ئه‌را ميديايل كورد له‌ سه‌ر هه‌ڕه‌شه‌ى به‌سين راديۆ شه‌فه‌ق بێده‌نگن!؟

شفق نيوز

ئيزگه‌ى ده‌نگ كورد له‌ به‌غدا(راديۆ شه‌فه‌ق) كل كرديه‌و موڵه‌تێ ئه‌را به‌سين ئه‌ى ئيزگه‌ى ده‌نگ كورديه‌ ديارى كرديه‌، هه‌رچه‌ن نامه‌گه‌ دوياى موڵه‌ت ديارى كريا دريا وه‌ ئه‌ى ده‌زگاو خاس دياره‌ ئارمانج له‌ى كار چه‌سه‌!؟.

 

ئمجا يه‌ گشتێ له‌ جى خوه‌ى و له‌ راپۆرته‌يل ماڵپه‌ڕ شه‌فق نيوز ته‌مام بڵاو بوينه‌و دى ناخوازم له‌ى باسه‌ بگونجنمه‌ى. وه‌لى ئه‌وه‌گ سه‌رم وه‌ پێ سڕ مه‌نيه‌ يه‌سه‌، ئه‌ى ميديايل كوردى ئيمه‌ ك كه‌ناڵه‌يل ئاسمانى دێرن ك ئه‌گه‌ر كه‌سێ كلگ بكه‌يده‌ لويه‌ته‌و له‌ خه‌وه‌ره‌يل خوه‌يان تيه‌رنه‌ى!. ئيرنگه‌ ئه‌ى كه‌ناڵه‌يل ئاسمانيه‌ دى جياوازى ئه‌و قه‌ره‌ له‌ ناونى حزبى بوين و ئوپۆزيسيۆن و  خوه‌ماڵى نه‌منيه‌و ئه‌وگ دياره‌ گشتيان وه‌ل يه‌كا هه‌ قسيه‌ى يه‌ك تر جان، له‌ لام فره‌ سه‌يره‌ ك يانه‌ ئه‌را رخته‌ى‌ قه‌سه‌م باس له‌ سه‌ر به‌سين ته‌نيا ده‌نگ كورد له‌ ده‌يشت هه‌رێم، ئه‌وه‌يشه‌ له‌ پايته‌خت عيراق ئه‌رايان گرنگى نه‌يرێدو چمانێ ئه‌ى ده‌زگاو ئيزگا هه‌ كوردى نين هويچ، چوى يه‌منێد ئيمه‌ هايمه‌ كشورێ تر بێجگه‌ له‌ ئاسياو له‌ى سه‌رده‌م ره‌ساننه‌ ك هاڵوخه‌وه‌رى له‌ جه‌مسه‌ره‌ باكوور روى ئه‌دا روى ئه‌دێ، له‌ ئه‌ى جه‌مسه‌ره‌گه‌ وه‌ زوى زوى بڵاو ئه‌دێ هويچ، ته‌مام جه‌هان گريده‌وه‌ر، ئايا ئه‌دێ خوه‌مان به‌يم له‌و ڕيگه‌و بويشيمن ‌يانه‌ خه‌وه‌ر له‌ ئه‌ى ده‌نگه‌ نه‌يرن و ئه‌را يه‌سه‌ ك هه‌ ناوێ نايرن!.

وه‌لى م يه‌ باوه‌ڕ نيه‌كم، چوين ك هه‌ركه‌س بنوڕيده‌ ئه‌ى كه‌ناڵه‌يله‌، خاس ئه‌راى ئاشكرا ئه‌دێ ك يانه‌ له‌ گه‌ن و خاس كه‌نه‌ يه‌كا، ته‌نانه‌ت ئه‌گه‌ر مناڵ كوردێگ ك باشوور كوردستان نومره‌ى كه‌م بوود له‌ پشت مايكه‌يل ئه‌ كه‌ناڵه‌يله‌ داواى خوه‌ى ئه‌يرێد زووان و ئويشێد: داوا له‌ حكومه‌ت هه‌رێم كوردستان كه‌م تا كارێ بكا، مامۆستاگه‌م نۆمره‌ به‌يده‌ پيم تا قه‌بول بووم!.

ئمجا وه‌‌ به‌شه‌يل خه‌وه‌رى ئه‌ى كه‌ناڵه‌يل بنوڕيم، مه‌ل له‌ ئاسمان له‌ ژێرده‌سيان ده‌ر نيه‌چوودو له‌ چوارسويك جه‌هان خه‌وه‌ر ئه‌ڵه‌جو به‌ڵه‌ج هاوردنه‌و بڵاو ئه‌كه‌ن‌. ئيرنگه‌ ئه‌ى پرسياره‌ له‌ لام دروس بويه‌، ئايا هه‌ڕه‌شه‌ى به‌سين ده‌نگ كوردستانى بوين ئه‌ى ئيزگه‌، چنه‌ هويچ كام له‌و خه‌وه‌ريله‌ گرنگێ نه‌يرێد!.

