مناڵ خاسه‌ یا ده‌وڵه‌مه‌نى!؟

شفق نيوز

 

له‌ى حاڵه‌ته‌ ته‌نیا ئیمانداره‌یل و ئه‌وانه‌ك باوه‌ڕ ته‌واو دیرن وه‌ كرده‌وه‌یل خودا دڵنیان له‌وه‌ك خودا هویچ وه‌ختیگ به‌نه‌ى خوه‌ى له‌ هویر نیه‌وه‌یدو له‌ناو "زگ نه‌هه‌نگیش" بوود رزق رووزى خوه‌ى وه‌پى ره‌سنید، ماناى ئه‌وه‌سه‌ نه‌بایه‌د هویچ ئاده‌میزادیگ گومان له‌ سووز و به‌زه‌یى ئى په‌روه‌ردگاره‌ داشتوود، چوینكه‌ گشت دروسكریاگیگ وه‌ رزق و رووزى خودا ژیه‌ید، وه‌لى وه‌ل ئه‌وه‌یشا هه‌وڵ و دانایى و جارجاریش شه‌كه‌تى و په‌یكردن له‌شوون كاریگ خاستر و گونجیاگتر هه‌ق گشت ئاده‌میزادیگه‌و ئه‌تویه‌نید ژیانیگ خاستر و خوه‌شتر وه‌پى دابین بكا.

له‌یرا دو نعمه‌ت خودایى هه‌س، ك گشت ئاده‌میزادیگ وه‌ ئه‌زره‌تن ئه‌راى، ك ئه‌ویش" ماڵ و مناڵ"ه‌و كاریگه‌رى فریه‌یگ دیرید له‌ ژیان و مه‌ردمیش هه‌میشه‌ هه‌وڵ په‌یاكردنى ده‌ن تا بتویه‌نن له‌ساى هه‌ردوگیان هه‌ناسه‌ى ئوخه‌ى هه‌ڵكیشن.

ئمڕوو له‌ى دونیا ددوینیم كه‌سه‌یل فریه‌یگ هه‌ن ناز وه‌بان ماڵ و موڵك و دارایى ئه‌كه‌ن و كه‌سه‌یلیگیش هه‌ن خوه‌شاڵن وه‌ مناڵه‌یلیان وه‌بى ئه‌وه‌ك دارایى خاسیگ داشتوون، وه‌لى ئاقڵ و دانا ئه‌وه‌سه‌ ماناى وه‌رپرسیارێتى بزانیدو بتویه‌نید چوین بڕه‌سیده‌ ئه‌و باوه‌ڕه‌ ك ئى دونیا تاقیگاى ئاده‌میزاده‌و فره‌جار له‌تى باج قورس دریه‌یدو بایه‌سه‌ پابه‌ند بوید ره‌فتاركردن وه‌و به‌شه‌ ك ئه‌راد دیارى كریاگه‌ وه‌ خه‌یر و خاسسازى و دویر له‌ حه‌سره‌ت كاڵ و هویچ هه‌وڵ ئه‌وه‌ نه‌یه‌ید ئومید له‌ خودا بووڕید.

راسه‌ ده‌وڵه‌مه‌نى خوه‌شه‌و نه‌وه‌یل ئاده‌م وه‌ دریژایى ژیان هه‌وڵ رزق و رووزى فیشتر دانه‌و له‌ هه‌مان وه‌خت ماڵ و مناڵیش وه‌ خواست گه‌وراى ژیان ته‌ماشا كردنه‌، وه‌لى وه‌ل ئه‌وه‌یشا هه‌ر یه‌كیگ له‌ى دو چشته‌ خه‌یر و شه‌ڕیش دیرن. هه‌ر له‌وه‌ر ئه‌وه‌یش ئویشیم ماڵ و موڵك و دارایى تیه‌ید و چوود، وه‌لى مناڵ وه‌ پویل ناسینیه‌یدو نه‌وه‌ى خاس و خه‌یرومه‌نیش سه‌رچه‌وه‌ى خوه‌شبه‌ختى و خوه‌شاڵیه‌.

ره‌نجده‌ر ئاواره‌

ج . أ