ئاسايش ئاده‌ميزاد له‌ مافه‌يلى ئه‌ولاتره‌

عه‌بدوڵڵا جه‌عفه‌ر كوفلى

شه‌فه‌ق نيوز/ بيگومان مه‌سه‌له‌ى ئاسايش خواستيگ به‌شه‌رى و هه‌وه‌جه‌يگ ئنسانيه‌و نه‌بايه‌د ده‌س له‌لى هه‌ڵبگيريه‌ێد هه‌ر له‌وه‌خت وجوود ئاده‌ميزاد له‌بان گووشه‌ى زه‌وى ك وه‌سيه‌يل فريه‌يگ وه‌كار هاورد له‌وه‌ر خاتر ده‌سوه‌ركردن ئاسايش، ئمجا ئه‌و وه‌سيله‌يليشه‌ وه‌گووره‌ى پيشكه‌فتن ئده‌ميزاد و ئاست زانستى و رووشنهويرى و پله‌و جووره‌يل سه‌رچه‌وه‌يل ئه‌و هه‌ڕه‌شه‌يله‌ ك روى وه‌ڕويى كرياگه‌ ئه‌را خراوكردن شيواز ژيانى جياوازه‌.

 

مه‌سه‌له‌ى ئاسايش دوياى هه‌وه‌جه‌ى ئاده‌ميزاده‌ ئه‌را خوه‌راك، ك باوه‌ڕ ناكا وه‌بى ده‌سوه‌ركردن ئاسايش ژيان به‌خته‌وه‌ريگ داشتوود، به‌ڵكوو په‌ره‌سه‌ندنن و گه‌شه‌كردن له‌ بواره‌يل جياجياى ژيان وه‌هه‌ر شيوه‌يگ په‌يوه‌سه‌ وه‌ پله‌ى ده‌سه‌وه‌ربوين ئاسايش و دوياخريش ئاده‌ميزاد خوه‌شگوزه‌رى وه‌ مافه‌يل ره‌واى ئه‌كا ك گشت ئايينه‌يل و ده‌ستووره‌يل و به‌ڵگه‌يل ناوده‌وڵه‌تى بڕيارى دانه‌و پشت وه‌ پله‌ى وجوود ئاسايش ئه‌وه‌سێد، هه‌ر وه‌و خاتريشه‌ نه‌وين ئاسايش و سه‌قامگيرى هويچ نرخ و مانايگ وه‌ ژيان نايه‌ێد، چوينكه‌ ئاده‌ميزاد له‌ساى ئاسايش خوه‌شگوزه‌رى وه‌ مافه‌يل(مه‌ده‌نى و سياسى و ئابوورى و كۆمه‌ڵايه‌تى)ئه‌كا ك هه‌ر يه‌كيگ له‌يانه‌ وه‌گووره‌ى مه‌نزڵه‌ى خوه‌ى، ئمجا له‌يراوه‌ ئه‌وه‌ ده‌ركه‌فێد ك ئاسايش ئاده‌ميزاد له‌مافه‌يلى ئه‌ولاتره‌، ئه‌ويش وه‌ گووره‌ى ئه‌وه‌گ ئاسايش يه‌كيگه‌ له‌ مافه‌يل بنه‌ڕه‌تى ئه‌را حكومه‌ته‌يل و ده‌وڵه‌ته‌يل و ته‌نانه‌ت ئاده‌ميزاديش كه‌فيله‌ وه‌ ئه‌وه‌گ ته‌ئمين ژيانى بكا له‌ساى ئاسايش، چوينكه‌ له‌ساى بار ناسه‌قامگيرى ترس و هه‌ڕه‌شه‌ وه‌دى ئه‌كريه‌ێد.

 

