قه‌یران و مه‌ینه‌تى ئیمه‌یش وه‌رده‌وامه‌

شفق نيوز

ئیمه‌ى كورد فه‌یلى خوه‌مان له‌ سه‌ره‌تاى ئه‌و كاروانه‌ دیمنه‌و له‌ قوناغیگ  ك ده‌یه‌ها ساڵ له‌ به‌دبه‌ختى و ناهمى و كووچ وه‌پیكردن زووره‌ملى له‌لى كه‌فته‌و، ك له‌یره‌ ئیمه‌ ئاماده‌ى خوه‌مان كه‌یم ئه‌را سه‌ره‌تایگ تازه‌ له‌شوون وه‌ده‌سهاوردن "كۆتا" ئه‌را یه‌كه‌مجار له‌ ئه‌نجوومه‌ن پارێزگایه‌یل ئه‌را كورده‌یل فه‌یلى و بویمنه‌ دویا پێكهاته‌ له‌ پێكهاته‌یل ئى ملله‌ت عراقه‌ له‌وه‌رگرتن ئى ده‌سكه‌فته‌، یه‌یش قوناغیگه‌ له‌ ژیان كوڵمان ك له‌تى تویش جووره‌ها زوڵم و سته‌م هاتیم، ئمجا ئایا له‌ ژیان تر ئه‌به‌دى هایمنه‌ كاملاو چاره‌نویسمان چوین بوود؟!.

 

ئه‌گه‌ر ئیمه‌ فه‌رز بكه‌یم كه‌میگ ئومید دیریم وه‌ ئه‌وه‌ك برایه‌یل هاو مه‌زه‌و یا هاو نه‌ته‌وه‌مان به‌زه‌ییان وه‌پیمانا ئه‌یه‌ێد، ئه‌و ئومیده‌ دیاره‌ گرژى و ناخوه‌شى له‌لى كه‌فێده‌و له‌ناونى هه‌ولێر و به‌غداو ئه‌و رێڕه‌وه‌ ك گرتنه‌سه‌ى وه‌ر.  ده‌وڵه‌ت سه‌رۆك وه‌زیره‌یل هه‌ڵوێست خوه‌ى ئیچنه‌ نیشاندا ك هه‌ر گرفتێگ له‌ناونى هه‌ردوگ لایه‌ن روى بیاد بووده‌ مایه‌ى جه‌نگ ناونى عه‌ره‌ب و كورد، ماناى ئى قسه‌یشه‌ ئه‌وه‌سه‌ كورده‌یل فه‌یلى خریه‌نه‌ خانه‌ى دوشمنه‌یل. له‌وه‌رانوه‌ر ئه‌ویش كوردستان نه‌خشه‌ى ناوچه‌یل كوردستانى كیشێد و رووڵه‌یلى له‌ به‌غداو ناوچه‌یل تر ناگرێده‌و.

 

سه‌رۆك وه‌زیره‌یل ناسنامه‌ى عراقى ئه‌یاده‌ كابرایگ زوڵملیكریاگ فلستینى و كوردستانیش پێشوازى له‌ هه‌زاران كه‌س له‌ برایه‌یل په‌نابه‌ر هاونه‌ته‌وه‌مان ئه‌كا له‌گشت گووشه‌ى جه‌هان، حكوومه‌ت عراقییش ملیۆنه‌ها به‌رمیله‌ نه‌فت جوور ده‌سمه‌یه‌ت پێشكه‌ش ئه‌كاده‌ ده‌وڵه‌ته‌یل تر و كوردستانیش له‌لاى خوه‌یه‌و هه‌زاران پارچه‌ زه‌وى به‌شه‌و كردگه‌سه‌ ناو ئه‌و كه‌سه‌یله‌ ك حكوومه‌ت هه‌رێم باوه‌ڕى ئه‌وه‌سه‌ شایسته‌ى بوین! وه‌لى سه‌خته‌ ئه‌را هه‌ردوگلایان ته‌نانه‌ت كویچه‌ى بویچگیگیش وه‌ناو فه‌یلیه‌یل بنه‌ن.

