هه‌ر چوار وه‌رز ساڵ سه‌وزیمن

شفق نيوز

چه‌وى له‌ شوون تیه‌ریفه‌وداین مه‌ردم بوود دیاره‌ وه‌خوه‌ى متمانه‌ نێرێد! له‌ورا ك خاسترین وه‌سیله‌ چه‌وه‌و ره‌ینترین چشت نه‌تیجه‌ى كاره‌ و به‌رزترین شانازى ئه‌و زه‌مان و وه‌خته‌یلێگه‌ ك ئیمه‌ وه‌ل شه‌فه‌ق بردیمنه‌و سه‌ر، لێره‌ جوور  ئایم ئاقڵ ئه‌گه‌ر ده‌نگ  نه‌كه‌یمن فره‌ خاستره‌ له‌وه‌ ك وه‌ نه‌زانى قسیه‌ بكه‌یمن.

باس ئى جار جوور گشت رووژه‌یلتر نیه‌! باس ساڵیاد مه‌زرانن ده‌زگاى شه‌فه‌قه‌، ئه‌و ده‌زگا ك به‌شێگ له‌ عومر و ئاز و توانا و ته‌جروبه‌ یا ئه‌زموونه‌یل ژیانمان بى دو دڵى و  بى حه‌سوودى كردیمنه‌ قوربانیى و خوه‌شترین وه‌خته‌یلمان وه‌لیا بردیمنه‌و سه‌ر! گه‌ورایى ئى كاره‌ ئه‌وه‌سه‌ ك خوه‌مان ئه‌راى خوه‌مان ده‌رفه‌ت دروس كردیمن و بڕیار دایمن و نه‌ف دووسداشتن  و ئاشتى دره‌و كردیمن نه‌ زه‌ره‌د جه‌نگ  ك  ته‌نیا په‌شیمانى و ماڵویرانى به‌شیه‌! راسه‌ ك جه‌هه‌نم له‌ به‌غدا ناوه‌یلێگ فره‌ دیرێد، وه‌لى ئیمه‌ یه‌ك به‌هشت له‌ى شاره‌ ناسیمن ك ئه‌ویش شه‌فه‌قه‌ و گووشمان هاوه‌لاى ئه‌و قسیه‌ ك ( ئه‌گه‌ر خواستى كار گه‌وراێگ  بپووڕنى خوه‌د له‌ هویره‌و بووه‌ تا مه‌ردم له‌ شوون خوه‌د هویر وه‌پى بكه‌ن و یادى وه‌ گه‌ورایی بكه‌ن).

ئیمه‌ وه‌ل ئه‌وانه‌ نیمن ك تا نه‌بینه‌سه‌ داڵگ و باوگ گووش ئه‌راى په‌ند و ئامووژگاریه‌یل  داڵگ  و باوگه‌یلیان ناگرن و  ئمڕوو سوو كه‌ن  و له‌ هیچ رازى نین! دیاره‌  تا نه‌كه‌فیمن هووكاره‌ى وسان نادویمن و  ئه‌راى هه‌ر ئنسانێگ باوه‌ڕدار چشتێگ قه‌دردار هه‌س ك گیان خوه‌ى ئه‌راى فدا بكا و ئیمه‌ش ئویشیمن  ئه‌گه‌ر  سه‌ره‌نجام ئى كاره‌ له‌ شه‌فه‌ق وه‌ره‌و هامارى نه‌چوود و له‌ هه‌ڵه‌ت دویرمانه‌و نه‌خا شه‌و ئه‌رامان شوون رووژ گرێد و رووشناى هیچ چراخێگ  له‌ ئاسمان ژیانمان ناڵواسن تا له‌ تیه‌ریكى ته‌پوو كوو نه‌كه‌یمن!!

پووڕانن كار له‌ وه‌خت خوه‌ى ئنسان ئه‌كاده‌ پادشاى میلكان خوه‌ى و خوه‌شیه‌یل ئى یاد حه‌فت ساڵه‌ ئیمه‌ سه‌رمه‌س ئه‌وه‌ ئه‌كا  ك  چه‌واشه‌ى زووان نه‌رم و نوڵ ك شه‌فه‌ق وه‌پى ناسریاس بویشیمن، وه‌ داخه‌و  له‌ (به‌غدا) فره‌ن ئه‌وانه‌ى ك ده‌سه‌ڵات ها ده‌سیان و هیچ ئه‌راى مه‌سه‌له‌ى كورد نه‌كردن و ئیمه‌ش چه‌واشه‌ى ئه‌وان ك ده‌سه‌ڵات نه‌یریمن  فره‌ كار كردیمنه‌، وه‌لى ئه‌راى ئى سه‌بر و ئه‌راى ئى كووششه‌یلمانه‌ چه‌وێگ ئه‌خوازیمن ك ئى هه‌مگه‌ى ریینیه‌ بوینید و گووشێگ ك ئى هه‌مگه‌ى ئاواز خوه‌شه‌ بشنه‌فێد!! یه‌ راسه‌ ك ده‌زگاى رووشنهویرى و ره‌سانن شه‌فه‌ق یه‌كه‌م ده‌زگاى رووشنهویرى راسكانى كوردییه‌ وه‌ تام و بووى  كوردیاتى له‌ شوون رمیان رژیم به‌عس له‌  به‌غدا چه‌و واز كردیه‌،  وه‌لى ئومیدواریمن ك دویا ده‌زگاى رووشنهویرى كوردى نه‌ود، چوین ته‌نیا فكره‌و كردن وه‌ى كاره‌ساته‌  ترس و ژان ئه‌خاده‌ ناو دڵ ئنسان، وه‌ختێگ بزانید له‌ جیات ئه‌وه‌ ك له‌ ساى نه‌تیجه‌ى كووششه‌یل خوه‌ى بنیشید بایه‌د  ماته‌م ئه‌رایان بگرێ!!

 

عه‌لى حوسێن فه‌یلى