سه‌ما له‌بان ئاواز چینایه‌تى

شفق نيوز

بان هه‌ڵكه‌فت سیاسى و گشت كێشه‌و گرفتیگ  هاورده‌ بان مه‌سه‌له‌ى سیاسى و شكست وه‌گشت چاره‌سه‌ریگ سیاسى و ئابوورى هاوردو زه‌ره‌د ره‌سانه‌ پێكهاته‌ى كومه‌ڵایه‌تى ك زویتر وه‌ شانازى وه‌ برایه‌تى و ئاشتى و په‌یوه‌ندیه‌یل خاس ناونى خوه‌یان كردیان.

 

وه‌ل ئه‌وه‌یشا نه‌خوه‌شى فره‌یگ له‌ مه‌رام و ئامانجه‌یل كیشمه‌كیش و ركابه‌رى له‌بان ده‌سڵات و ماڵ و دارایى له‌لى كه‌فته‌و، دى ئه‌وه‌ بوى ناسنامه‌ى ره‌سه‌نایه‌تى نه‌یست وه‌ قه‌ى فراكسیۆنه‌یل جیوه‌جیكار و زوورم كاره‌یل سیاسى په‌كخست وه‌ره‌و ڕى راس و خواست و ئى وڵاته‌ خسته‌ قه‌یرانه‌یل سه‌ختیگ و به‌ر ئه‌و قه‌یرانیشه‌ مه‌سه‌له‌ى چینایه‌تى و مه‌زه‌وى و ره‌گه‌زى بوى و بویه‌ قه‌ده‌ریگ ئه‌را ملله‌ت و توناى ده‌رچگن له‌لى مه‌حاڵه‌و بوى.

 

هه‌ى وه‌ى خاتریشه‌ ده‌نگه‌یل ناڕه‌زایى فره‌یگ به‌رزه‌و بوى و خوازیار پشتپه‌سانن بوین له‌ بان ناسنامه‌ى عراقى و قورتاربوین له‌ شه‌ڕ چینایه‌تى و ده‌س وه‌پیكردن قوناغ خسسازى سیاسى و به‌رنامه‌یل ئاوه‌دانى و دامه‌زرانن په‌یمانه‌یل نیشتمانى له‌ كار سیاسى و دراوردن عراق له‌ مه‌ترسى چگنه‌ناو قوناغ تیه‌ریك و نادیار جوور سه‌رده‌م دیكتاتۆرى، ك ئى داواكاریه‌یله‌ لایه‌نه‌یل پرووسه‌ى سیاسى گرته‌وه‌و گه‌ورا بوى تا ره‌سیه‌ قوناغ یه‌كلاكردنه‌وه‌ له‌بان بنه‌ماى چینایه‌تى و به‌شبه‌شبوین سیاسى.

 

ئه‌وه‌ بوى زوورم ملله‌ت پیشبینى ئه‌وه‌ كردن ك مه‌سه‌له‌ى چینایه‌تى ته‌واو بوود و له‌ناو بچوود و عراق خاسه‌و بوود له‌ى نه‌خوه‌شى پیس و سه‌خته‌و بچیمنه‌ قوناغ سه‌ركه‌فتنه‌یل سیاسى و سه‌قامگیرى و مه‌رزیگ دابنه‌یم ئه‌را ناكوكیه‌یل سیاسى و چینایه‌تى و به‌رژه‌وه‌ندى خودى ك عراق ره‌ساننه‌ بنبه‌س تیه‌ریكیگ .

 

بیگومان عراقیش هویچ وه‌ختیگ ئارامى و سه‌قامگیرى وه‌خوه‌یه‌و نیه‌دوینید مه‌گه‌ر وه‌ لاوردن ئى مه‌سه‌له‌ى چینایه‌تى مه‌ترسیداره‌، ك ئه‌زموون ساڵه‌یل گوزه‌یشت به‌سه‌ ئه‌را باوه‌ڕهاوردن و په‌ند و عبره‌ت و قورتاربوین و ئاڵشتكارى وه‌ره‌و كاره‌یل نیشتمانى ك وه‌جووریگ حورمه‌ت ده‌ستوور بگرید.

