تا ره‌حمه‌ت ئه‌ڕایان كل نه‌كه‌ن!

شفق نيوز

له‌ ئه‌ركه‌یل سیاسى و ئدارى هه‌ر له‌سه‌ره‌تاى وه‌رگرتن ده‌سه‌ڵاتیان له‌ڕێ سه‌ندووقه‌یل ده‌نگداین، ك هه‌رچه‌نى ئه‌زره‌تمه‌ند بویم وه‌ل ملیۆنه‌ها كه‌س له‌ ملله‌تمان له‌ هه‌رێم كوردستان و باقى مه‌ردم شوونه‌یل تر عراق ك هه‌ر یه‌كیگ له‌و سه‌ركرده‌یله‌ دیدار و گفتگوویگ ته‌له‌فزیۆنى ئه‌را پێشكه‌شكردن خود خوه‌ى ئه‌نجام بیاتاد نه‌ك جوور ریكلام، به‌ڵكوو قسه‌ى وه‌ دقه‌ت و به‌ڵگه‌دار و پڕ له‌ڕاسى، وه‌لى خوه‌شم هات بڕیگ له‌ رویداگه‌یل جاده‌ى هه‌رێم و به‌غدا و باقى پارێزگایه‌یل تر باس بكه‌م ك له‌ یادگارى عراقیه‌یل باكوور و خوه‌رهه‌ڵات و خوه‌رئاواو باشوور مه‌ندگه‌ له‌ عومر ئى ده‌یه‌ى دویاخر عراقه‌.

ئمجا ئه‌را ئه‌مانه‌ت، ئى دو سه‌ركرده‌ له‌ڕێ كووده‌تاى سه‌ربازیه‌و ده‌سه‌ڵات نه‌گرتنه‌ ده‌س جوور ئه‌وه‌ك به‌عسیه‌یل وه‌پى ناوى نیان شوڕش چه‌رمگ یا وه‌وى(عه‌روس) شوڕشه‌یل له‌بان ئه‌و كرده‌وه‌یل نادروسه‌ ك ئه‌نجامى دیان، به‌ڵكوو هه‌ڵوژاردنه‌یل كانوون دویه‌م  2005 هات ك سه‌رۆك حكوومه‌ت دیاریكرد له‌ خود مه‌ردم وڵاته‌گه‌، ك ساڵه‌یلیگ په‌نابه‌ر بوى و له‌ناونى تاران و دیمه‌شق و سوار ئه‌سپ ئئتلاف شیعه‌ بوى و وه‌رگرى له‌ حوكمیگ ره‌واى تازه‌ كرد له‌ژێر ساى ده‌وڵه‌ت یاسا، به‌رنامه‌یگ پێشكه‌ش كرده‌ حوكمه‌گه‌ى ك تاڕاده‌ى فره‌یگ جوور مه‌ته‌ڵ فیلمه‌یل عه‌ره‌بى یا هندیه‌ ك هه‌میشه‌ وه‌ سه‌ركه‌فتن پاڵه‌وانه‌گه‌ كووتایى وه‌پى ئه‌یه‌ید!

له‌ كوردستانیش ك كه‌فته‌ نواى گشت وڵاتیگ له‌ جیوه‌جیكردن دیمۆكراسى، ڕێ ملله‌ت و چالاكیه‌یل سیاسیه‌گه‌ى دویاى چه‌ن مانگ كه‌میگ له‌ راپه‌ڕین ئادار 1991 وه‌ره‌و هه‌ڵوژاردن و ده‌زگایه‌یل ده‌ستوورى بوى ك به‌رهه‌مى یه‌كه‌مین په‌رله‌مان كوردستان هه‌ڵوژریاگ بوى له‌ ساڵ 1992 ك خود ئه‌و هه‌ڵوژاردنه‌ بارزانى ره‌سانه‌ سه‌رۆكایه‌تیكردن كوردستان له‌ هه‌ڵوژاردنه‌یل ته‌ممووز 2009 ك نزیكه‌ى 70% مه‌ردم ده‌نگ ئه‌ڕاى دان.

له‌ به‌غدایش وه‌گووره‌ى خول و نیمیگ له‌ حوكم، قه‌یران كاره‌باو شوون نیشته‌جى و بیكارى و تیرۆر و نه‌وین خزمه‌تگوزاریه‌یل هیمان هه‌ر چاره‌سه‌ر نه‌كریاگه‌و بگر زیاتریشه‌و بویه‌ بیجگه‌ به‌رزه‌وبوین نرخ ئه‌و هه‌وه‌جه‌یله‌ ك په‌یوه‌سه‌ وه‌ ژیان هاووڵاتى هه‌ر له‌ خوه‌راك و خوارده‌مه‌نى و ده‌واو ده‌رمان بگر تا ره‌سێده‌ به‌نزین و گاز و نه‌فت چه‌رمگ ، ك دویاى شه‌ش ساڵ وه‌ قودره‌ت خودا حوكم ده‌وڵه‌ت یاسا كه‌فته‌وه‌و ده‌یه‌ها ملیار دۆلار ته‌رخان كریا ئه‌را په‌ره‌سه‌ندن و به‌رهه‌م و خزمه‌تگوزارى، وه‌لى بار عراق هه‌ر خراوتره‌و بوى و خوینڕشانن له‌ زوورم پارێزگایه‌یل عراق رویدا له‌ ئاكام كاره‌یل تیرۆریستى و تاوانه‌یل رێكخریاگ قاعیده‌ ك ره‌سیه‌ شوونه‌یل گرنگ له‌ ده‌زگایه‌یل ده‌وڵه‌ت و له‌ژیر ناونیشانه‌یل جووراوجوور كاره‌یل خراوه‌كارى ئه‌نجامدان.

