ئایا ده‌ستوور و رژیم په‌رله‌مانى ئاره‌زوو عراقیه‌یل جیوه‌جى كرد؟

شفق نيوز

عراقه‌ ك له‌ى دویاخره‌ له‌ حوكم ته‌كڕه‌وى و سته‌مكارى قورتار بوى و باوه‌ش ئه‌را گشت كه‌سیگ واز كرد هه‌ر له‌ شووڕشكار بگر تا ره‌سیده‌ دز و جه‌رده‌و گه‌ناته‌كار !

ئه‌وسا ملله‌ت وه‌ كراگیریاگ بوى له‌ى عراقه‌ له‌ژیر سایه‌ى ده‌سڵات سته‌مكار و موڵك قائد زه‌رووره‌و پاڵه‌وان شووڕش بوى و گشت چشتیگیش هه‌ر وه‌ته‌نیا ئه‌را خوه‌ى بوى، چه‌م سه‌دام، پیه‌ڵ سه‌دام، زانكۆى سه‌دام، فیداكاره‌یل سه‌دام، شار سه‌دام، له‌ دایگبوین سه‌دام و ته‌نانه‌ت دین سه‌دامیش! دى گشت چشتیگ هه‌ر سه‌دام و سه‌دام بوى و هویچ تر بیجگه‌ سه‌دام نه‌وى.

رژیم دیكتاتۆرى رژیمیگ  سه‌رۆكایه‌تى بوى و گشت ده‌سڵاته‌یل له‌ژیر فه‌رمان سه‌دام سه‌ركرده‌و به‌تیه‌ى شووڕش و دادگاى شووڕش و ئه‌نجوومه‌ن سه‌ركردایه‌تى شووڕش بوى و هویچ ناونیشانیگ  نه‌وى ناوى ده‌ستوور بوودو پرسیار له‌ هه‌ر عراقییگ بكرداید و بوتایده‌ پى ده‌ستوور دیرید، وتیاده‌ پید ده‌ستوور چه‌س!

ده‌ستوور به‌ڵگه‌ى به‌رز وڵاته‌و په‌یڕه‌و بوود له‌بان گشت یاساو ریككه‌فتنه‌یلیگ  ، ده‌ستوور روخسار ده‌وڵه‌ت و رژیم و شیوه‌ى حوكم و ده‌سڵات و هه‌ق و ئازادیه‌یل مه‌ردم و شیواز وه‌ڕیه‌وبردن ده‌وڵه‌ته‌، ده‌ستوور سه‌رچه‌وه‌و چاره‌سه‌ر گشت كیشه‌و گرفتیگه‌.

مادده‌ى(1) له‌ ده‌ستوور عراق ئویشید: كومار عراق، ده‌وڵه‌تیگ یه‌كێتى سه‌روه‌خوه‌یى و خاوه‌ن سه‌روه‌رى ته‌واویگه‌، شیوه‌ى حوكم له‌تى كومارى – په‌رله‌مانى – دیموكراسیه‌و ئى ده‌ستووره‌ زامنكه‌ر یه‌كێتى عراقه‌.
بیگومان سستم دیموكراسى و په‌رله‌مانى، سستم فره‌ خاسیگه‌و له‌ئاكام مه‌ینه‌تى و  چه‌وسیان و خه‌بات ملله‌ته‌یل په‌یا بویه‌ له‌وه‌ر خاتر ئازادى و دادگه‌رى و ده‌وڵه‌ته‌یل فره‌یگیش په‌یڕه‌وى كه‌ن، وه‌لى ئى سستمه‌ ناگونجیه‌ید وه‌ل هه‌ڵكه‌فت یا واقع عراقى ك خاوه‌ن سروشت تایبه‌تیگه‌و ملله‌ت عراقیش شاره‌زایى فراوانیگ له‌ى جووره‌ ئه‌زموونه‌ نه‌یریدو هاووڵاتیه‌یل عراقییش سه‌ندووق هه‌ڵوژانن وه‌ خوه‌یانه‌و نه‌دینه‌ تا ساڵ 2005و بیجگه‌ ئه‌وه‌یش ركابه‌رى سیاسى و یه‌كسانى و هه‌ق نوێنه‌رایه‌تیكردن هیمان مه‌سه‌له‌ى سه‌ختیگه‌ له‌ى عراقه‌.

عراق له‌ زوڵم و سته‌م سه‌دام قورتار بوى و له‌خوه‌یا دى ته‌واو قورتار بویه‌ له‌ دیكتاتۆریه‌ت، وه‌لى له‌ڕاسى سه‌دام سستمیگ سه‌رۆكایه‌تى راسكانى په‌یڕه‌و نه‌كرد جوور ئه‌وه‌ك له‌ وڵاته‌یل یه‌كگرتگ په‌یڕه‌و كریه‌ید تا بویشیم سستم سه‌رۆكایه‌تى ناگونجیه‌ید وه‌ل عراقا جوور سستمیگ حوكمكردن.

ئه‌وانه‌ك رخیان چوود له‌ سستم سه‌رۆكایه‌تى، باوه‌ڕیان ئه‌وه‌سه‌ ك دیكتاتۆریه‌ت تازه‌یگ دروس ئه‌كا، وه‌ل ئه‌وه‌یشا ئه‌زموونمان له‌ رژیم دیموكراسى كیشه‌یل سیاسى ئه‌رامان دروس كرد و سیاسیه‌یل عراق ئه‌رك راسكانى خوه‌یان مه‌شق نه‌كردن و چشت خاسیگ نیشان نه‌یان خزمه‌ت وه‌ واقع عراقى بكا ك تیه‌نگ بنیاتناین و خزمه‌تگوزراى و خاسسازیین دویاى ئى هه‌مگه‌ ساڵ ناهمى بوینه‌.

وه‌ل ئه‌وه‌یشا فراكسیۆنه‌یل سیاسى له‌ناونى خوه‌یان هه‌ر خه‌ریك كیشمه‌یش و نه‌گونجیانن، ك یه‌یش هویچ خزمه‌تیگ وه‌ هاووڵاتى ناكاو حاڵه‌تیگ له‌ به‌رژه‌وه‌ندى تایبه‌ت كریه‌یده‌ دى دویر له‌ خواست ملله‌ت، ك له‌هه‌مان وه‌خت چه‌ك كه‌ناته‌كارى و هه‌ڕه‌شه‌و گوڕه‌شه‌یش هه‌میشه‌ وه‌رده‌وامه‌ له‌ناونى فراكسیۆنه‌یل، ك وه‌ جووریگ یا ئه‌وه‌سه‌ گشتیان وه‌یه‌كه‌و بیده‌نگ بوون یا ئه‌وه‌سه‌ جه‌نگ سه‌رد ره‌سانن یا ئعلامى له‌ناونى خوه‌یان به‌رپا كه‌ن و ملله‌تیش زه‌ره‌دمه‌ن یه‌كه‌مه‌.

كه‌ریم ئه‌لسه‌ید
ج. ا