سیاسەت ‮نەفت‮ ‬حكوومەت هەرێم ‮كوردستان‮ ‬

شفق نيوز

 

ئه‌وه‌ك ديار و ئاشكراس ئه‌وه‌سه‌ ك ده‌ستوور عراقی ده‌سڵات ته‌ماميگ داسه‌ هه‌رێم كوردستان له‌ شيواز مامڵه‌ وه‌پيكردن حكوومه‌ت وه‌ داهات سه‌رچه‌وه‌يل هه‌رێم و ئاماژه‌ وه‌ ئه‌وه‌يش ئه‌كا ك نه‌فت و سامانه‌يل موڵك گشت عراقيه‌يلن و وه‌گووره‌ی ده‌ستووريش هه‌رێم كوردستان هه‌ق ئه‌وه‌ ديريد كاره‌يل"كلكردن و هاوردن"وه‌و داهات سامانه‌يله‌ بكا ك له‌هه‌رێم كوردستان هه‌ن.

وه‌لی هه‌ميشه‌ ك چوين زويتر له‌ به‌غدا هس وه‌ ئه‌وه‌ كرديان ك ده‌ستوور عراق تازه‌ لامه‌ركه‌زيه‌و ئه‌قڵيه‌ت شۆفێنی لامه‌ركه‌زی قه‌بول ناكاو هويچ ريزيگ ئه‌را ئه‌و ريككه‌فتن و هاوبه‌شيه‌يل راسكانيه‌ نيه‌ ك ده‌وڵه‌ت تازه‌ی عراقی له‌شوون ٢٠٠٣ له‌بانی دامه‌زرياگه‌و ٨٠% مه‌ردمه‌گه‌ی ده‌نگ ئه‌را ده‌ستووره‌گه‌ی داگه‌، دی نوڕيد هه‌رێميش هه‌ق ئه‌وه ديريد وه‌ سه‌روه‌خوه‌يی مامڵه‌ وه‌و داهات نه‌فته‌ بكا، وه‌لی له‌يرا ئه‌وه‌ك مايه‌ی ئاماژه‌كردنه‌ ئه‌وه‌سه‌ حكوومه‌ت هه‌رێم گشت به‌نده‌يل ده‌ستوور له‌باوه‌ت چوينيه‌تی دراوردن و فروشتنه‌وه‌ی جيوه‌جيكرد و حكوومه‌ت عراقيش خاس ئاگادارن له‌ی مه‌سه‌له‌، وه‌لی ئيچنه‌ ره‌فتاره‌يله‌ فيشتر موور سياسی وه‌پيه‌و دياره‌و به‌ڵگه‌يش ئه‌را ئه‌وه‌ ئاشكراس ك دو خول په‌رله‌مان عراق ته‌مام بوی، وه‌لی تائيسه‌ لايه‌نه‌يل شوفێنیبوينه‌سه‌ ريگر له‌بان ده‌رچگن ياسايگ ئه‌را نه‌فت و غاز تا هه‌ميشه‌ ئی باوه‌ت گرينگ ونازگه‌ جوور كارت فشار بارنه‌ كار دژ هه‌رێم كوردستان.

به‌نده‌يل ده‌ستوور له‌باوه‌ت ئی مه‌سه‌له‌ ئاشكراو دياره‌ ك گشت مافه‌يل هه‌رێم له‌تی دياری كردگه‌و به‌ڵگه‌يش ئه‌را ئه‌وه‌ هاتن ئه‌و هه‌مگه‌ كومپانيايه‌يل ناودار جه‌هانيه‌سه‌ ك له‌بوار نه‌فت كار ئه‌كه‌ن و كار وه‌به‌رهاوردن له‌ی بواره‌ ئه‌نجام ئه‌يه‌ن له‌ هه‌رێم و گشت ئه‌و كومپانيايه‌يليشه‌ چه‌نه‌ها ساڵه‌ له‌ چه‌نه‌ها وڵاته‌ جياوازه‌و هاتنه‌و كار وه‌به‌رهاوردن ئه‌كه‌ن، هه‌ر وه‌و خاتريشه شاره‌زايی ته‌ماميگ ديرن ك ده‌ستوور عراق ڕی داسه‌ هه‌ريم ئه‌را ئی مه‌سه‌له‌.‌

ئمجا ئه‌گه‌ر له‌ حاڵه‌تيگ ده‌ستوور عراق ريگر بوود، ئه‌وه‌ بيگومان ئه‌و كومپانيايه‌يله‌ ئاماده‌ نيه‌ون ك هاوكار و به‌شدار بوون له‌ چوينيه‌تی وه‌بازاڕكردن نه‌فت هه‌رێم كوردستان وه‌بی ئه‌وه‌ك گله‌و بخوه‌يد ئه‌را ناوه‌ند و مامڵه‌ی راسه‌وخۆيش ئه‌كه‌ن وه‌ل حكوومه‌ت هه‌رێم، هه‌ر له‌وه‌ر ئه‌وه‌يش ئه‌وانه‌ گشتی به‌ڵگه‌يل حاشا هه‌ڵنه‌گرن ك ده‌ستوور عراق هه‌ق مامڵه‌كردن ته‌ماميگ داسه‌ هه‌رێم كوردستان ئه‌را وه‌به‌رهاوردن بوار نه‌فت و سامانه‌يل و كاردانه‌وه‌ی ده‌وڵه‌ت عراقيش ته‌نيا خوه‌ی له‌ خانه‌ی سياسی دوينيده‌و.

سه‌روه‌ر ئه‌رگوشی

ج . أ