فره‌یى ئۆتۆمۆبیل و گوزران له‌ شاره‌یل

شفق نيوز

 

ئۆتۆمۆبیل له‌ داهێنانه‌یل گرنگ سه‌رده‌م شوڕش پیشه‌سازیه‌و له‌ ئه‌ورۆپاو ئه‌مریكا ده‌ركه‌فت. ئامێریگ بوى ئه‌را گریه‌داین ئاوایى و شاره‌یل له‌ناونى یه‌كترى ئه‌را جیوازكردن ئاده‌میزاد و كاڵایه‌یل به‌رهه‌مهاوریاگ وه‌ره‌و شار و ده‌وڵه‌ته‌یل هاوساو بویه‌ یه‌كه‌مین هه‌وه‌جه‌و خه‌م ئاده‌میزاد، دى كه‌مه‌ كه‌مه‌ ئۆتۆمۆبیل بویه‌ یه‌كه‌مین هاوسه‌ر و دووس ئاده‌میزاد خوه‌رهه‌ڵات و گشت جه‌هان! ئمجا له‌ كوردستان خوه‌مانیش تویه‌نیم ئاماژه‌ وه‌ ساڵه‌یل هه‌فتاو هه‌یشتاى سه‌ده‌ى وه‌رین بكه‌یم له‌ڕوى مێژوو و ده‌ركه‌فتن گورج ئى وه‌سیله‌ى گرنگه‌.

 

ئۆتۆمۆبیلیش جوور" رادیۆ و ته‌له‌فزیۆن و كۆمپیته‌ر و مۆبایل و...هتد" نیشانه‌یگه‌ ئه‌را قوناغ و سه‌رده‌میگ دیاریكریاگ ك شایه‌تى له‌بان بار كوومه‌ڵایه‌تى و كلتوورى ئه‌یاد و شیوه‌ى تایبه‌تیگیش له‌ كاریگه‌رى دیرێد له‌بان كوومه‌ڵگاو په‌یوه‌ندى ناونى تاكه‌یلى.

 

سه‌رده‌میگ ئۆتۆمۆبیل ته‌نیا ده‌وڵه‌مه‌ن و خانه‌دانه‌یل و سه‌رمایه‌داره‌یل داشتنه‌ى، ئه‌و كه‌سه‌ ك ده‌وڵه‌مه‌ن و خاوه‌ن دارایى نه‌ویاتاد نه‌تویه‌نست بووده‌ خاوه‌ن ئۆتۆمۆبیل! وه‌لى له‌ سه‌ره‌تاى ساڵه‌یل هه‌یشتاى سه‌ده‌ى وه‌رین له‌وه‌ختیگ حكوومه‌ت دیكتاتۆرى به‌غدا خه‌ریك جه‌نگ بوى، مه‌ردم هووكاره‌ى ته‌ماح و موڵكداریه‌تى كرد و ئیچنه‌ وه‌پیان كرد له‌وه‌رانوه‌ر مه‌رگ رووڵه‌یلیان بێده‌نگ بوون له‌جیاى ئه‌وه‌ ئۆتۆمۆبیلیگ مۆدێل به‌رز دیاده‌ پیان، یا هه‌ركه‌سیگ بویاتاده‌ ئه‌فسه‌ر و پیاگ رژیم ئۆتۆمۆبیلیگ وه‌ دیارى وه‌پى به‌خشیاد، تا ره‌سیه‌ ئه‌و راده‌ مه‌ردم كه‌فتنه‌ ئشق سه‌نین و فرووشتن ئۆتۆمۆبیل!

 

رێژه‌و شوماره‌ى ئۆتۆمۆبیله‌یل جووراوجوور ئیتاڵى و رووسى و به‌رازیلى و یابانى له‌ شار و شاروچكه‌یل و بگر له‌ ئاوایه‌یلیش روى له‌ زیایبوین كرد، ئمجا ئه‌وانه‌ك تواناى سه‌ندن ئۆتۆمۆبیل نه‌یاشتن هس وه‌ بێبه‌شى و بێنازى كردیان و ئه‌وانه‌ك تواناى سه‌ندنى داشتن له‌لیان بوى وه‌ لویتبه‌رزیه‌و ته‌ماشاى پیاو فه‌قیر و كه‌مدرامه‌ت كردیان!

