فه‌يلى كرد و چه‌ن بڕياريگ ده‌ركرد ئه‌را ئنسافكردنيان.

ئه‌و مه‌ردمانه‌ ك گشت ماڵ و موڵك و به‌ڵگه‌يل فه‌رمى له‌ليان زه‌فت كريا وه‌بى ئه‌وه‌گ تاوانيگ داشتوون و جيا كريانه‌و له‌ خيزانه‌يليان، ئه‌وه‌ بوى گه‌ورايه‌يليان له‌ ته‌مه‌ن وه‌ل ژن و مناڵه‌يل بريان وه‌ره‌و مه‌رز و له‌ناو هه‌قڵ مينه‌يل ڕى وه‌پيان كرديان ئه‌را ئه‌وه‌گ ئه‌و مينه‌يله‌ بته‌قيه‌ێده‌ پياناو بكوشيه‌ن له‌و ڕيه‌يل سه‌خته‌.

وه‌لێ جايه‌ڵ جوانه‌يل و پياوه‌يل بريان وه‌ره‌و يه‌كه‌يل سه‌ربازى ئه‌را خزمه‌تكردن و له‌ هه‌مان وه‌خت دوكانه‌يليان زه‌فت كرياو فرووشيا وه‌ ئه‌رزانترين نرخ ئه‌را ده‌وڵه‌ت و دوياخريش خريانه‌ گووشه‌ى زيندان و جايه‌ڵه‌يليان كوشيان و له‌ تاقيگاى كيمياوى ژه‌هراوى كريان و كوشيان و له‌ليانيش تائيسه‌ چاره‌نويسيان ديار نيه‌و بيسه‌روشوونن.

گشت ئى مه‌ويسى و ده‌رده‌سه‌ريه‌ ك ده‌رفه‌ت و بار گونجياگيگ نيه‌ فيشتر ئاشنا بكريه‌ێد و نمايشى بكريه‌ێد له‌وه‌رده‌م عراقيه‌يل و راى گشتى عه‌ره‌بى و جه‌هانى وه‌بوونه‌ى بار سه‌خت و كيشه‌دار عراق له‌شوون رميان رژيم، له‌يوا له‌ليمان ئه‌كا جوور ئه‌ركيگ و پابه‌ندبوينيگ ئه‌خلاقى و نيشتمانى و ئنسانى گرينگى وه‌پى بيه‌يم و مامڵه‌ وه‌ليا بكه‌يم وه‌تايبه‌ت له‌ڕوى هووكاره‌يل ره‌سانن وه‌گووره‌ى قه‌واره‌ى ئه‌و تاوانه‌يله‌ ك ئه‌نجتم دريانه‌ ده‌رهه‌ق ئى شه‌ريحه‌.

وه‌ل ئه‌وه‌يشا گشت ئه‌و تاوانه‌يله‌ ك ئه‌نجام دريان خوازيار ئه‌وه‌سه‌ جيوه‌جى ياساى پرس و پرسكارى جيوه‌جى بكريه‌ێد ده‌رهه‌ق ئه‌وانه‌گ ئه‌نجامى دانه‌و ده‌س له‌تى داشتنه‌و له‌ رووژنامه‌ى فه‌رمى بڵاو بكريه‌ێد وه‌خاتر سزاداين دادگه‌رانه‌ ده‌رهه‌ق هه‌ركه‌سيگ له‌و كرده‌وه‌يله‌ به‌شدار بويه‌و ها هه‌ر پۆست وپله‌و پايه‌يگ و موحاسبه‌ بكريه‌ن له‌بان ئه‌و تاوانه‌يله‌ ده‌رهه‌ق پيكهاته‌ى فه‌يلى و پيكهاته‌يل تر ك جى داخه‌ خوه‌يان له‌پشت ديواره‌يل حزبه‌يل ده‌سڵاتدار ئمڕوو شاردنه‌سه‌و.

بيگومان گشت ئه‌وانه‌ك زه‌ره‌دمه‌ن بوينه‌ له‌ئاكام ئه‌و تاوانه‌يله‌ چه‌وه‌ڕى هاوردنه‌وه‌ى مافه‌يليان ئه‌كه‌ن وه‌ گووره‌ى ياسا وه‌بى داناين هويچ گرفتيگ وه‌ بوونه‌ى هووكاره‌يل تايفى يا ئايينى يا نه‌ته‌وه‌يى و ره‌گه‌زى جوور ئه‌وه‌گ ئمڕوو دوينريه‌ێد له‌ زوورم دام و ده‌زگايه‌يل حكومى له‌وه‌خت مراجعه‌كردن، هه‌ر وه‌و خاتريشه‌ بايه‌سه‌ له‌بان رووڵه‌يل خاوه‌ن شه‌ره‌ف ئى نيشتمانه‌ ك وه‌ل ئى كيشه‌ وسيه‌ن مكوڕ بوون ئه‌را ده‌رخستن راسيه‌يل و هاوردنه‌وه‌ى مافه‌يل ئه‌را خاوه‌نه‌يليان ك هه‌رچه‌نى ئاگر تويڕه‌ييان ناكوشنێده‌وه‌و كووتايى وه‌ ئه‌زره‌ته‌يليان نايه‌رێد له‌ئاكام ئه‌و تاوانه‌يله‌ ك رژيم به‌عسى ده‌رهه‌قيان ئه‌نجاميدا.

عه‌بدولخالق ئه‌لفه‌لاح