له‌ناونی ته‌وقه‌و ماچمووچی كردن

شفق نيوز

ته‌وقه‌كردن يا ده‌سداين شوونی گريگ ، يه‌يش تاراده‌يگ دڵخوه‌شكه‌ره‌ ، وه‌لی كه‌سه‌يليگ هه‌ن حه‌ز له‌هويچكام له‌يانه‌ نيه‌كه‌ن و ته‌نيا وشه‌ يا كه‌ليمه‌ی ( خوه‌د چونی ؟ ،هه‌له‌ ، HELLO) تيه‌رنه‌ كار و جوير ئه‌وه‌ك هويچ ئه‌هميه‌تيگ له‌لايان نه‌ياشتويد ، وه‌ل ئه‌وه‌يشا به‌عزه‌ كه‌سه‌يليگ ئويشن ئی چشته‌ تازه‌ كوينه‌ بوی و باوی نه‌مه‌ند و دی عه‌يبه‌ باوه‌ش بكريه‌يگه‌ يه‌كترياو ماچمووچی يه‌كتری بكريه‌يگ ، وه‌تايبه‌ت وه‌ل ئه‌و كه‌سه‌يلا ك خوه‌يان وه‌ رووشنهوير زانن يا پله‌و پايه‌يگ ديرن له‌ناو كوومه‌ڵگا يا ده‌سڵاتيگ ديرن ك له‌لای ئه‌وانه‌ ئی جووره‌ نه‌ريتيگ وه‌ ئه‌قڵيه‌ت دوياكه‌فتگ و نه‌فاميگ ده‌نه‌ی قه‌ڵه‌م .

بيگومان كوومه‌ڵگای كورده‌واری خوه‌مانيش بيبه‌ش نيه‌ له‌ی ديارده‌ی تازه‌و كه‌سه‌يليگ هه‌ن هه‌ر له‌دويره‌وه‌ جووره‌ ره‌فتاريگ نيشانده‌ن دی كه‌س وه‌رانوه‌ر بايه‌سه‌ له‌ليان بفاميگ و خوه‌ی له‌ليان وه‌ته‌واوی نزيكه‌و نه‌كه‌يگ و هه‌ر له‌ دويره‌وه‌ ته‌وقه‌يگ  نيمه‌و ناته‌واو وه‌ليانا بكه‌يگ و يه‌كسه‌ر خوه‌ی بكيشيگه‌ دوياوه‌ ، يا ئه‌وه‌سه‌ يه‌كسه‌ر وه‌پيد ئويشيگ بنيش وه‌خه‌ير هاتی تا دی ده‌س وه‌ليا نه‌يه‌يد و ماچی نه‌كه‌يد .

ئيمه‌ زانيم ئی نه‌ريته‌ هه‌ر سه‌رده‌مه‌يل كويه‌نه‌وه‌ باو بويه‌و زياتر له‌وه‌ر ئه‌وه‌ بويه‌ تا دووسی و خوه‌شه‌ويسی ناونی كه‌سه‌يل زياتر بووگ ، له‌ئه‌نجام ئه‌وه‌يش په‌يوه‌ندی زياتره‌و بويه‌و مه‌ردميش حه‌ز كردنيان له‌ديدار قه‌وم وكه‌س وكارو دووس و ناسياره‌يليان ، وه‌لی ئيسه‌ كاره‌گه‌ چه‌واشه‌وه‌ بويه‌و فره‌كه‌س له‌ئاست ماچمووچی به‌گ دانه‌ن و دوشمنيان ئی ديارده‌ی كوومه‌ڵايه‌تيه‌سه‌ ، يا ته‌ماشاكه‌يد وه‌ نك په‌نجه‌ ده‌س وه‌لدا ده‌ن و يه‌كسه‌ر ده‌س كيشنه‌وه‌و كه‌س وه‌رانوه‌ر خه‌جاڵه‌ته‌و كه‌ن . بيگومان يه‌يش بويه‌سه‌ مايه‌ی ئه‌وه‌ك داوڕيان له‌ناونی كه‌س و كار و دووس وبراده‌ر په‌يا بووگ و دی كه‌س ره‌حمی ئه‌را كه‌س نايگ ، ته‌نانه‌ت له‌رووژه‌يل (عه‌يد)يش ته‌نيا عه‌يدمباركی و به‌س ، ك هه‌رچه‌نی ساڵيگيشه‌ يه‌كتری نه‌ينه‌و سه‌ر له‌يه‌كتری نه‌يانه‌ . ئمجا فره‌كه‌س هه‌س ئی چشته‌ وه‌ دڵسه‌ردی زانن و خه‌م ئه‌وه‌ خوه‌ن به‌ن ره‌حم وه‌يه‌كجاری بوڕيه‌يگ . وه‌لی ئويشيم ئه‌گه‌ر ئی نه‌ريته‌ كويه‌نه‌ بويه‌و دی باوی نه‌مه‌ندگه‌ ئه‌ی ئه‌ڕاچه‌ سه‌رووك وڵاته‌يل له‌وه‌خت ديداركردنيان باوه‌ش كه‌نه‌ يه‌كترياو تير تير ماچ يه‌كتری كه‌ن ؟ ئه‌گه‌ريش له‌لايه‌ن ته‌ندروسی و جيوازكردن نه‌خوه‌شيه‌وه‌ بووگ ئه‌ی دكتۆره‌يل ئه‌را چه‌ رووژيگ له‌رووژان وه‌كه‌سيگ نه‌وتنه‌ ماچمووچی نه‌كه‌ن وه‌ل مه‌ردما ، ئيمه‌ له‌يرا مه‌به‌سمان له‌و كه‌سه‌يله‌سه‌ ك حاڵه‌ت ته‌ندروسييان خاسه‌و هويچ نه‌خوه‌شييگ نه‌يرن ، چوينكه‌ فره‌كه‌س هه‌س هه‌ق خوه‌يانه‌ سڵ كه‌ن له‌وانه‌ك نه‌خوه‌شن و دوچار ده‌س ده‌رديگن و رخيان چووگ له‌وه‌ك تويش نه‌خوه‌شی بان يا قه‌يز بكه‌ن له‌ليان . وه‌لی وه‌هه‌ر حاڵ تويه‌نيم بويشيم ناونی ته‌وقه‌كردن تا ماچمووچيكردن له‌ی سه‌رده‌مه‌ جياوازی فره‌يگ وه‌خوه‌يه‌وه‌ ديه‌و فره‌كه‌س دی ئی نه‌ريته‌ وه‌ گڵاو زانن و مقه‌يه‌تن له‌وه‌ك ئی چشته‌ نايگه‌ تويشيان .