ده‌سه‌یل نادیاریگ مه‌مه‌ر به‌رهه‌مه‌یل ڕووژنامه‌نویسى هه‌رێم شیونن

شفق نيوز

كوردستان پیشكه‌شى كردنه‌ لوجنه‌ى په‌یوه‌ندیه‌یل ڕووشنهویرى له‌ په‌رله‌مان، و له‌تى داواكردن ك حكوومه‌ت كوردستان وه‌ڕیگه‌ى وه‌زاره‌ت ئه‌وقافه‌وه‌ وتار یا خوتبه‌یل نماز جومعه‌ ئاماده‌ بكه‌ید و به‌شه‌و بكریه‌یده‌ بان ئیمام و خوتبه‌خوه‌نه‌یل، و یه‌یشه‌ بویه‌ مایه‌ى تویڕه‌ بوین شماره‌یگ له‌ پیاوه‌یل دینى و وتارخوه‌نه‌یل.

له‌ى باوه‌ته‌ دكتۆر بشیر خلیل حداد سه‌رۆك لوجنه‌ى ئه‌وقاف له‌ په‌رله‌مان كوردستان له‌ په‌یوه‌ندییگى وه‌ل ماڵپه‌ڕ شه‌فه‌ق ئه‌وه‌ ڕه‌ته‌وكرد ك:"ئیجووره‌ یاداشتنامه‌یگ  له‌ لایه‌ن هه‌ردوگ فراكسیۆن هاوپه‌یمانى كوردستانى و گۆڕان ئه‌را لوجنه‌گه‌ى به‌رزه‌و كریاوید، به‌ڵكوو شماره‌یگ ئه‌ندام په‌رله‌مان و ڕووشنهویر و هونه‌رمه‌ند و ئه‌و ئه‌ندام په‌رله‌مانه‌یله‌ گوزارش له‌ ڕاى خوه‌یان كردنه‌، ئى یاداشتنامه‌ پیشكه‌شكردنه‌، نه‌ك فراكسیۆنه‌یل په‌رله‌مانى".

زیاتریش وت:" ئى یاداشتنامه‌ وه‌شیوه‌بگ ڕه‌سمى نه‌ڕه‌سیه‌سه‌ ده‌س لوجنه‌ى ئه‌وقاف".

له‌بان ئه‌وه‌یشه‌ ته‌ئكیدكرد ك :"لوجنه‌گه‌ تویه‌نید ئى یاداشتنامه‌ جوور پرۆژه‌ بڕیاریگ پیشكه‌ش بكریه‌ید تا ده‌نگ بدریه‌یده‌ پى و له‌لایه‌ن سه‌رۆكایه‌تى په‌رله‌مان به‌رقه‌رار بكریه‌یدئه‌را وه‌شوونكه‌فتن یا متابعه‌ى داواكاریه‌گانى".

حداد "داواكاریه‌یل ناو ئى یاداشتنامه‌ وه‌ ناواقعى و چه‌واشه‌ى قانوون و بنه‌مایه‌یل شه‌رع ئسلامى و ئازادى گوزارش كردن له‌ ڕا" وه‌سفكرد.

له‌لاى خوه‌یه‌و ئه‌ندام په‌رله‌مان كوردستان و سه‌رۆك لوجنه‌ى په‌یوه‌ندى و ڕووشنهویرى ئاسۆ كریم له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى:" یاداشتنامه‌گه‌ چه‌ن پیشنیار و هویریگ هاتى ئه‌را هاماركردن یا تعدیل بڕیگ قانوون په‌یوه‌س وه‌ ڕیكخستن ئازادیه‌گان و له‌وانه‌یش ئازادى ڕاده‌ربڕین".

زیاتریش وت:" یه‌كیگ له‌و داواكاریه‌یله‌ ئه‌وه‌سه‌ ك سێ وتارخوه‌ن دیارى بكریه‌ن ئه‌را هه‌ریه‌ك له‌ سێ شاره‌گه‌ى هه‌رێم كوردستان".

ئه‌وه‌یشه‌ ڕووشنه‌وكرد ك :" گرژى فره‌یگ كه‌فتیه‌سه‌ ناوبه‌ین ئمام و وتارخوه‌نه‌یل وه‌ل بژارده‌یل ڕووشنهویرى له‌ هه‌رێم له‌باوه‌ت بڕیگ كار داهێنان یا ئبداعى جوور وتار ڕووژنامه‌نویسى و شاكاره‌یل هونه‌رى و زاراوه‌یل قانوونى جوور زاراوه‌ (جینده‌ر)".

ئاسۆ كه‌ریم زیاتریش وت :" قه‌یریگ شیه‌وكردن غه‌ڵه‌ت هه‌س ئه‌را ده‌قه‌یل ئه‌ده‌بى، و مه‌عنایه‌یل و ناوه‌ڕۆكه‌یل نادروسیگ نه‌نه‌پاڵ ئه‌و زاراوه‌یله‌ ك له‌ قانوون هاتنه‌"؛ له‌ ئاماژه‌یگ ئه‌را ئه‌و زانا و وتارخوه‌نه‌یله‌ ك ڕه‌خنه‌ یا ئنتقاد له‌ وتار و كاره‌یل هونه‌رى و زاراوه‌یل قانوونى گرن له‌ وتاره‌یل جومعه‌.

ئاماژه‌یش وه‌وه‌دا ك :" كه‌سه‌یل ناپسپۆر له‌ بوار ئه‌ده‌ب و هونه‌ر هه‌ق نه‌یرن ده‌قه‌یل ئه‌ده‌بى و مه‌سه‌له‌یل داهێنان شیه‌وبكه‌ن".

باس ئه‌وه‌یشه‌كرد ك:"ده‌سه‌یل نادیاریگ هه‌س پاڵ نه‌نه‌ ئمام مزگفت و وتارخوه‌نه‌یل ئه‌را شیه‌وكردن نادروس وتاره‌یل و نویساننه‌یل ڕووژنامه‌نویسى و به‌خشین مه‌عنایه‌یل و ناوه‌ڕۆكه‌یل نادروسیگ وه‌ چه‌ن زاراوه‌یگ".

شایان باسه‌ ك فراكسیۆن یه‌كگرتوو ئسلامى له‌ هه‌رێم كوردستان ئى یاداشتنامه‌ مه‌حكووم كرد و هه‌ڕه‌شه‌دا دژى بووسیه‌ید ئه‌گه‌ر خریا وه‌ر تاوتوێكردن له‌ ژیر گومه‌زى په‌رله‌مان هه‌رێم.