ئێڵ به‌گی كاملايی بويه‌؟

شفق نيوز

وه‌لی وه‌ل ئه‌وه‌يشا باسيگ تر ئاماژه‌ وه‌ ئه‌وه‌ ئه‌كا ك شاعر له‌ سه‌رده‌ميگ تر و له‌ شوونه‌يليگ تر ژياگه‌، يه‌يش وه‌و ماناسه‌ ك ساڵ له‌ دايگبوينشی وه‌ گووره‌ی ئی قسه‌يله‌ جی گومانه‌، چوينگه‌ نويسه‌ر و تاريخناسه‌يل كووك نيين له‌بان شوون ژيان و ساڵ وه‌ دونياهاتن ئی شاعر ناودار كورده‌.

له‌ی باوه‌ته‌و كه‌سه‌يليگ هه‌ن باس له‌وه‌ ئه‌كه‌ن ك ئێڵ به‌گی جاف له‌ ئاوايه‌يل شله‌و زالوب ژياگه‌ له‌ ناوچه‌ی سنجاوی سه‌ر وه‌ كرماشان و دوياخريش له‌وه‌خت جايه‌ڵی رويكرده‌سه‌ ناوچه‌ی هه‌ورامان و له‌ورا ژيان هاوسه‌ری دامه‌زرانگه‌و جيگير بويه‌.

ئه‌گه‌ريش ته‌ماشای زانياريه‌يل تر يارسان بكه‌يم، دوينيم ك ئێڵ به‌گی جاف ريڕه‌و سۆفيگه‌ری يارسانه‌يل په‌يڕه‌و كردگه‌و جوور شاعريگ له‌ سه‌رده‌م خوه‌ی هوير و فكره‌يگ وه‌رفراوان داشتگه‌ ئه‌را ئاينده‌و رويداگ و پيشهاته‌يلی و تويه‌نستگه‌ ديد خوه‌ی ئه‌را ئاينده‌ی رووژگاره‌يل تر وه‌ شعره‌و باس بكا.

ئێڵ به‌گی كاملايی بويه‌؟ هويچ كيشه‌و گرفتيگ له‌وه‌ نيه‌ ك ئی شاعره‌ سه‌ر وه‌ كام تايفه‌و چين و مه‌زه‌ويگ بويه‌، چوينكه‌ وه‌هه‌ر جووريگ ته‌ماشای هونه‌ره‌گه‌ی و ئه‌ده‌بياتی بكه‌يم هه‌ر خزمه‌ت وه‌ ملله‌ته‌گه‌ی كردگه‌و شعره‌ ناوداره‌گه‌يشی(هەروا بووە و هەروا ئەبێ)پله‌و پايه‌ی به‌رزيگ ئه‌رای جيگير كردگه‌ له‌ناو لاپه‌ڕه‌يل مێژوو ئه‌ده‌ب كوردی و له‌و شعر دوير و دريژه‌ وه‌ جوانی باس له‌ سه‌رده‌مه‌يل دويای خوه‌ی كردگه‌ قوناغ وه‌ قوناغ.

ته‌نانه‌ت باس له‌ هاتن رووس و بريتانياو سه‌رده‌م قاجار و جه‌نگ ئيران و سه‌رهه‌ڵداين ته‌ياره‌و تووپ و تانك و كه‌ره‌سه‌يل جوراوجوور سه‌ربازی كردگه‌و هه‌ر له‌و سه‌رده‌م كويه‌نه‌ پيشبينی ئه‌را په‌يابوين ئی كه‌ره‌سه‌و جه‌نگ كيشمه‌كيشه‌ كردگه‌و ئه‌وه‌سه‌ زوورم پيشبينيه‌يلی وه‌ ته‌مامی هاتنه‌سه‌ دی.

ئێڵ به‌گی له‌ هه‌مان وه‌خت باس له‌ داب ونه‌ريت كوومه‌ڵايه‌تی و ره‌فتار و هه‌ڵسووكه‌فت ئاده‌ميزاديش كردگه‌ له‌ رووژگار ئاينده‌، ك ئيسه‌يش ئه‌و قسه‌يليه‌ ك وه‌ شعره‌و باسيان كردگه‌ بويه‌سه‌ مايه‌ی سه‌رسامی مه‌ردم و شوون خوه‌ی له‌ رووژگار ئمڕوو كرده‌سه‌و.

جه‌ماڵ ئه‌ركه‌وازی