ژيان هاوسه‌ری و دويره‌وكه‌فتن له‌ هاوڕی

شفق نيوز

  ئيمه‌ زانيم ك دونيای ئاده‌ميزاد پيكهاتگه‌ له‌ ريكخستن په‌يوه‌نديه‌يل و چونێتی ره‌فتار و هه‌وڵ وه‌ديكردن كه‌سه‌يليگ بی كيشه‌و گرفت له‌وه‌ر پڕه‌وكردن گووشه‌ی ته‌نيايی و ئه‌را وه‌رده‌واميداين وه‌ په‌يوه‌نديه‌يل كوومه‌ڵايه‌تی ك هه‌وه‌جه‌ی خواستيگه‌ ئه‌را گشت ئاده‌ميزاديگ له‌بان ئی گووشه‌ی زه‌ويه‌.

ئاشكرايشه‌ ك ته‌نيايی ئه‌را ئاده‌ميزاد جوور ئه‌ور بی وارانيگه‌و هويچ دڵخوه‌شی نه‌يريد. وه‌ل ئه‌وه‌يشا زانيمن ك وه‌سه‌ربردن وه‌خت و په‌ره‌داين وه‌ ژيان، هه‌وه‌جه‌ وه‌ دووس و هاوڕی و هاوجه‌می ديريد.

بيجگه‌ ئه‌وه‌يش ئاگاداريم له‌وه‌ك زوورم ئاده‌ميزاده‌يل، خه‌ڵوه‌ت و خه‌ڵوه‌نشينی وه‌پيان خوه‌ش و دڵگيره‌، وه‌لی يه‌يش مانای ئه‌وه‌ نيه‌ ك ته‌نگه‌وه‌ری و ليژييگ له‌ناونيمان بوود و نه‌تويه‌نيم له‌ليه‌و گوزه‌ر بكه‌يم و ترس كه‌فتن له‌لی داشتويم، ك دوياخريش به‌ن په‌يوه‌نديه‌يلمان بوڕيم و ته‌كان بيه‌يم وه‌ره‌و ژيان ته‌نيايی.

بيگومان گشت كه‌سيگ له‌ژيان، وه‌ قوناغه‌يل جياجياو عومر جياجيايگ گوزه‌ر ئه‌كا، له‌ هه‌ر قوناغيگيش بڕيگ يادگاری وه‌ل خوه‌يا ئه‌ڵگرتگه‌ تا ره‌سيه‌سه‌ قوناغ هاوسه‌رگيری، وه‌لی له‌يرا له‌ی قوناغ تازه‌ی هاوسه‌رگيريه‌و هه‌ڵوژانن هاوسه‌ر ژيان و ئالَشتبوين شيواز ژيان، نوڕيد كه‌سه‌يليگ هه‌ن به‌ر ئه‌و تويه‌م ‌ په‌يوه‌نديل گوزه‌يشته‌‌ ك له‌ زه‌وی نه‌خت و نه‌فداريگ كاڵينه‌سه‌ی وه‌شاننه‌سه‌ی نيه‌چننه‌وه‌و(خه‌رمان به‌ره‌كه‌ت)خوه‌يان ده‌نه‌ ده‌م وه‌يشت سيه‌سام، ك وه‌و خاتريشه‌ نوڕيد شه‌ن ته‌نيايی كه‌ن له‌ بياوان بی ئوميدی.

ئيمه‌ زانيم دار بی لق، سيوه‌ری كه‌مه‌و وه‌ڵگه‌يل ره‌نگ زه‌رديشی چه‌پڵه‌ ئه‌را سه‌مای مه‌له‌ جوانه‌گان نا‌كوتن و هه‌ميشه‌ جاڕسن له‌ ژنه‌فتن ئاواز پڕ چريكه‌ی قومری و بوڵبوڵه‌يل.

ئنجا چه‌تر سيه‌ماڵ گووشه‌ كناريش هه‌رچه‌نی وه‌ ميخ قوڕافته‌دار دامه‌زرياگه‌و چه‌نی ته‌نافی له‌ ره‌سه‌ن و به‌ن ئه‌وريشم بوود‌، وه‌لی وه‌رده‌وام كه‌فيده‌ وه‌ر هه‌ڕه‌شه‌ی گه‌رده‌لويل و تويڕه‌يی شيته‌وای له‌ناكاو هه‌ڵكردگ.

دی مانای ئه‌وه‌سه‌ ده‌ووڵ و زوڕنای شادی و زه‌وق و زينه‌ت، ئه‌زره‌ت ديده‌ن ده‌سه‌جه‌می و شاوازكيشان هاوكوڕی و ئه‌زره‌تمه‌ن سه‌رچوپی دووس و ئه‌زيزه‌يله‌.

مه‌رام باسه‌گه‌م له‌يرا ئه‌وه‌سه‌، ئه‌ڕاچه‌ وه‌ختيگ كه‌سيگ ژن خوازيد يا چووده‌ ناو ژيان هاوسه‌رگيری دی يه‌كسه‌ر نوڕيد ئه‌و هه‌مگه‌ ره‌فيق و هاوكوڕه‌يل خاس و پڕ متمانه‌ی خوه‌يه‌ له‌ده‌س ئه‌ياد؟ ئی پرسياره‌ له‌ ده‌م كه‌سه‌يليگ فريه‌يگ ژنه‌فيمنه‌ی و تا ئيسه‌ راز ئی مه‌سه‌له‌ بويه‌سه‌ مايه‌ی سه‌رگه‌ردانی و هه‌وه‌جه‌ وه‌ جواويگ باوه‌ڕ وه‌پيكردگ ديريد.

له‌يوا بزانيم هويچ وه‌ختيگ ياسای ژيان هاوسه‌ری ريگر نيه‌ له‌وه‌رده‌م په‌ره‌داين وه‌ وه‌رده‌وامی هاوڕێتی و په‌يوه‌نديه‌يل كوومه‌ڵايه‌تی، وه‌لی كه‌سه‌يليگ هه‌ن هه‌ر كوت وپڕ له‌شوون ژنخوازين خی گرنه‌ ئيچنه‌ ره‌فتاريگ و خوه‌يان دويره‌و خه‌ن له‌ دووس و هاوڕی، ك يه‌يش له‌ راسی جی نگه‌رانی و سه‌رسوڕمه‌نينه‌و پشتكردنه‌ له‌و رووژه‌يل پڕ له‌ يادگاريه‌ ك وه‌ل هاوڕيه‌يل برياسه‌ سه‌ر له‌ خوه‌شی و ته‌نگی و مانای پشتكردن و تاڕاده‌يگ حاشاكردنه‌ له‌و قوناغه‌يل وه‌رجه‌ ژيان هاوسه‌ريه‌ ك هه‌وه‌جه‌ وه‌ هاوكوڕ و هاوڕی له‌تی داشتيده‌.

ره‌نجده‌ر ئاواره‌