 

ره‌فتار تاك كورد ئاڵشتكارى هاته‌ بانى و روى له‌ خراوتر كرد، چوینكه‌ ئۆتۆمۆبیل هووكاریش بوى ئه‌را خه‌ریككردن و دویره‌وخستنیان له‌ خوه‌ندن و فره‌یگ له‌لیان واز له‌ خوه‌ندن هاوردن و بوینه‌ شوفێر، ك شایه‌د ئیسه‌ سێ به‌ش كوومه‌ڵگاى كوردى شوفێر بوون و رێژه‌ى فره‌یگیش فیته‌ر و دوكاندار كه‌ره‌سه‌ى ئۆتۆمۆبیل بوون.

 

ئه‌گه‌ر ته‌ماشاى رویداگه‌یل هاتوچوو بكه‌یم له‌ى ساڵه‌یل دویاخره‌، وه‌تایبه‌ت له‌ ڕێ وبانه‌یل ناونى شاره‌یل، دوینیم ئۆتۆمۆبیل چه‌نه‌ پرۆسه‌ى ئه‌نفال رووڵه‌ى كوردستان قڕ كردگه‌، چوینكه‌ ڕێ وبانه‌یل كوردستان سه‌خته‌و شوماره‌ى ئۆتۆمۆبیلیش له‌ راده‌ ده‌رچیه‌و رووژ وه‌ رووژ زیاتر تیه‌ره‌یده‌ وڵات، هه‌ر له‌وه‌ر ئه‌وه‌یش دوینید له‌ ئاكام سه‌رمه‌سى و بیهووشى یا له‌وه‌ر وه‌كارهاوردن مۆبایل له‌وه‌خت رانین ئۆتۆمۆبیل وه‌ ئه‌وپه‌ڕى هه‌ڵه‌په‌ڵه‌وه‌ مل نه‌ن وه‌ره‌و مه‌رگ و گیان له‌ده‌سداین. وه‌ل ئه‌وه‌یشا وه‌بوونه‌ى فره‌یى ئۆتۆمۆبیل له‌ناو شاره‌یل، هه‌م قه‌ره‌باڵغییش دروس بویه‌و هه‌میش دیمه‌ن ناشرین دروس كردنه‌و مه‌ردمیش خستگه‌سه‌ مه‌ترسى و ئه‌گه‌ر یا ئحتمال تویشهاتن وه‌ شێرپه‌نجه‌و نه‌خوه‌شیه‌یل سویه‌ له‌وه‌ر دویكه‌ڵ ژه‌هراوى ئۆتۆمۆبیل و له‌هه‌مان وه‌خت ژینگه‌یش پیس كردگه‌و ژیان مه‌ردم كه‌فتگه‌سه‌ مه‌ترسى و له‌ى ساڵه‌یل دویاخریشه‌ ته‌قاننه‌وه‌ى ئۆتۆمۆبیلیش په‌یا بویه‌ ك جوور چه‌كیگ بكوش ترسناك هساو ئه‌ڕاى كریه‌ێد له‌ى عراق هه‌ناسه‌ سه‌رده‌.

 

هه‌ر له‌وه‌ر ئه‌وه‌یش ئیسه‌ بایه‌د له‌ى عراقه‌ هویر له‌ دامه‌زرانن خه‌ت شه‌مه‌نده‌فه‌ر و میترۆ و ئۆتۆمۆبیلیل پاس بكریه‌ێد ئه‌را جیوازكردن مه‌ردم تا ئۆتۆمۆبیل كه‌متره‌و بوون له‌جاده‌و قه‌ره‌باڵغى دروس نه‌ود له‌گشت شاره‌یل.

 

حه‌مه‌ ئه‌حمه‌د ره‌سول

ج.ا