كاره‌ساتێگ وه‌ ناو ڕووشنهویرى

شفق نيوز

فه‌قیرو ژارن، ناتویه‌نن  بنه‌وا دروس بكه‌ن و فكر جیوه‌جیكردن پرۆژه‌یلیان مه‌زوك مینن، دیاره‌ ك به‌ش ده‌وڵه‌ت له‌ روشنهویرى له‌شكرێگ كارمه‌نده‌ ك دوكوت فیشتریان وه‌ رووژه‌ رێ له‌ كار ڕووشنهویرى دویرن و ته‌نیا جوور سه‌رچاوه‌ى ژیان نووڕنه‌ ئى كاره‌، له‌ لایه‌گ تر هه‌ر ساڵ جه‌نگێگ گه‌رم له‌ باوه‌ت دیاریكردن به‌ش بوودجه‌ى ده‌زگایه‌یل ئاسایش ئى وڵاته‌ له‌ وه‌راوه‌ر ده‌زگایه‌یل خزمه‌تگوزارى و ڕووشنهویرى دووباره‌و بوود ك  وه‌ سوود ده‌زگایه‌یل ئاسایش و میلیتاریزم ته‌مام بویه‌، خه‌رج گشت چالاكیه‌یل ساڵێگ  وه‌زاره‌تێگ  جوور رووشنهویرى چه‌نه‌ پویلێگ نییه‌ ك ئه‌راى له‌شكرێگ سه‌ربازى خه‌رج ئه‌كریه‌ید! له‌شكرێگ ك رووشنهویرى سه‌ربازى نه‌یاشتوود، دیاره‌ ده‌سكه‌فتێگ گه‌وراى سه‌ربازى و ئاسایشى نێرێ!

 

ئه‌گه‌ر بڕیار بوود له‌ جیات حكوومه‌ت و كارمه‌نده‌یلى ته‌نیا رووشنهویر سه‌روه‌خوه‌،  خزمه‌ت وه‌ رووشنهویرى و ئاوه‌دانى  فكر بكه‌ن و چه‌كدار ئێڵ و هووزه‌یل له‌ جیات سه‌رباز ئاسایش ئى وڵاته‌ بپارێزێ ئمجا ئى حكوومه‌ته‌ بیجگه‌ له‌ ته‌ماشاچییه‌گ بێ خه‌م وه‌ چه‌ ناوى بوه‌یمن؟!

ئه‌وه‌ له‌ باوه‌ت رووشنهویرى ئمجا زانیمن ك له‌ باوه‌ت كوچكریاگه‌یل عراق دویه‌م وڵات دنیاس له‌ جه‌هان وه‌لى وه‌زاره‌تێگ جوور كووچبه‌رێل ده‌رد و مه‌ینه‌تیه‌یل ئاواره‌و ده‌روه‌ده‌ریل ته‌نیا وه‌ به‌تانیێگ پوشنێ، ئمجا سه‌فه‌ر كارمه‌نده‌یلى ئه‌راى وڵاته‌یلیگ ك ئاواره‌ى عراقى ها له‌ تیان وه‌ ده‌سكه‌فت زانێ، ئه‌گه‌ر نه‌یشیمن گه‌شته‌ڵى دى باس چه‌ بكه‌یمن.

ده‌رد ئه‌وه‌سه‌ ئه‌وه‌ چه‌ن نموونه‌ بى له‌ ده‌زگایه‌یل حكوومه‌ت  ك زه‌وق و هویر و ئراده‌ى پاوه‌جى نێرن و بڕیارو پرۆژه‌یل كوشن.

چه‌واشه‌ى گوزه‌یشته‌ و وه‌رژه‌ ده‌وران سیه‌ى دیكتاتورى ك له‌ تاریخ سیاسى، كومه‌ڵایه‌تى و بازرگانى و فه‌رهه‌نگى و هونه‌رى ئى وڵاته‌ گشت لایه‌نێگ هاوبه‌ش بین ئمڕوو ته‌نیا قسیه‌ و خه‌یاڵ هاوبه‌شه‌ له‌ ناونى حكوومه‌ت و حزب و رێكخریاگه‌یل و پێكهاته‌یل فه‌رهه‌نگى و نه‌ته‌وه‌یى و دینى و سیاسى! یه‌ كاره‌ساتێگه‌ كه‌ نه‌ نویسنێ و نه‌ خوه‌ننێ وه‌لى له‌ ئایه‌نده‌ چه‌ورێمان ئه‌كا.

 

عه‌لی حوسێن فه‌يلی