وه‌رجه‌ رووژه‌يليگ ترامپ(45)ه‌مين سه‌رۆك چيه‌ بان ته‌خت ده‌سڵات، خوه‌ى له‌ ناو بڕياره‌يليگ ئه‌ڵلاجه‌وى و له‌ناكاو ديه‌و، ك گشت جه‌هان خسته‌ حيره‌ت له‌ناونى لايه‌نگريكردن و دژايه‌تيكردنى وه‌ى بڕياره‌يل يه‌كلاكه‌رى ك سفه‌ته‌يل سياسى ناوخوه‌يى و خارجى ئه‌مريكى نه‌خشان ئه‌را ماوه‌ى چوار ساڵ تر ئاينده‌ وه‌ كه‌مترين مه‌زه‌نه‌يل، ئمجا له‌و برياره‌يليشه‌ ك ده‌نگ فريه‌يگ داره‌و له‌ جه‌هان، ئه‌وه‌ بوى ك هاووڵاتيه‌يل هه‌فت ده‌وڵه‌ت خوه‌رهه‌ڵات ناوين قه‌يه‌غه‌كرد ئه‌را چگن وه‌ناو ئه‌مريكا ك پيكهاتنه‌ له‌: ئيران و عراق و سوريا و يه‌مه‌ن و ليبيا و سۆماڵ و سودان، ئه‌ويش وه‌ مه‌هانه‌ى ئه‌وه‌ ئى ده‌وڵه‌ته‌يله‌ ناسه‌قامگيرن وه‌ بوونه‌ى كرده‌وه‌يل ترۆريستى و وجوود گرووپه‌يل ترۆريستى له‌ناو خاكه‌يليان، ئى بڕياره‌يليشه‌ ك وه‌ دژ مافه‌يل ئاده‌ميزاد له‌ كووچ و جيوازبوين تاريف كريه‌ێد له‌ شوونيگه‌و ئه‌را شوونيگ تر وه‌ گووره‌ى ياسايه‌يل ناوده‌وڵه‌تى مافه‌يل ئاده‌ميزاد، ناڕه‌زايه‌تى فريه‌يگ گرته‌سه‌ خوه‌ى له‌ناوخود ئه‌مريكا و جه‌هان ده‌يشت، ك وه‌جووريگ ده‌نگه‌يل فه‌رمى و مه‌ردمى ئدانه‌ى له‌يوا بڕياريگ كردن و هه‌ر ده‌وڵه‌تيگ جيا له‌ ده‌وڵه‌تيگ تر له‌ ئاست ناڕه‌زايه‌تى و شه‌رمه‌زاركردنى، وه‌لێ ئى ناڕه‌زايه‌تيه‌ ئداره‌ى تازه‌ى ئه‌مريكى له‌و بڕياره‌يله‌ په‌شيمانه‌و نه‌كرد له‌وه‌ر زه‌مانه‌ت ئاسايش ئه‌مريكاو هاووڵاتيه‌يل ئه‌مريكى ك بيگومان ئداره‌ى ئه‌مريكى وه‌تايبه‌ت سه‌رۆك ئه‌مريكى(ترامپ)ئحساس وه‌ پله‌ى مه‌ترسيدارى ئى بڕياريشه‌ ئه‌كه‌ن وه‌ل زه‌ره‌د ماددى و ئابوورى، وه‌لێ وه‌ل ئه‌وه‌يشا ئاسايش ئه‌مريكا فه‌رز كريا له‌بان گشت ئه‌و دروشمه‌يله له ‌وه‌خته‌يل هه‌ڵمه‌ت هه‌ڵوژاردنه‌يليش.

 

راسه‌ بڕياره‌گه‌ خراوه‌ ده‌رهه‌ق ئاده‌ميزاد، وه‌لێ وه‌ل ئه‌وه‌يشا خواسته‌ ئه‌را مقه‌يه‌تيكردن ئاسايش ئه‌مريكا له‌ خه‌ته‌ر ترۆر و كرده‌وه‌يل خوه‌يكوشى ك له‌ناونى ماوه‌يگ و ماوه‌يگ تر ئه‌كه‌فێده‌و چ وه‌ چه‌ك يا له‌ڕى سه‌ياره‌يل و ئامانجه‌يليگ وه‌پى جيوه‌جى ئه‌كريه‌ێد و ترس ئه‌خه‌نه‌ ناونى هاووڵاتيه‌يل ئه‌مريكى.

 

له‌يرا ده‌رئه‌كه‌فێد ك ئاسايش ئاده‌ميزاد له‌ مافه‌يلى ئه‌ولاتره‌، ئه‌ويش له‌وه‌ر وجوود په‌يوه‌ندى ته‌ردى ناونى وجوود ئاسايش و ده‌سه‌وه‌ركردن مافه‌يل، هه‌ر وه‌و خاتريشه‌ مافه‌يل وه‌بى ئاسايش وجوود نه‌يرن و چه‌واشه‌گه‌يشى راسه‌.

عه‌بدوڵلا جه‌عفه‌ر كوفلى