له‌وه‌رانوه‌ر ئه‌وه‌یش له‌ هه‌رێم كوردستان ك هه‌رچه‌نى كه‌م و كوڕى و گه‌ناته‌كارییگ رویدا له‌لایه‌ن مه‌ردمانیگه‌و، وه‌لى وه‌ل ئه‌وه‌یشا گه‌شه‌كردن فراوانیگ له‌ خزمه‌تگوزارى هاته‌ وجوودو له‌وانه‌یش كاره‌با ك له‌ هه‌رێم وه‌ ته‌واوى سه‌ركه‌فت وه‌ هاوكارى كه‌رت تایبه‌ت ناوچه‌یى و بیگانه‌، یه‌یش بیجگه‌ باقى خزمه‌تگوزاریه‌یل تر ك په‌یوه‌سه‌ وه‌ ژیان هاووڵاتى جوور ئاو و ته‌ندروسى و زانست و په‌روه‌رده‌و ئاست مانگانه‌ى مه‌ردم، ك بیجگه‌ گشت ئه‌یانه‌یش ئاسایش و سه‌قامگیرى كوومه‌ڵایه‌تى ك ئداره‌ى هه‌رێم سه‌ركه‌فت له‌ دابینكردن ئاسایش، ئه‌ویش وه‌ ئاگاداركردنه‌وه‌ى هاووڵاتى له‌ مقه‌یه‌تیكردن نیشتمانه‌گه‌ى.

ئمجا هه‌رچه‌نى ئاره‌زوو هاووڵاتى فیشتر بوى له‌ى ده‌سكه‌فته‌یله‌، وه‌لى به‌راوردیگ بویچگ له‌ناونى هه‌ردوگ حاڵه‌ت ئه‌وه‌ ئه‌ڕامان ده‌رخه‌ێد ك جیاوازى فره‌یگ هه‌س له‌ ناونى ئه‌وه‌ك حكوومه‌ت ناوه‌ندى و فره‌یگ له‌ حكوومه‌ته‌یل ناوچه‌یى له‌ پارێزگایه‌یل و ناونى هه‌ڵكه‌فت یا واقع ئیسه‌ى هه‌رێم كوردستان ك سه‌ده‌ها كۆمپانیاو سه‌رمایه‌دار بیگانه‌ له‌گشت وڵاته‌یل جه‌هانه‌و كیشا وه‌ره‌و لاى خوه‌ى و جوور لانه‌ى هه‌سه‌ڵ له‌گشت شار و شوونیگه‌و روى له‌لى كه‌ن و گام فره‌ خاسیگ ناگه‌ له‌ پێشكه‌فتن و له‌ڕوى خزمه‌تگوزارى و ئیچنه‌ وه‌پى هاتگه‌ ك سه‌ده‌ها هه‌زار عراقى سه‌ردان هه‌رێم بكه‌ن و له‌تى به‌خته‌وه‌رى بوینن، به‌ڵكوو زیاتر له‌ 250هه‌زار گه‌شتیار له‌ باشوور و ناوڕاس عراقه‌و له‌ عه‌ید ره‌مه‌زان پیرووز روى كردنه‌ هه‌رێم.

ئه‌گه‌ریش له‌ چوارچیوه‌ى عراق و ئه‌زموونه‌یل و نائومیدیه‌یل گه‌ورا ده‌ربچیم ك هاتگه‌سه‌ تویش هاووڵاتیه‌یل و روى بكه‌یمنه‌ ئاسمان وه‌هار عه‌ره‌بى، دوینیم ك مه‌ترسى گه‌ورایان ئه‌وه‌سه‌، جیگریگ له‌ئاست ئه‌و هه‌مگه‌ قوربانبه‌یله‌ نه‌ویننه‌و ئه‌را ئه‌و ملله‌ته‌یله‌و هویچ له‌ ناوه‌ڕوك مه‌سه‌له‌گه‌ ئاڵشت نه‌ود، چوینكه‌ ملله‌ته‌یل عراق و مسر و یه‌مه‌ن و لیبیاو سوریاو شوونه‌یل تر خوه‌رهه‌ڵات ناوڕاس شوڕش و راپه‌ڕین ئه‌را دامه‌زرانن رژیمیگ سیاسى دینى یا مه‌زه‌وى یا نه‌ته‌وه‌یى به‌سیاگیگ ناكه‌ن، به‌ڵكوو له‌وه‌ر خاتر دامه‌زرانن ده‌وڵه‌تیگ دیمۆكراسى و مه‌ده‌نى و دادگه‌ر و ده‌سپاك و هه‌قده‌ره‌ نه‌ك ده‌وڵه‌ت دروشم و دین و شۆڤێنیات نه‌ته‌وه‌یى یا ره‌گه‌زى و مه‌زه‌وى.

له‌یره‌یش له‌وڵات دوچه‌مان، له‌ڕاسى ئیمه‌ گشتمان ئاره‌زوو ئه‌وه‌ داشتیم گشت عراق جوور هه‌رێم كوردستان بوود، تا وه‌لاى كه‌مه‌و بویشیمنه‌ دوشمنه‌یل ئه‌زموونه‌گه‌مان ئیمه‌ خاستریم له‌وانه‌ك نزیكه‌ى نیم سه‌ده‌ حوكم عراق كردن و جاده‌ى عراقى ره‌حمه‌ت ئه‌را رژیم سته‌مكارى و فاشیست كلنه‌كه‌ن جوور ئه‌وه‌ك ئیسه‌ رویئه‌یاد له‌ به‌غداو پارێزگایه‌یل تر عراق.

كفاح مه‌حموود كه‌ریم
ج. ا