دووسه‌یل كورد له‌ به‌غدا

شفق نيوز

  كورد نه‌خشیگ گرینگ و سه‌ره‌كى دیه‌ له‌ دامه‌زرانن عراق نوو، وه‌ جووریگ كورد ده‌سمیتده‌ر بویه‌ ئه‌را سه‌رله‌نوو دروسكردن عراقیگ دیموكراسى ك ئه‌تویه‌نیم بویشیم ئه‌گه‌ر كورد و سه‌ركرده‌یلى نه‌ویاتان، عراق وه‌ هویچ جووریگ له‌شوون پرووسه‌ى ئازادى نه‌ڕه‌سیه‌ ئى رووژه‌و لایه‌نه‌یل ناو عراقیش نه‌گونجیان وه‌ یه‌كه‌و، وه‌لى سه‌ركرده‌یل كورد وه‌تایبه‌ت جه‌ناب سه‌رۆك بارزانى و مام جه‌لال تویه‌نستن نه‌خش گه‌وراو مێژوویى نیشان بیه‌ن ئه‌را چاره‌سه‌ركردن كیشه‌یل عراق و سه‌رله‌نوو پرووسه‌ى سیاسى وه‌ شیوازیگ دیموكراسى گوزه‌ر بكا.

فریه‌جاریش سه‌ركرده‌یل عراق وه‌ یار و نه‌یاره‌و دگان وه‌و راسى حاشا هه‌ڵنه‌گره‌ نانه‌، ك هه‌رێم كوردستان وه‌ گشتى و سه‌ركرده‌یل كورد وه‌ تایبه‌ت بوینه‌سه‌ مایه‌ى دروسكردن حكوومه‌ت و ده‌وڵه‌ عراق، هه‌ر ئه‌وه‌یش له‌یوا كرد قوربانى بیه‌ید و ده‌س له‌ پۆست و پله‌و پایه‌یل فریه‌یگى هه‌ڵگرید ئه‌را ئه‌وه‌ك پرووسه‌گه‌ نه‌وسیه‌یدو بار عراق سه‌خته‌و نه‌ود.

كیشه‌ى سه‌ره‌كى ئیمه‌ى كورد وه‌ل به‌غدا ئه‌وه‌سه‌، ك ئه‌وان ئه‌و رووژه‌یله‌ له‌ هویریان نیه‌مینید ك چوین سه‌ركرده‌یل كورد كه‌فتوینه‌ خزمه‌ت پرووسه‌ى سیاسى عراق و گونجانن لایه‌نه‌یل، هه‌ر ئه‌وه‌یش له‌یوا كرد ك دووسه‌یلمانیش له‌ كاره‌یل چاره‌نویسساز خوه‌یان ناكه‌نه‌ خاوه‌ن قه‌وڵه‌یلیان و هاوبه‌شى له‌ نیشتمان فه‌رامووش كردنه‌و دویا كرده‌وه‌یانیش هه‌ڕه‌شه‌ى بڕین له‌ به‌شه‌ بودجه‌گه‌ى كوردستان كه‌ن له‌ جه‌م بودجه‌ى عراق وه‌گشتى و سزاداین وه‌ جه‌م مه‌ردم هه‌رێم كوردستان، ك یه‌یش جى سه‌رسوڕمه‌نینه‌ له‌جیاى هاوكاریكردن هاووڵاتیه‌یل كوردستان و به‌رز نرخانن نه‌خش كورد و حكوومه‌ت هه‌رێم له‌ گشت ئه‌و قوربانیه‌یله‌ ك له‌وه‌ر خاتر سه‌روه‌خوه‌یى عراق و دروسكردنه‌وه‌ى سزا بدریه‌ن.

هه‌ر ئه‌و رووژه‌یل گوزه‌یشته‌ بوین ك ملله‌ت و حكوومه‌ت هه‌رێم پیشوازى له‌ هه‌زاران ئاواره‌ كردیاد له‌ناوچه‌یل ناوڕاس عراق ك له‌وه‌ر كیشمه‌كیش سیاسى و شیویان بار ئاسایش ناوچه‌یلیان هیشتنه‌ جى و ڕوى له‌ هه‌رێم كوردستان كردیان و گشت ئه‌و ئاسانكارى و ده‌سمیه‌تیشه‌ پیشكه‌ش كریاگه‌ ئه‌رایان.

ئنجا له‌ جیاى بڕین بودجه‌ى كوردستان، بایه‌سه‌ بوى نورى مالكى سه‌رۆك وه‌زیره‌یل عراق به‌شه‌ بودجه‌ى ئه‌و هه‌زاران ئاواره‌ى عه‌ره‌به‌ ك جوور ئاواره‌ روى كردنه‌سه‌ شاره‌یل هه‌رێم كوردستان و له‌بان بودجه‌ى هه‌رێم ژیه‌ن، بخستیاده‌ بان به‌شه‌ بودجه‌ى هه‌رێم نه‌ك هه‌ڕه‌شه‌ى بڕینى بكا.

له‌شوون په‌یابوین كیشه‌یل ناونى هه‌رێم و به‌غدا، فراكسیۆنه‌یل ناو په‌رله‌مان و هیزه‌یل سیاسى عراق گشتیان یه‌ك هه‌ڵویستن وه‌رانوه‌ر هه‌رێم كوردستان، فریه‌جار ئیمه‌ى كورد باس له‌ دووس و هاوپه‌یمانه‌یلمان ئه‌كه‌یم له‌ عراق، وه‌لى جى داخه‌ ئه‌را هه‌ر مه‌سه‌له‌یگ هسیار و هه‌ر خواستیگ ره‌واى ملله‌ته‌گه‌مان هیزه‌یل به‌غدا ئه‌گه‌ریش له‌ناو خوه‌یان یه‌ك هه‌ڵویست نه‌ون، ئه‌وه‌ له‌ وه‌رانوه‌ر هه‌رێم كوردستان هه‌ڵویستیان یه‌كیگه‌، هه‌ر وه‌و خاتریشه‌ هه‌ق ئه‌وه‌سه‌ سه‌ركردایه‌تى سیاسى كورد ئه‌و رووژه‌یله‌ بخه‌نه‌ هویر ئه‌وان ك ئه‌وه‌ك خه‌مخوه‌ر عراقه‌ ته‌نیا كورده‌و ئه‌وان ته‌نیا ئه‌را به‌رژه‌وه‌ندى خوه‌یان روى له‌ هه‌رێم كوردستان كه‌ن.

قائید میرۆ

ج . أ