پاشاى عراق و هه‌ڵویست كورد

شفق نيوز

ڕویداگه‌یل جوراوجوور چیه‌سه‌ ناو لاپه‌ڕه‌یل تاریخ ئنسانیه‌ت، وه‌لى وه‌ل ئه‌وه‌یشا فره‌جار ئاده‌میزادیش هس وه‌ماناى ئى ژیانه‌ نه‌كردگه‌و هه‌ر هه‌وڵ و ته‌قلاى ئه‌وه‌ داگه‌ ئاره‌زووه‌یلى بایگه‌دى، یا دوینید ژیان له‌لاى پاشایه‌یلیش جاروباریگ له‌وه‌ر خاتر زینه‌ت ئى دونیا بویه‌سه‌ مایه‌ى حه‌سره‌ت كاڵ!

فوئاد عارف و(غازى پاشا)ى وه‌رین عراق هه‌ردوگیان وه‌یه‌كه‌و كۆلیژ سه‌ربازى ته‌واو كردنه‌و ڕه‌فیق یه‌كترى بوینه‌. فوئاد عارف ك له‌داڵگبوى ساڵ 1913ى سه‌ده‌ى وه‌رینه‌ له‌ساڵ 1928 له‌كۆلیژ سه‌ربازى وه‌رگیریاگه‌و یه‌كیگ بویه‌ له‌یاوه‌ره‌یل مه‌لك غازى و له‌ساڵ و دویاى ئه‌وه‌یش پۆسته‌یل جوراوجوور له‌حكوومه‌ته‌یل یه‌ك له‌شوون یه‌ك عراقى وه‌رگرتگه‌و ره‌سیه‌سه‌ پۆست وه‌زیر له‌وزاره‌ت ده‌وڵه‌ت ئه‌را كاروبار ئه‌وقاف، ئه‌یه‌ بیجگه‌ ئه‌وه‌ك ماوه‌یگیش پۆست سه‌رۆك ئه‌ركان سوپا عراق وه‌پى دریاگه‌و له‌ساڵ 1967یش به‌شدارى شاند عراقى كردگه‌ ئه‌را مسر له‌وه‌ر خاتر گفتوگوو وه‌ل سه‌رۆك ئه‌وساى مسرا جه‌مال عه‌بدولناسر له‌باوه‌ت مه‌سه‌له‌ى جه‌نگ وه‌ل ئسرائیل وو ده‌ور عراق له‌و وه‌زعه‌. ئى كه‌سایه‌تیه‌ دویاى 97ساڵ له‌ژیان، بڕیگ یادگارى هیشته‌سه‌ جى و له‌وانه‌یش مه‌سه‌له‌ى سه‌ندن سه‌یاره‌گه‌ى غازى پاشاى عراق ك داوا له‌ عارف كردگه‌ پویل وه‌قه‌رز به‌یگه‌پى!!

عارف باس له‌یادگاریه‌یل خوه‌ى وه‌ل پاشاى عراقا كردگه‌و هه‌ردوگیان وه‌یه‌كه‌و له‌وه‌خت گه‌ردین له‌ناو جاده‌یل به‌غدا وه‌رجه‌ ئه‌وه‌ك بڕه‌سنه‌ نزیك ئۆرزدى باك له‌جاده‌ى ره‌شید، پاشا چه‌وى كه‌فته‌سه‌ سه‌یاره‌یگ له‌ناو نمایشگایگ ، ئنجا وه‌سیاگه‌و وته‌سه‌ عارف بچوو بویشه‌ خاوه‌ن ئه‌و كومپانیا بزان ئه‌و سه‌یاره‌ وه‌چه‌نیگ فرووشیگ ، عارفیش له‌سه‌یاره‌گه‌ داوه‌زیه‌و چیه‌سه‌ لاى خاوه‌ن سه‌یاره‌گه‌و نرخ سه‌یاره‌گه‌ له‌لى پرسیه‌، ئه‌ویش وته‌سه‌پى نرخ ئى سه‌یاره‌ 1550 دیناره‌، وه‌لى ئه‌را پاشا كه‌متر هساوى كه‌م، پاشا وه‌ختى نرخه‌گه‌ى زانستگه‌ ئه‌و پویله‌ نه‌یاشتگه‌ سه‌یاره‌گه‌ بسینیگ و فره‌یش دڵى وه‌پیه‌و بویه‌، هه‌ر له‌وه‌ر ئه‌وه‌یش داوا له‌فوئاد عارف كردگه‌ پویل وه‌قه‌رز به‌یگه‌پى، فوئادیش له‌ داراى دونیا ته‌نیا هه‌ر 150 دینار داشتگه‌و داسه‌ى پاشا، ئنجا دویاخر وه‌ختى دوباره‌ هاتنه‌سه‌و سه‌یاره‌گه‌ بسینن نوڕن كابرایگ تر خه‌ڵك سلێمانى له‌وه‌رجه‌ ئه‌وان سه‌یاره‌گه‌ سه‌ندگه‌، ئنجا وه‌ختى پاشا ته‌ماشا ئه‌كا سه‌یاره‌گه‌ یه‌كیگتر سه‌نده‌سه‌ى ناڕه‌حه‌ت بوود، چوینكه‌ فره‌ دڵى وه‌ سه‌یاره‌گه‌و بویه‌، وه‌لى كابراى كوردیش ك خه‌ڵك سلێمانیه‌و سه‌یاره‌گه‌ سه‌ندگه‌ وه‌ختى چه‌وى كه‌فته‌سه‌ پاشا دڵى وه‌و سه‌یاره‌و بویه‌ هه‌ڵویست مه‌ردانه‌و كوردانه‌ نیشانداگه‌و یه‌كسه‌ر وته‌سه‌پى غازى پاشا، بفه‌رما پیشكه‌شد بوود.

ئنجا هه‌رچه‌نى غازى پاشاى عراق ئاشق سه‌یاره‌ بویه‌و حه‌ز كردگه‌ له‌سه‌ندن سه‌یاره‌، وه‌لى دویاخریش هه‌ر وه‌ڕویداگ سه‌یاره‌ گیان له‌ده‌سداو ماڵئاوایى له‌ژیان كرد.