له‌ ساڵياد كووچكردن عه‌لى باباخان

شفق نيوز

نويسه‌ر عه‌لى باباخان يه‌كيگه‌ له‌ نويسه‌ره‌يل كورد فه‌يلى و له‌ 1 /ته‌ممووز/ 1945 له‌ شار به‌غدا هاته‌سه‌ دونيا، هه‌ر له‌وه‌خت ره‌سينى ئه‌را فره‌نسا له‌ساڵ 1974 په‌يوه‌ندى كرده‌ زانكۆى سۆربۆن ك دكتۆرايش له‌تى وه‌ده‌س هاورد له‌باوه‌ت په‌لاماره‌يل كووچ وه‌پيكردن زووره‌ملى كورده‌يل فه‌يلى ئه‌را ئيران له‌ ساڵه‌يل هه‌فتاى سه‌ده‌ى وه‌رين وه‌ ئه‌وه‌گ خوه‌يشى يه‌كيگ بويه‌ له‌ قوربانيه‌يل ئه‌و په‌لاماره‌يله‌.

ئى نويسه‌ره‌ چه‌نه‌ها كتاو له‌باوه‌ت كومه‌ڵگاى فه‌يلى داناگه‌ جوور: "كورده‌يل عراقى، مێژوويان و كووچ وه‌پيكردنيان له‌لايه‌ن رژيم سه‌دام حسێن" له‌ساڵ 1994 و " عراق:1970 – 1990 ده‌ركرده‌ شيعه‌ ". وه‌ل ئه‌وه‌يشا دروشم ڕى وڕه‌سم كۆمارى حكومه‌ت عراقى تايبه‌ت وه‌ كاره‌سات ئه‌نفال به‌دناو ك ده‌يان هه‌زار كورد له‌تى بوينه‌ قوربانى و وتاره‌يل عه‌لى حسێن ئه‌لمه‌جيد له‌و باوه‌ته‌و ئه‌ڵگه‌ردانه‌سه‌و ئه‌را زووان فره‌نسى. له‌ هه‌مان وه‌خت شماره‌ى فره‌يگيش له‌ باوه‌ته‌يل نويساگه‌و بڵاو كردگه‌ له‌باوه‌ت مه‌ينه‌تى كورده‌يل عراق وه‌ هه‌ردوگ زووان كوردى و فره‌نسى.

نويسه‌ر كووچكردگ له‌ساڵ 1993 چيه‌سه‌ ناو په‌يمانگاى كوردى و جوور جيگر سه‌رۆك به‌ش زانسته‌يل ئنسانى له‌تى هه‌ڵوژريا. ئى په‌يمانگا له‌لايه‌ن حكومه‌ت فره‌نسيه‌و دگان وه‌پيا نريا جوور په‌يمانگايگ بايه‌خدار فريه‌ ئه‌را توێژينه‌وه‌يل رووڵه‌يل ملله‌ت كورد سته‌مديده‌ له‌ هه‌ر چوار پارچه‌ى نيشتمانه‌گه‌ى، وه‌ل ئه‌وه‌يشا ئه‌نداميگيش بوى له‌ ده‌سه‌ى نويسه‌ره‌يل گووڤار "توێژينه‌وه‌ى كوردى" و دوياى ئه‌وه‌يش بويه‌ سه‌رنويسه‌ر هه‌مان گووڤار و سه‌رنويسه‌ر گووڤاريگ تريش وه‌ناو "توێژينه‌وه‌ى خوه‌رهه‌ڵاتى" و ئى هه‌ردوگ گووڤاريشه‌ له‌لايه‌ن په‌يمانگاى كورديه‌و ده‌رچياد له‌ پاريس و ره‌سياده‌ وڵاته‌يل تر دونيا.

دكتۆر عه‌لى باباخان قسه‌كه‌ر فه‌رمى په‌يمانگاى كوردى بوى وه‌ زووان كوردى وه‌تايبه‌ت له‌ وتاره‌يل ئه‌را ميديايه‌يل عه‌ره‌بى و به‌شدارى له‌ به‌رنامه‌يل فريه‌يگ دوينرياگ و ژنه‌فياگ كرد و به‌شدارى له‌ كۆنگره‌يل ئۆپۆزسيۆن عراقييش كرد، له‌وه‌خت گله‌وخواردنيشى له‌ واشنتۆن له‌ ساڵ 2000 به‌شدارى له‌ كۆنگره‌ى بايه‌خداريگ كرد له‌ زانكۆى ئه‌مريكى له‌ڕى پيشكه‌شكردن وتاريگ، ك ژان له‌ناكاويگ هاته‌ تويشى و سه‌ره‌تاى نه‌خوه‌شى سه‌ختيگ بوى له‌لى و ئه‌و نه‌خوه‌شيه‌ هه‌ڵه‌په‌ڵه‌ كرد له‌ كووچكردنى.

باباخان يه‌كيگ بوى له‌و كه‌سه‌يله‌ ك يادگاريه‌يل كورد فه‌يلى نويسا له‌باوه‌ت كووچ وه‌پيكردن زووره‌ملى و باوه‌ڕى ئه‌وه‌ بوى ك خاسترين هاوكيشه‌ ئه‌را مه‌ندنه‌وه‌ى ژيانيان جوور كومه‌ڵگايگ ئنسانى و خاسترين ڕى ئه‌را مقه‌يه‌تيكردنيان ئه‌وه‌سه‌ ك كومه‌ڵگاى ناوده‌وڵه‌تى دگان وه‌پيان بنه‌يد له‌ قه‌واره‌يگ فيدراڵى ك مافه‌يل نه‌ته‌وه‌ييان له‌تى زه‌مانه‌ت بكا وه‌ل ژيانيگ پڕ كه‌رامه‌ت و ئازاد.

د . تارا ئبراهيم

ج . أ