قورتاركردن عراق له‌ مالكى

شفق نيوز

له‌تیان داواى خاسه‌وكردن ره‌فتار و كێشه‌یل وڵات ئه‌كریه‌ێد، وه‌لى شایه‌د له‌ حاڵ حازر زیاتر رویوه‌ڕوى ئه‌و فشاره‌یله‌ بوود له‌وه‌ختیگ ك تویه‌نست سه‌رۆكایه‌تى حكوومه‌ت له‌ده‌س ئه‌یاد عه‌لاوى ركابه‌ره‌ سیاسیه‌گه‌ى درارێد وه‌ گووره‌ى وه‌ده‌سهاوردن زوورمینه‌ى ده‌نگ له‌ هه‌ڵوژاردنه‌یل نوێنه‌رایه‌تى وه‌رین.

 

شاریاگ نییه‌ ك مالكى تویه‌نست وه‌ ره‌زامه‌نى ئه‌مریكاو ئیران ئى پۆسته‌ بارێده‌ ده‌س و هه‌ر یه‌كیگ له‌لیان له‌وه‌ر هووكاریگ بوى، ئمجا سه‌رۆك وه‌زیره‌یل عراقى پشت وه‌و رێككه‌فتنه‌ به‌سا له‌وه‌ر خاتر دامه‌زرانن حوكمیگ كاریگه‌ر له‌بان ئاست خودى و مه‌زه‌وى.

 

دویاى نه‌مه‌ندن رژیم وه‌رین و ئه‌و تومه‌ته‌یل تیرۆریستیه‌ ك خریا پاڵ  سیاسه‌تمه‌داره‌یل عه‌ره‌ب سوننى، بویه‌ مایه‌ى دروسكردن ناكووكیه‌یل فره‌یگ و له‌هه‌مان وه‌خت مالكییش تواناى مه‌یلكیشان گشت شیعه‌یل ناوخوه‌یى نه‌یاشت وه‌ره‌و لاى خوه‌ى ك هه‌رچه‌نى فره‌جار ئیرانیش فشار خستیاده‌ بان لایه‌نه‌یلیگ شیعه‌ له‌و باوه‌ته‌وه‌و بایه‌س بوى له‌بانیان زیاتر په‌یوه‌س بوون وه‌ ستراتیجیه‌ت ئیرانى وه‌ل به‌رپابوین قه‌یران سورى، دى ئه‌وه‌ بوى ك قه‌یرانه‌ تون وتیژه‌گه‌ وه‌ل هه‌رێم كوردستان بوى وه‌تایبه‌ت وه‌ل سه‌رۆك مه‌سعود بارزانى ك مه‌یل ئه‌را خودنیشانداینه‌یل سورى داشت دژ رژیمه‌گه‌ى، یه‌یش له‌وه‌ختیگ ك جه‌لال تاڵه‌بانى هساوه‌یل تر ئه‌ڕاى كرد وه‌ گووره‌ى ئه‌وه‌ك نفوز ئیرانى له‌ ناوچه‌گه‌ وجوود دیرید، ئمجا مالكى نه‌ف وه‌رگرت له‌ هساو تاڵه‌بانى له‌وه‌ر خاتر قورتاركردن خوه‌ى له‌ ده‌نگ ناڕه‌زایى له‌ په‌رله‌مان. وه‌لى دیاره‌ ئاڵشتكارییگ له‌و بازیه‌ رویدا ك ئه‌ویش فشار وه‌رده‌وام ته‌هران بوى له‌بان حكوومه‌ت عراقى له‌وه‌ر خاتر مه‌ندنه‌وه‌ى له‌ژیر سایه‌ى ستراتیجیه‌ت ئیرانى له‌ ناوچه‌گه‌.

