ئەوەگ پیاو کورد وه‌پی نەکريا، ژنه‌يل ئەنجامی ئه‌يه‌ن؟

شفق نيوز

كۆنگره‌ى نه‌ته‌وه‌يى كورد خسه‌و هويرم ك چاره‌نويسێ چوى فره‌ باوه‌ت گرنگ تر كورد هه‌ئيچنه‌ بێ ناونيشان مه‌نيه‌.

 

كۆنگره‌ى نه‌ته‌وه‌يى كورد ك هه‌ ئيسه‌يش ها له‌ سه‌ر زووان و نه‌چيه‌سه‌ بوار جێوه‌جێ بوين، چه‌ن ساڵه‌ ئه‌ى مه‌سه‌ڵه‌و ئه‌گه‌ر به‌سينێ و نه‌وه‌سين و به‌شداربوين و به‌شدارنه‌وين لايه‌نه‌يل باس ئه‌كريه‌يد، ماوه‌ى باسه‌گه‌ى گه‌رموگوڕه‌و ماوه‌يگيش كه‌په‌و ئه‌دێ، وه‌لى له‌ بان ئه‌رز واقيع، نه‌يمنه‌ ك ئه‌ى قسيه‌يله‌ پراكتيزه‌ بكريه‌ن و گامێ جددى له‌ باره‌يه‌و ئه‌ڵگريه‌يد، ئه‌گه‌ر به‌شێ له‌ مه‌مه‌ره‌يل نه‌وه‌سين كۆنگره‌ى نه‌ته‌وه‌يى له‌ى جووريشه‌ ده‌س ده‌ره‌كى له‌تێ بوود، يه‌ بێگومان به‌شێگ له‌لێ ها له‌مل كورد خوه‌ى، وه‌ى مانا: ئيمه‌ خوه‌مان فره‌ بايخ وه‌ يه‌ نيه‌يمن تا ناو ماڵ خوه‌مان گرده‌و بكه‌يم.

به‌سين كۆنگره‌ى ئيچنه‌، يانێ وه‌ ره‌سمى كۆوه‌و بوين و به‌سين كورده‌يل پارچه‌يل تر وه‌ ئه‌ساس ئه‌وه‌گ قه‌راره‌ ته‌مام به‌شه‌يل تر كوردستان، پارت و لايه‌نه‌يل سياسى و كه‌سايه‌ته‌يه‌يل له‌تێ به‌شدارى بكه‌ن، ئه‌ياد.

له‌ كۆوه‌و بوينێ ئيچنه‌، وه‌سه‌ر يه‌ ك ئاشناو بويمن وه‌ ناسنامه‌و قه‌واره‌ى ملله‌ت كورد، كۆمه‌ى ده‌سكه‌فت تر مه‌عنه‌ويش وه‌ دى ئه‌ياد ك ته‌ماميان هه‌يبه‌ت و قورسى كورد له‌ ناو ناوچه‌گه‌و  جه‌هان فێشتره‌و ئه‌كا. چوين ك له‌تێ، قسيه‌و ئه‌راچينه‌يل تازه‌ى ده‌سه‌جه‌معى كورد له‌ بان مه‌رج ئمڕوو ئێژيه‌يدو ئه‌دێ وه‌ به‌ڵگه‌و له‌ لويشێ، هه‌ر به‌شێ له‌ كوردستان وه‌ دڵنياييه‌و باره‌دوخ و مه‌رج تايبه‌ت وه‌خوه‌ى ديرێد، خوه‌نين جياوه‌جياى ئه‌راى ئه‌كريه‌يدو وه‌ل ئه‌وه‌يا ك پشتێوانى برايانه‌ له‌ يه‌ك، له‌تێ بته‌وتره‌و ئه‌دێ.

سووده‌يل كۆنگره‌ى نه‌ته‌وه‌يى كورد فره‌ن، شايه‌د له‌ێره‌ نه‌تويه‌نيم هه‌ق خوه‌يان به‌يمه‌ پێان.

ئه‌گه‌ر بنوڕيمه‌ كۆنفرانس ئيجاره‌ى ژنه‌يل يا ئه‌وه‌گ نواى‌ يه‌ به‌سرياو دوساڵ پێش له‌ دياربه‌كر كريا، ئه‌و به‌شداربوين فره‌ى نۆينه‌ره‌يل ژن كورده‌ له‌ هه‌ر چوارپارچه‌و ئه‌مريكاو ئه‌ورووپاو بڕێ وڵاته‌يل تر ديمن، ئاوه‌ختى يه‌ خوازيمن ك له‌ كۆنگره‌ى نه‌ته‌وه‌يى كورديش ئيچنه‌ به‌شداربوينێ بوينێمن.

هه‌ئه‌و باوه‌ته‌يل و مه‌سه‌ڵه‌يله‌ ك قسيه‌ له‌ سه‌ريان كريا له‌ ناو ئه‌ى كۆنفرانسه‌، ئاوه‌ختى توايمن ك له‌ كۆنگره‌ نه‌ته‌وه‌يى بخرينه‌ ناو به‌رنامه‌. وه‌لى ئيچنه‌ دياره‌، ئه‌و(كۆنگره‌ى نه‌ته‌وه‌يى) چاره‌نويسێ نارووشن ئه‌راى نويسريايه‌و يه‌يشه‌ وه‌ ده‌س ژنه‌يل كورد وه‌ ئامانج ره‌سيه‌.

ئه‌وه‌گ دياره‌، يه‌سه‌ ك سياسه‌ت و جه‌نگ، مله‌مل و ناكووكى و هه‌ڵوێست حكومه‌ته‌يل هاوسا، رێ ناده‌ێ وه‌ پياوه‌يلمان تا له‌ رووژگار ئمڕوو كۆنگره‌ى نه‌ته‌وه‌يى بخنه‌و رێ. خوو ئمجا ئه‌گه‌ر ئه‌وانيش مه‌مه‌رێ نه‌ون، دياره‌ ژنه‌يل كورد له‌ى قۆناغه‌، چالاكتر و وريا تر له‌ پياوه‌يل ئيمه‌ن. هناى ك ئيچنه‌سه‌، خوو خاستره‌ چاره‌نويس كۆنگره‌ى نه‌ته‌وه‌ييش به‌يمه‌ ده‌س ژنه‌يل كورد. وه‌ى ئه‌ساسه‌ ك ئمڕوو ژنه‌يل كورد له‌ ته‌مام پارچه‌يل و ئه‌ورووپاو ئه‌مريكاو ده‌يشت له‌وڵات وه‌ گشتى، ئه‌زموون و تواناى هاوتا وه‌ل پياوه‌يل له‌ سياسه‌ت و حكومڕانى دێرن، ئيچنه‌ پێشبينى ئه‌كه‌م ك يه‌يشه‌ وه‌ ئامانج بره‌سنن./ش

كاروان عه‌لی‌