غه‌در و خيانه‌ت

شفق نيوز

ئيمه‌ باوه‌ڕمان ئه‌وه‌ بوی سنی عه‌ره‌ب له‌وه‌ر مه‌سه‌له‌ی مه‌زه‌وی شايه‌ت وه‌ل كوردا خاستر بوون وه‌گووره‌ی بڕيگ هوير وڕا، وه‌لی راسی چه‌واشه‌گه‌ی نيشانمان دا، وتايبه‌ت له‌ شه‌نگاڵ و ده‌ورگردی.

ئه‌يانه‌ له‌ناكاو ئه‌ڕامان ده‌ركه‌فتن ك جی داخه‌ ئه‌را چه‌نه‌ها جاره‌ ك هه‌ر هه‌ليگ بكه‌فيده‌ ده‌سيان دی دريغی ناكه‌ن له‌ غه‌د رو خيانه‌ت له‌ ملله‌ته‌گه‌مان و جوور دوشمن ره‌فتار ئه‌كه‌ن و دروشم تاڵانی و قڕكردن كورد به‌رزه‌و ئه‌كه‌ن و به‌شداری په‌لاماره‌يل ئه‌كه‌ن ئه‌را بان ملله‌ته‌گه‌مان و ره‌فتاريان مانای ئه‌وه‌سه‌ ك هه‌ميشه‌ له‌ كه‌مين بوون ئه‌رامان و هه‌ر ده‌رفه‌تيگ بكه‌فيده‌ چنگيان ئه‌را دوشمنايه‌تی ئيمه‌ له‌كيش خوه‌يانه‌ نه‌يه‌نه‌ی.

وه‌ گووره‌ی به‌ڵگه‌نامه‌يل مێژوويی، ئه‌و ناوچه‌يله‌ ك ئيسه‌ عه‌ره‌بنشين كريانه‌، گشتی خاك كورد بويه‌و له‌ئاكام ته‌عريب و جيوازكردن زووره‌ملی وه‌ عه‌ره‌ب كريانه‌، وه‌نا ئه‌و ناوچه‌يله‌ گشتی ناوچه‌يل كوردستانيين وهه‌ر له‌وه‌ر ئه‌وه‌يش ئه‌وان هه‌ميشه‌ جوور داگيركه‌ر ره‌فتار ئه‌كه‌ن، ئمجا به‌ڵگه‌يل ته‌نانه‌ت باس خود شار موسڵيش ئه‌كه‌ن ك شماره‌ی عه‌ره‌ب له‌و شاره‌ وه‌رجه‌ چه‌ن سه‌د ساڵيگ وه‌ په‌نجه‌ی ده‌س شماريانه‌.

سه‌رۆك هووز و سياسه‌تمه‌داره‌يل سنی، زوورميان تا ئيسه‌ فريه‌ بی هه‌ڵويست و بی ده‌نگن له‌باوه‌ت به‌شداريكردن ئه‌و عه‌ره‌به‌يل سنيه‌ ئه‌را بان كوردستان، ئه‌وان جوور ساڵح موتڵه‌گ هويره‌و ئه‌كه‌ن، ك ئيسه‌ ته‌نيا له‌خه‌م ئه‌وه‌سه‌ كه‌ی هيز پێشمه‌رگه‌ی كوردستان له‌ ناوچه‌يل كوردستانی ده‌يشت هه‌رێم خوه‌يان ئه‌كيشنه‌و، يه‌يش له‌وه‌ختيگ ئی كابرا هويچ قسه‌يگ له‌باوه‌ت داگيركاری داعشه‌يل ناكا ك ده‌س گرته‌سه‌ بان چه‌نه‌ها شار عراقی و ته‌نيا هه‌ر باس ناوچه‌يل كوردنشين ئه‌كه‌ن. ئه‌يانه‌ وه‌ راده‌يگ دوشمنايه‌تی كورد ئه‌كه‌ن ك ئيسه‌ وه‌پيان خوه‌شه‌ ئه‌و ناوچه‌يله‌ له‌ژير ده‌س داعش بوياتان نه‌ك پێشمه‌رگه‌ی كوردستان.

ئمجا نازانيم كه‌ی ئه‌يانه‌ فيره‌ی وه‌يه‌كه‌وژيان و هاوسايه‌تی و ريز ئيراده‌ی وه‌رانوه‌ر ئه‌دوون وه‌ی ئه‌قليه‌ت ئيسه‌يانه‌و چه‌وه‌ڕی هويچ كاريگ خاس له‌يانه‌ ماكريه‌يد و دی وه‌خت ئه‌وه‌يش هاتگه‌ كورديش ته‌ماشای ئی بار تازه‌ وه‌ چه‌ويگ تره‌و بكا، چوينكه‌ فريه‌ وه‌ شان وباڵ ئی برايه‌تيه‌ وتيم، وه‌لی واقع چه‌واشه‌گه‌ی چه‌سپان.

سه‌لام عه‌بدوڵڵا

ج . أ