خاس وتێد ئه‌ى ريزدار بارزانى

عه‌لى  حسێن فه‌يلى

شه‌فه‌ق نيوز/ شايه‌ت مه‌ردمانيگ بپرسن، ئايا مومكنه‌ ك مه‌زه‌ويگ دياريكرياگ بدێده‌ هووكار يه‌كگرتگى ئه‌را ملله‌ت كورد، بيگومان جواوه‌گه‌ى گورج و ئاشكراس" ئه‌وه‌ نادێ"، مه‌حاڵه‌ت ملله‌ت كورد ك ناسرياگه‌ وه‌ فريه‌يى ئايينه‌يل و باوه‌ڕه‌يل قه‌ڵبه‌و بدێ وه‌ مه‌زه‌ويگ يا تايفه‌يگ دياريكرياگ، مه‌زه‌و يه‌كگرتگى وه‌پێد نايه‌ێد يا خه‌باتد جيوه‌جى ناكا، هه‌رچه‌نى له‌ مه‌زه‌و يا باوه‌ڕگه‌ى دوشمند يا ئه‌را نموونه‌ له‌ ده‌سڵات فه‌رمانڕه‌وا نزيكتره‌و بوێد ئه‌وه‌نه‌ كيشه‌و زه‌ره‌ده‌يلد فيشتره‌و ئه‌دێ، جوور ئه‌وه‌گ هاته‌ تويش كورد وه‌ل سه‌رده‌مه‌يل فارس و عوسمانيه‌يل يا ته‌نانه‌ت ره‌وته‌يل يه‌ك له‌شوون يه‌ك عه‌ره‌بى، ئمجا ئه‌زموونه‌يل ئه‌وسا و ئيسه‌ تيه‌ڵن و مه‌نته‌قيانه‌ نيه‌ زاڵم و زوڵمليكرياى روى له‌ يه‌ى قوبڵه‌ بكه‌ن.

ريزدار نه‌يچێروان بارزانى سه‌رۆك حكومه‌ت هه‌رێم كوردستان له‌ كۆنگره‌يگ ئايينى له‌ هه‌ولێر وه‌ ئاشكرا باس له‌ ئستغلال سه‌كوو مزگفته‌يل كرد له‌لايه‌ن مه‌سه‌له‌ى مه‌زه‌وى يا حزبى سياسى ئايينى وه‌ ئه‌وه‌گ چه‌نيگ كاريگه‌رى خراو له‌لى ئه‌كه‌فێده‌و، ئه‌ويش وه‌ ئه‌وه‌گ ئاينده‌ى كوردستان وه‌ ژيان ئاشتيانه‌ پيكهاتگه‌و چه‌واشه‌گه‌يشى ئه‌وه‌سه‌ ك خه‌بات ده‌يان ساڵ وه‌ تاڵان ئه‌چێد و ملله‌ت كورد له‌تى داڕزيه‌ێد، ئه‌ويش له‌وه‌ر ئه‌وه‌گ مه‌سه‌له‌ى مه‌زه‌وى تايفى له‌ ژيانى هووكار يه‌كگرتگى نه‌ويه‌.

ئاشكراس ك وه‌ دريژايى مێژوو خه‌بات ملله‌ته‌گه‌مان هويچ وه‌ختيگ مه‌زه‌و رۆڵيگ نه‌ياشتگه‌ باس بكريه‌ێد، به‌ڵكوو بنه‌ماى شه‌راره‌ى هه‌ر شووڕشيگ له‌بان چه‌ن هووكاريگ جياجيا دقه‌ت كردگه‌و له‌وانه‌يش زووان، ك ناسنامه‌يگ گرده‌وكه‌ر و ڕييگ بويه‌ ئه‌را جيوه‌جيكردن ئامانجه‌يل ره‌واو نواگيرى له‌ وجوود كه‌سه‌يل ئايينپه‌روه‌ر ئه‌را جمشه‌ته‌يل كوردى نه‌كردگه‌.

بار كورد فريه‌ جياواز له‌ ئه‌زموون فره‌نسى نيه‌، دوياى شووڕش فره‌نسى زووان بويه‌ ناوك گشت چشتيگ و بويه‌ خاڵ سه‌ره‌كى ئه‌را دامه‌زرانن ناسنامه‌ى نيشتمانى و بونيه‌ته‌گه‌ى، يه‌يش به‌رهه‌ميگ بوى له‌و شووڕشه‌ وه‌تايبه‌ت دوياى جيابوينه‌وه‌ى له‌ چنگ كڵيسا ك هه‌وه‌جه‌ وه‌ تاريفكردن سه‌رۆك داشتن ئه‌را خوه‌يان، ئمجا زووان گرده‌وكه‌ر و ته‌نيا ڕييگ بوى ئه‌ڕايان.‌

ئيمه‌ى كورد بايه‌سه‌ ئحساس وه‌ ترس نه‌كه‌يم له‌بان زووان، زويتريش تويش زه‌ره‌د و كيشه‌يل سياسى هاتيممنه‌، وه‌لێ وه‌ل ئه‌وه‌يشا مقه‌يه‌تى له‌ ناسنامه‌ى نه‌ته‌وه‌يى خوه‌مان كرديم، ئى مقه‌يه‌تتيكردنيشه‌ دقه‌ت له‌بان موعته‌قه‌ديگ ئايينى يا مه‌زوى ناكا، ك ئه‌خوام بويشم ك خراويه‌يل په‌يوه‌سبوين وه‌ مه‌سه‌له‌ى مه‌زه‌وى تايفى كه‌متر نيه‌ له‌ مه‌ويسى كووچ وه‌پيكردن و جينۆساێد، هه‌ر وه‌و خاتريشه‌ بايه‌سه‌ گرينگى فريه‌يگ بدريه‌ێد زووان جوور خاڵ هاوبه‌ش له‌وه‌ر يه‌كگرتن نه‌ته‌وه‌ى كورد، له‌ هه‌مان وه‌خت ئه‌تويه‌نيم بپرسيم وه‌گووره‌ى ئه‌زموون ئى سه‌ده‌يل دوياخره‌ ئايا تونڕه‌وى مه‌زه‌وى بويه‌هووكار دامه‌زرانن فيشتر له‌ 200 ده‌وڵه‌ت له‌ جه‌هان يا هاوبه‌شى ناسنامه‌؟ ئايا چه‌نيگ له‌و ده‌وڵه‌ته‌يله‌ ئمڕوو ته‌ركيز له‌بان يه‌كباوه‌ڕى كردنه‌و ملله‌ته‌گه‌ى يا بارودوخه‌گه‌ى يه‌كه‌مه‌ له‌ به‌خته‌وه‌رى؟ جواو ها لاى ئيوه.