 

ئه‌ڵڵاجه‌وى ها له‌وره‌ گشت كه‌سێگ دگان وه‌ ئه‌وه‌یا نه‌ن ك كورده‌یل فه‌یلى یه‌كه‌مین قوربانى و له‌وه‌رجه‌ پێكهاته‌یل تر ئه‌نفال و كووچ زووره‌ملى وه‌پیان كریاو گوزه‌یشته‌و ئاینده‌یان زه‌فت كریا، وه‌لى وه‌ختیگ له‌ حكوومه‌ت ناوه‌ندى ژنه‌فیم هه‌ر ئمتیازاتیگ  كورده‌یل فه‌یلى وه‌ریگرتنه‌ په‌نج چه‌نه‌ ئه‌وه‌ نییه‌ ك پێشكه‌شى كردنه‌ ئه‌را ئى نیشتمانه‌، وه‌هه‌مان شیوه‌ له‌ هه‌رێم كوردستانیش رووژیگ نه‌ژنه‌فتیم شوونیگ ئه‌را كورده‌یل فه‌یلى دروس بكریه‌ێد له‌ سلێمانى یا هه‌ولێر یا دهۆك، یا وه‌لاى كه‌مه‌و به‌شیگ ئه‌را رووڵه‌یلیان له‌ كۆلیژه‌یل دیارى بكریه‌ێد.

 

جه‌نگ مه‌سه‌له‌یگه‌ ك فره‌جار له‌ عراق روى ئه‌یاد، ئه‌گه‌ر خودانه‌خواسته‌ رویدا، ئه‌وه‌ بیگومان فه‌یلیه‌یل زه‌ره‌دمه‌ن گه‌وران له‌لى، چوینكه‌ زه‌مانه‌تیگ نییه‌ ئه‌را ئه‌وه‌ك زوڵم له‌لیان نه‌كریه‌ێدو زه‌مانه‌تیگیش نییه‌ له‌ حاڵه‌تێگ ئه‌گه‌ر دوباره‌ له‌ زێدو ماواى خوه‌یان ده‌ركریان بگرێده‌یانه‌ خوه‌ى. هه‌ر له‌وه‌ر ئه‌وه‌یش دوینید ئیمه‌ له‌ گشت گفتوگووه‌یل سیاسى هساو ئه‌رامان نه‌كریاگه‌و له‌گشت جه‌نگیگ ئیمه‌ كریه‌یمنه‌ ئاگردوى و هه‌ر یه‌یش ئیچنه‌ كردگه‌ كه‌سه‌یلیگ وه‌ئاشكرا بویشن ئه‌گه‌ر هات و جه‌نگ ده‌سكرده‌پى ئه‌وه‌ شوون كورد له‌به‌غدا نیه‌وده‌و، ئمجا ئیمه‌یش وه‌پیان ئویشیم: ئیوه‌ ساڵه‌یل فره‌یگ له‌ ژیانمان داگیر كردین و رووژگاریگیش ئه‌رامان بیلنه‌و له‌ى دونیا ك شایه‌ت كوتا هه‌رچه‌نى فره‌یش دویاكه‌فت كلیل فه‌ره‌جیگ یا ده‌روازه‌یگ برایه‌تى بوود ئه‌رامان و بتویه‌نیم له‌ژێر سایه‌ڕكیى مه‌شق هه‌قه‌یل هه‌ڵوژاردن بكه‌یم.

 

نه‌ته‌وه‌و مه‌زه‌وه‌گه‌مان هیشته‌مان له‌ناوڕاس گه‌رده‌لویل بووسیه‌یم و چوین چوینیم بێده‌نگ بویم له‌لى؟ ئایا وه‌رگه‌ى ئاكامه‌یل پڕ كاره‌ساتى گریم؟ هه‌ر له‌وه‌ر ئه‌وه‌یش ئیمه‌ یه‌كه‌مین كه‌سیم داواى ئه‌وه‌ كه‌یم هویچ قاپییگ له‌ قاپیه‌یل جه‌نگ واز نه‌كریه‌ێد ك بووده‌ بایس له‌ده‌سداین هه‌زاران گیان و رشانن خوین بیتاوانه‌یل، ئیمه‌ ئومیده‌واریم هویچ كیشمه‌كیشیگ له‌ چوارچیوه‌ى ئاشتیانه‌ ده‌رنه‌چوود وه‌ره‌و تون و تیژى، یه‌یش نه‌ك هه‌ر خواست ئیمه‌س وه‌ته‌نیا، به‌ڵكوو خواست گشت ئه‌وانه‌سه‌ ك ترسیه‌ن ئه‌ڕا رووڵه‌و براو باوگ و ملله‌تیان، ئه‌گه‌ریش خودانه‌خواسته‌ هه‌ر قه‌ده‌ریگ كه‌فت كورده‌یل فه‌یلى چ ده‌سڵاتیگ دیرن بیجگه‌ خودا.

 

عه‌لى حسێن فه‌یلى

ج. ا