 

له‌وه‌ر ئى هووكاریشه‌ باس و گفتوگوو كه‌فته‌ ناو و ده‌یشت په‌رله‌مان له‌وه‌ر خاتر وه‌دیكردن چاره‌سه‌ر خاسیگ ئه‌را بنبڕكردن مه‌سه‌له‌ى چینایه‌تى، ئنجا مه‌ردمان فره‌یگ باوه‌ڕیان ئه‌وه‌ بوى ك په‌رله‌مان جیوه‌جى سه‌ركه‌فتن ئه‌كا و هه‌ڵوژانن ئه‌نجوومه‌ن كۆمسیۆن هه‌ڵوژاردنه‌یل له‌بان شیواز نیشتمانى و چه‌سپانن ناسنامه‌ى عراقى نه‌ك ناسنامه‌ى چینایه‌تى، ك ئه‌ویش وه‌گووره‌ى وجوود ئه‌و ئه‌نجوومه‌ن سه‌روه‌خوه‌ییه‌ ك له‌ژیر ده‌سڵات حزبى و لایه‌نه‌یل نیه‌و كار خوه‌ى وه‌ دادگه‌رى و پاكى به‌یده‌ رییه‌و.

 

وه‌لى دیاره‌ گشت چشتیگ چیه‌ بنه‌ماو ژیر سایه‌ى چینایه‌تى و گشت ئومیدو ئاره‌زووه‌یل كه‌فته‌ خانه‌ى چینایه‌تى و گشت ئه‌و واده‌و قه‌وڵه‌یله‌ سه‌رنه‌گرتن، دى وه‌ى شیوه‌ ئه‌نجوومه‌ن تازه‌پیكهات له‌ 9 كورسى و چوار له‌لى به‌ش هاوپه‌یمانى نیشتمانى بوى و دووانیشى به‌ش هاوپه‌یمانى كوردستانى و دووانیش له‌لى لیست عراقیه‌و ئه‌واكه‌یشى ئه‌را كه‌مینه‌یل دانریا، وه‌ى جووریشه‌ ماناى ئه‌وه‌سه‌ چیمنه‌ ناو قه‌یران تازه‌و گه‌ردین له‌شوون چاره‌سه‌ر.

 

ئه‌نجوومه‌ن كۆمسیۆن هه‌ڵوژاردنه‌یل وه‌شیواز ئیسه‌ مه‌حاڵه‌ بتویه‌نید جیوه‌جى ده‌سپاكى و دادگه‌رى بكا له‌ هه‌ڵوژاردنه‌یل ئاینده‌ وه‌شیوه‌ى خاسیگ و قانجاز بڕه‌سنیده‌ گشت لایه‌نه‌یل سیاسى، چوینكه‌ سه‌روه‌خوه‌یى خواست و هه‌وه‌جه‌دار له‌ده‌سدا ئه‌را نواگیرى له‌ جیاوازى و سه‌رپیچیكردن له‌وه‌خت ده‌نگداین و جیاكردنه‌وه‌ى ده‌نگه‌یل و تووماركردنى.

 

هه‌ر له‌وه‌ر ئه‌وه‌یش بایه‌سه‌ له‌بان په‌رله‌مان ته‌ماشاى كاره‌یل خوه‌ى بكاو ئى بار سه‌خته‌ له‌یه‌كه‌و بیه‌یدو له‌ڕى دیموراسیه‌ته‌و ته‌ماشاى گشت چشتیگ بكا ك ئه‌ویش وه‌ گووره‌ى ده‌ستوور و بتویه‌نید ئسبات ناسنامه‌ى عراقى بكا له‌ هه‌ڵوژانن ئه‌نجوومه‌ن كۆمسیۆن هه‌ڵوژاردنه‌یل تازه‌ دویر له‌ په‌رده‌ى چینایه‌تى.

 

جومعه‌ عه‌بدوڵڵا

ج. ا