 

راسه‌ مالكى سه‌رۆكایه‌تى حزبیگ ئایدۆلۆجى مه‌زه‌وى ئه‌كاو خوه‌ى له‌بان ئى بنه‌ما بته‌و كرد، وه‌لى یه‌یش ماناى نوێنه‌رایه‌تیكردن گشت شیعه‌ نیه‌و لایه‌نیلیگ شیعه‌ هه‌ن ركابه‌رى وه‌لیان كه‌ن له‌و نوێنه‌رایه‌تیه‌و ده‌سكرده‌ روى وه‌ڕوى بوینه‌وه‌ى دو سه‌ركرده‌ ك هه‌ردوگیان سه‌ر وه‌ بنه‌ماڵه‌یگ دینى كویه‌نن جوور بنه‌ماڵه‌ى سه‌در و بنه‌ماڵه‌ى حه‌كیم جوور گه‌ردین له‌شوون شه‌رعیه‌تییگ دینى تازه‌، دى باڵكیشانى له‌بان ده‌سڵات له‌وه‌ر خاتر كیشانن مه‌یل مه‌ردم له‌ لایگ و پشت به‌سانن وه‌ هیز هه‌قه‌وكردن له‌ نه‌یاره‌یلى له‌لایگ تره‌و بوى و هه‌ر یه‌یش له‌یوا كرد دیكتاتۆریه‌ت باریده‌ كار و روى وه‌ڕوى گشت پیكهاته‌یل عراقى بویه‌و.

 

هه‌ر له‌وه‌ر ئه‌وه‌یش داواكارى و خودنیشانداینه‌یل ئیسه‌ دید تازه‌یگ گرته‌سه‌ خوه‌ى و له‌ یوا هویره‌و كه‌ن گشت لایه‌نه‌یل زه‌ره‌دمه‌ن سیاسه‌ت مالكى بوینه‌و له‌وانه‌یش لایه‌ن سونى ك زه‌ره‌د گه‌وراتر وه‌پیان ره‌سیه‌ له‌ چوارچیوه‌ى ئه‌و سیاسه‌ته‌.

 

ئنجا له‌ساى نیمچه‌ گرده‌وبوین مه‌ردم عراق دژ وه‌ حكوومه‌ت ئیسه‌و سیاسه‌ته‌یلى، بایه‌سه‌ له‌بان ته‌هران یا ئه‌وه‌سه‌ په‌یوه‌س بوود وه‌ مالكى ك دڵسووز بوى ئه‌ڕاى، یا بایه‌سه‌ مینه‌ى  قورتاربوین بكاو ستراتیجیه‌تى ئاڵشت بكا له‌ڕى چاره‌سه‌ر گونجیاگ ئه‌را بنبڕكردن كیشه‌یل و له‌ناوبردن قه‌یرانه‌یل .

 

وه‌ل ئه‌وه‌یشا هه‌رچه‌نى قه‌یران ئیسه‌ په‌یوه‌س كریا مالكیه‌و، وه‌لى له‌ بنه‌ڕه‌ته‌و په‌یوه‌سه‌ وه‌ چوینیه‌تى مامڵه‌كردن وه‌ل پرووسه‌ى سیاسى له‌ عراق، ك له‌تى ئاره‌زوو وه‌ ده‌سهاوردن هه‌قه‌یل كریا وه‌ یه‌كسانى ئه‌را گشت پیكهاته‌یل ناونى دوچه‌مان وه‌بى فه‌رامووشكردن و دویره‌وخستن هویچ لایه‌ن و پیكهاته‌یگ له‌چوارچیوه‌ى سیاسه‌ت مالكى، ئنجا ئه‌گه‌ر تویه‌نست له‌ى قه‌یرانه‌ قورتار بوود، ئه‌وه‌ تویه‌نید بایده‌و ئه‌را ناوه‌ڕووك ئى پرووسه‌و هه‌ڵوژاردنه‌یل ئاینده‌ گوزارشیگ راسكانى بوود، وه‌لى له‌یوا دیاره‌ ئى قه‌یرانه‌ ك هه‌رچه‌نى كه‌میگیش له‌لى چاره‌سه‌ر بكریه‌ید له‌ژیر كاریگه‌رى جاده‌ى عراقى و كه‌میگ له‌و زوڵمه‌ لاوریه‌ید ك زه‌ره‌د ره‌سانه‌ مه‌ردم له‌ژیر ساى ده‌زگایه‌یل مالكى، وه‌لى هه‌ر قورتاربوین عراق سته‌مه‌.

 

عه‌بدوڵڵا ئه‌سكه‌نده‌ر

ج . أ