هاووڵاتى له‌ناونى شكه‌ست وه‌زیره‌یل وه‌رین و قه‌وڵ وه‌زیره‌یل تازه‌

شفق نيوز

ئه‌نجامداین كاره‌یلیان و به‌عزیگ  له‌لیان تا ئیسه‌یش كاره‌یل تازه‌یان وه‌رنه‌گرتنه‌ تا قه‌وڵه‌یل خوه‌یان بارنه‌جى ئه‌را جى وه‌جیكردن كاره‌یلیان ك عراق به‌یگه‌ ڕز ده‌وڵه‌ته‌یل پیشكه‌فتگه‌وه‌، ئمجا ئه‌و قه‌وڵه‌یله‌ ك دریا جویر قه‌وڵ زیایكردن به‌رهه‌م نه‌فتى بگر تاهه‌وڵداین وه‌زیره‌یل ئه‌را له‌ناوبردن و زاڵبوین له‌بان گه‌ناته‌كارى و نه‌هیشتنى له‌بان خاك عراق.

داخه‌گه‌ له‌یرا ئه‌وه‌سه‌، ئه‌و گفت و قه‌وڵه‌یله‌ وه‌ل خراوبوین سه‌رچه‌وه‌یل كاره‌باو بڕیان كاره‌بایا له‌زوورم ناوچه‌یل پایته‌خه‌ته‌گه‌یا دریا.ئمجا مه‌هانه‌ى وزاره‌ت كاره‌با جویر گشت جاریگ  ئه‌وه‌سه‌ ك ئویشن هه‌وه‌جه‌یل دابینكردن كاره‌با دیریم، وه‌لى له‌وه‌ر كاره‌یل تیرۆرستى نیه‌ویریم، یه‌یش جویر هه‌مان قسه‌ى وه‌زیره‌یل وه‌رین كاره‌با ك شكه‌ست هاوردن له‌خاسه‌وكردن ئه‌و خزمه‌ته‌و بیجگه‌ ئه‌وه‌یش هه‌میشه‌ وتیان كیشه‌ى هونه‌رى(خلل فنی) په‌یا بویه‌ له‌كاره‌با. یا وه‌رجه‌ ماوه‌یگ  ژنه‌فتیم ك سه‌رچه‌وه‌یگ  وه‌رپرسه‌وه‌ له‌ وزاره‌ت كاره‌با گوایا وه‌ بوونه‌ى كیشه‌یگ  هونه‌ریه‌وه‌ ك بویه‌سه‌ مایه‌ى خراوبوین سه‌رچه‌وه‌ى كاره‌باوه‌ (1000 میگاوات) فه‌وتیاگه‌.

ئایا له‌وه‌رچه‌ ئى جووره‌ كیشه‌و گرفتیگ  په‌یا بووگ له‌لامان له‌وه‌ختیگ  ده‌وڵه‌ته‌یل هاوسا ئه‌وه‌نه‌ى ئیمه‌ دارایى و تواناى ئنسانى نه‌یرن و ئه‌ڕا ته‌نیا چركه‌یگیش كاره‌بایان نیه‌وڕیه‌یگ ؟ ئایا چ كاره‌یلیگ  جى وه‌جى كریا له‌ماوه‌ى هه‌فت ساڵ گوزه‌یشت وه‌تایبه‌ت له‌ مانگ  نیسان 2003 تائیسه‌و ئایا ئه‌و هه‌مگه‌ ملیاره‌ دۆلاره‌یله‌ چیه‌ كوورا ك تایبه‌ت كریا ئه‌را وه‌زیر كاره‌باى وه‌رین یا وه‌زیره‌یل وه‌رجه‌ ئه‌و، ك دوان له‌لیان وه‌بڕه‌ پویل فره‌یگه‌وه‌ هه‌یواین دویاى ئه‌وه‌ك قه‌وڵ خاسه‌وكردن به‌رهه‌م كاره‌با دانه‌ هاووڵاتیه‌یل عراقى؟ ئومیده‌واریم ئیسه‌و دویا وه‌زیره‌یل حكوومه‌ت تازه‌ وه‌ڕاسى قه‌وڵه‌یلیان جى وه‌جى بكه‌ن و هویچ وه‌ختیگ  دریغى نه‌كه‌ن له‌خزمه‌تكردن ملله‌ت عراق. چوینكه‌ وه‌رجه‌ ماوه‌یگ  لوجنه‌ى ده‌سپاكى له‌ دویا ته‌سریحى ئاشكراى ئه‌وه‌ كرد ك ئه‌و 90 له‌سه‌ده‌ ك ئه‌را پرووسه‌یل بنیاتناین تایبه‌ت كریا گشت وه‌سه‌به‌ب گه‌ناته‌كاریه‌وه‌ تاڵان كریا، ك یه‌یش كیشه‌ى سه‌ختیگه‌ له‌وه‌زع عراق. مه‌عناى ئه‌وه‌سه‌ قه‌وڵداین بى جى وه‌جیكردن هویچ فایده‌یگ  نه‌یریگ  و له‌یرا تویه‌نیم بویشیم: ئه‌گه‌ر بایگ و ئه‌و گه‌ناته‌كاریه‌ بنبڕ نه‌كریه‌یگ ، ئه‌وه‌ك له‌ وزاره‌ت كاره‌با ڕویدا له‌گشت وزاره‌ته‌یل تر ڕویده‌یگ.