كامیان جوانتره‌، دڵیگ خوه‌شد بتواید یا چه‌ویگ حورمه‌تد بگرید؟!

شفق نيوز

  چشت جوانیگه‌ ئه‌گه‌ر له‌ى دونیا دڵیگ خوه‌شد بتواید، جوانتریش له‌وه‌ ئه‌وه‌سه‌ ك ئه‌و دڵه‌ پاك و بیگه‌رد و ڕاسگوو بوود.

نوڕستن پڕ له‌ ریز و حورمه‌تیش جوانه‌، ئه‌و نوڕستنیشه‌ جار له‌یوا هه‌س وه‌ چه‌و ئه‌نجام گرید و جار له‌یوایش هه‌س وه‌ وشه‌، جوور ئه‌وه‌ك چه‌و قسه‌ بكا له‌ جیاى زووان یا خود زووان بایده‌ قسه‌ یا ده‌س قسه‌ بكا وه‌و وشه‌یله‌ ك نویسیده‌ى.

ئه‌و دید و نوڕستنه‌ جوانه‌ ئه‌گه‌ر له‌ هه‌ر كه‌سیگ بوود، جوانتریش له‌وه‌ ئه‌وه‌سه‌ ك له‌ چه‌و كه‌سیگ بوینیده‌ ریز و حورمه‌تى بگرید، ك یه‌یش مانایه‌یل فریه‌یگ له‌لى ئه‌كه‌فیده‌و ئه‌را كه‌س وه‌رانوه‌ر.

شایه‌ت ئیمه‌ گرینگى فریه‌یگ بیه‌یمه‌ خوه‌شه‌ویسى، وه‌لى دى نازانیم ئه‌گه‌ر حورمه‌ت یه‌كسان بوود وه‌ل خوه‌شه‌ویسى یا وه‌ چه‌واشه‌؟؟ له‌یرا مه‌رام له‌ ئه‌و خوه‌شه‌ویسى پاك و بیگه‌رده‌سه‌، مه‌رام له‌ خوه‌شه‌ویسى ئنسانیه‌.

وه‌لى حاشا له‌وه‌یش ناكه‌یم ك دید و نوڕستن ئه‌را حورمه‌تیش ئاده‌میزادیگ تر له‌لیمان دروس ئه‌كا، ئه‌و كه‌سه‌یله‌ ك ریز و حورمه‌تد گرن گه‌وران، ئه‌وانه‌ خاوه‌ن كه‌سایه‌تى به‌رزن و شایسته‌ى گشت حورمه‌تیگن، شوون دیارى و به‌رزیگ دیرن له‌ ناو كوومه‌ڵگا.

ئنجا ئایا له‌وه‌ختیگ ك وشه‌ى حورمه‌ت ئاراسته‌د ئه‌كریه‌ید، چه‌ بكه‌ید خاسه‌؟ئایا له‌ گرینگى ئى مه‌سه‌له‌ ره‌سینه‌سه‌و؟ ئایا ئى ئحساسه‌ تاقیه‌و كردینه‌ تا هه‌میشه‌ له‌ناو حورمه‌ت و خوه‌شه‌ویسى بژیه‌ین؟

خوه‌شه‌ویسى جوانه‌ ئه‌گه‌ر له‌ دڵیگ پاك و راسگووه‌و بوود، ریز و حورمه‌تیش جوانه‌ ئه‌گه‌ر ئیمه‌ شایسته‌ى بویمن! چوینكه‌ خوه‌شه‌ویسى زه‌رده‌خه‌نه‌یگ راسیگه‌و حورمه‌تیش گوڵیگه‌ له‌ خاك دڵد كاڵیه‌یدو تامازرووى ئه‌كه‌ید! ئنجا ئایا كامیان جوانتره‌، دڵیگ خوه‌شد بتواید یا چه‌ویگ حورمه‌تد بگرید؟!

ئنجا چه‌نیگ جوانه‌ ئه‌گه‌ر دڵ و چه‌و هه‌ردوگیان وه‌ یه‌كه‌و بگونجیه‌ن، چوینكه‌ هه‌ردوگیان ته‌واوكه‌ر یه‌كترن. چه‌نیگ جوانه‌ ئه‌و ژیانه‌ ك له‌ هه‌مان وه‌خت پڕ بوود له‌ ریز و حورمه‌ت، له‌وه‌ر ئه‌وه‌گ ئه‌گه‌ر ئاده‌میزاد له‌ سه‌ره‌تا حورمه‌ت وه‌رگرت، ئه‌وه‌ بووده‌ هووكار سه‌ره‌كى ئه‌را خوه‌شه‌ویسى، چوینكه‌ له‌شوون حورمه‌ت خوه‌شه‌ویسى و دڵسووزى و له‌یه‌كڕه‌سینه‌وه‌ په‌یا بوود.

رووژنامه‌یگ ئوردنى

ج . أ