ئايا مه‌مه‌ر ئه‌ى بڵاو نه‌كردنه‌ وه‌ يه‌ هه‌ڵه‌وئه‌گه‌ردێ ك ئه‌ى ده‌زگا هن كورديه‌يل فه‌يلى كوردستانيه‌!.

ئايا ئه‌ى كه‌ناڵه‌يله‌ له‌ دولايه‌ن ده‌سڵات و ئوپۆزيسيۆن، هناى باس له‌ نه‌ته‌وه‌ كه‌ن، باسيان نادێ وه‌‌ قسيه‌يل بريق باقێ ك ته‌نيا توان وه‌پێ به‌نج به‌ين له‌ ئه‌و دوياى كورده‌يل ك هان له‌ ده‌يشت هه‌رێم كوردستان وه‌ تايبه‌ت كورده‌يل نيشته‌جى به‌غدا ك كوردفه‌يلين!.

ئايا ئيرنگه‌ ئيمه‌ى كورد له‌ى سه‌رده‌مه‌ ك راگه‌ياندن وه‌ تايبه‌ت ميديا ڕۆڵ يه‌كم له‌ ره‌سانن گرتنه‌سه‌و مل، ئه‌را وه‌ده‌س خسن ئه‌ى كه‌ناڵه‌يله‌ چه‌نێ خوين دايمه‌و ته‌قلا كرديم تا بتويه‌نيم ده‌نگ خوه‌مان وه‌پيان بره‌سنيمه‌ ته‌مام جه‌هان و هاوار بێ كه‌سى و قوروانى بوين خوه‌مان ئه‌رايان بويشيم، ئيسه‌ ك يانه‌ وه‌ ده‌س هاورديمه‌ دى ئه‌را خوه‌مان چوى كورد، تويش سانسۆر كردنێ بويمه‌ ك وێنه له‌ هويچ وڵاتێ‌ هه‌ نيه‌.

ئه‌وه‌گ دوينم يه‌سه‌ ك راگه‌ياند ئيمه‌ له‌ كوردستان وه‌ره‌ جى تيه‌رێكێ ئه‌چێ  ك نه‌ به‌رنامه‌ى ديرێدو نه ‌وه‌ ئه‌ساس ئستراتيژى راگه‌ياندن كار ئه‌كا.

ئه‌ى باسه‌ كتاو ره‌سمى وه‌زارت ژينگه‌ ئه‌را به‌سين ئيزگه‌ى راديۆ شه‌فه‌ق ك وه‌ ته‌مامى دياره‌ ئارمانج سياسى ها له‌ پشتێ و يه‌ ناناسێد ئيمه‌ له‌ ناو كوردستان ئوپۆزيسيۆن و حكومه‌ت حزب ده‌سڵاتدار ديريمن و ئه‌وانه‌ ك ئه‌ى كاره‌ كردنه‌ كوردو كوردستانى كردنه‌سه‌ ئارمانج و ئه‌ى كێشه‌ وه‌ ته‌مامى په‌يوه‌ندى وه‌ هه‌ر كورد و كوردستانى ديرێد.

وه‌ ئه‌ساس قسيه‌ى كارناسه‌يل، شه‌پۆل(FM) هويچ كارگه‌رى له‌ بان ته‌ندورستى نه‌يرێد، ئه‌را نه‌بايد له‌‌ ناو ميديايل كوردى ده‌نگه‌و به‌يدو له‌ سه‌رێ باسه‌ بكريه‌يد تا ته‌مام كوردستانيه‌يل بزانن، تاوان كورد بوين ئه‌ى ئيزگه‌، بويه‌سه‌ مه‌مه‌ر يه‌گ ئيچنه‌ هه‌ڕه‌شه‌ى ئه‌را به‌سينێ له‌لێ بكريه‌يد.

ئايا ئيرنگه‌ ك باس و وڕويمێ ها له‌ ناو گشتمان ك توايم بويمنه‌ خاوه‌ن سه‌روه‌خوه‌يى، ئايا سه‌روه‌خوه‌يى ئه‌را ته‌مام كورده‌ يا ته‌نيا ئه‌را سێ پارێزگاس.

ئايا له‌ وه‌رايوه‌ر ئيچنه‌ كاره‌يلێ ك وه‌ سه‌ر كورد ئه‌ياد، بايه‌د بويشيم چوين يانه‌ هان له‌ ده‌يشت هه‌رێم كوردستان، وه‌ ئيمه‌ چه‌و بيلا هه‌نه‌ودان!.

دياره‌ ميديايل ئيمه‌ له‌ كوردستان وه‌ گشتێ تويش قه‌يرانێ ئانارشيستى و په‌رته‌وازه‌ بوين بوينه‌و هه‌ر كه‌س ئه‌را خوه‌ى سه‌رێ وه‌ جياس هويچ، ئه‌رك و وێژدان ره‌ساننيش له‌لايان بايه‌ بوريه‌يده‌ ژێرپرسيار و وه‌ تونديش ره‌خنه‌ له‌ليان بگريه‌يد.

شورش شاواز