هاوكيشه‌ی گفتگوو له‌ناونی سيستم گشتی(ياسا)وكورده‌يل فه‌يلی

شفق نيوز

 

له‌يرا ئه‌گه‌ر ئيمه‌ ته‌ماشای ئه‌و رويداگه‌يله‌ بكه‌يم ك هاته‌سه‌ تويش كورده‌يل فه‌يلی له‌ سه‌رده‌م رژيم سه‌دام حسێن خوينمژ و سته‌مكار، جوور كووچ وه‌پيكردن و ده‌ركردن زووره‌ملی له‌ چوارچيوه‌ی پلان وه‌عه‌ره‌بكردن ره‌گه‌زی نائنسانی و ناژياری بيجگه‌ كاولكردن ئاوايی و شاره‌يليان و سزانن باخ و بووسان و زيندانيكردن جايه‌ڵ جوان وپياوه‌يليان له‌ گووشه‌ی زيندانه‌يل و زه‌فتكردن به‌ڵگه‌و ناسنامه‌يليان ك ئسپات عراقيه‌تيان كردياد وه‌ل زفتكردن قه‌واڵه‌يل ماڵ و موڵكه‌يليان و كرده‌وه‌يل له‌ناوبردن وه‌جه‌م(جينۆسايد)، دوينيم ك گشت ئی تاوانه‌يل نائنسانيه‌ په‌يوه‌سه‌ وه‌ نه‌خش ياسا، ك ك گوزاره‌ له‌ به‌رژه‌وه‌ندی نيشتمانی ئه‌كا وه‌گووره‌ی له‌يه‌كدانه‌وه‌ی ده‌سڵات ئه‌و رژيم گوڕ وه‌ گووڕه‌.

ئمجا ئه‌و ياسا ئيراده‌ی خوه‌ی ئاشكرا ئه‌كا ئه‌را له‌ناوبردن پيكهاته‌يگ له‌ ملله‌ت ك له‌و سه‌رده‌مه‌ وه‌ دوشمن ملله‌ت تاريفيان كرد و گشت دام و ده‌زگايه‌يل رژيم رمياگ و ده‌زگايه‌يل ده‌وڵه‌تيش جوور ره‌فتار كرديان وه‌ل ئی پيكهاته‌ ك دوير بوی له‌ بنه‌مايه‌يل ژياری و هه‌ر وه‌و خاتريشه‌ سزای وه‌جه‌م هاورده‌ تويشی.

ئاشكرايش له‌وه‌ كرده‌وه‌يله‌ ئه‌وه‌ بوی ك ياساو ريكخرياگه‌يل كوومه‌ڵگای مه‌ده‌نی و هووزه‌يل و پيكهاته‌يل مللی هويچ ناڕه‌زاييگ نيشان نه‌يان و هويچ مافيگ نه‌يانه‌ ئی پيكهاته‌ له‌ ژيان و ئاشتی و ئاسووده‌يی، جوور ئه‌وه‌ك بوشيد ك له‌ كوومه‌ڵگايه‌يل سه‌ره‌تايی ژيه‌يم و هويچ ژيار و رووشنهويريه‌تيگ ياسايی له‌تی نه‌ودو هويچ گرينگی وه‌ ره‌گه‌زی ئنسانی نه‌دريه‌يد!

به‌ڵی رژيم رمياگ ماف كورده‌يل فه‌يلی فه‌رامووش كرد ك پيكهاته‌يگن له‌ مه‌ردم عراق و حاشا له‌ هه‌وڵ و ته‌قلايان كرد ئه‌را بنياتناين وڵات و په‌ره‌داين ئه‌زموون و پيشه‌سازی ك جوور قه‌ڵغانيگ بوين ئه‌را وه‌رگری له‌ عراق له‌ سه‌رده‌مه‌يل وه‌رين له‌وه‌خته‌يل داگيركاری و په‌لاماره‌يل. يه‌يش بيجگه‌ ئه‌وه‌ك حزب به‌عس سته‌مكار گشت ريڕه‌وه‌يل ديموكراسی و ئازادی راده‌رخستنيان خسته‌ كنار و حاشا له‌ نرخ ئاده‌ميزاد كرد ك گرانترين سه‌رمايه‌يگه‌ له‌ وجوود.

محه‌مه‌د عه‌لی سه‌ماوی

ج . أ