كورده‌یل فه‌یلى، قه‌یران ناسنامه‌ له‌ناونى نه‌ته‌وه‌و مه‌زه‌و

شفق نيوز

* ئه‌مانه‌ت و دڵسووزى: ئى چشته‌ ئاشكراس له‌لى كورده‌یل فه‌یلى ك دڵسووزن و جى متمانه‌ن و شایه‌تى له‌بان ئه‌وه‌یش ئه‌وه‌سه‌ ك زوورم حزبه‌یل شیعه‌ ئى جووره‌ مه‌ردمانیگ له‌وه‌ر به‌رژه‌وه‌ندى خوه‌یان هاوردنه‌ كار له‌وه‌خت هس مه‌زه‌وى و خوه‌شه‌ویسییان ئه‌را ئه‌هلولبه‌یت و هه‌ر له‌وه‌ر ئه‌وه‌یش دژ رژیم سه‌دام هاوریانه‌ كار له‌ ئیرانه‌و، چوینكه‌ ئه‌و حزبه‌یله‌ دڵسووزى بیگومان ئى مه‌ردمانه‌و خه‌یانه‌ت نه‌كردنیان له‌وه‌رچه‌و گرتیان، وه‌لى جى داخه‌ حزبه‌یل هیشتنه‌یانه‌ جى له‌وه‌ختیگ  ئاره‌زووه‌یلیان هاته‌دى و ره‌سینه‌ ده‌سڵات.

 

* ئاشتیخواز: مه‌حاڵه‌ كوردیگ فه‌یلى بوینید شه‌ڕانى یا مه‌یل كیشمه‌كیش و كیشه‌و گرفت داشتوود، فه‌یلیه‌یل هه‌میشه‌ ئاشتیخواز بوینه‌ وه‌شیوه‌ى وه‌رفراوانیگ و ته‌نانه‌ت ئه‌گه‌ر له‌بان هساو هه‌قه‌یل خوه‌یانیش بویه‌.

 

* كورده‌یل فه‌یلى دژ تونڕه‌وى بوینه‌و ته‌نانه‌ت له‌وه‌خته‌یل تایفه‌گه‌رییش له‌ عراق ئه‌وان بیلایه‌ن بوینه‌ له‌ى مه‌سه‌له‌و هه‌میشه‌ مقه‌یه‌تى له‌ یه‌كسانى ناونى نه‌ته‌وه‌و مه‌زه‌و خوه‌یان كردنه‌و یه‌یش سفه‌تیگ ستراتیجى كورده‌یل فه‌یلیه‌.

 

* كورده‌یل فه‌یلى كه‌ره‌مدارن، ك یه‌یش سفه‌تیگ گشتیه‌ له‌ ملله‌ت عراقى، وه‌لى ئى سفه‌ته‌ له‌لاى كورده‌یل فه‌یلى فراوانه‌ تا ڕاده‌ى فیشتریگ .

 

* ژن فه‌یلى وه‌فادار و دڵسووزه‌ ئه‌را هاوسه‌ر و خیزانه‌گه‌ى تارَاده‌یگ گیان خوه‌یشى بكاده‌ قوربانى ئه‌ڕایان، ك وه‌ل ئه‌وه‌یشا تویش زوڵم و سته‌م فره‌یگ هاتن، وه‌لى جوور داره‌ خورمایه‌یل عراق سه‌ریان هه‌ر به‌رز بوى و سه‌بر فره‌یگ دانه‌ خوه‌یان له‌ ئاكام ئه‌و كووچ وه‌پیكردن و بى سه‌روشوونكردن روڵه‌یلیانه‌.

 

له‌ دید سه‌دام حسێن و حزبه‌ شۆفینیه‌گه‌ى، مه‌ترسى كورده‌یل فه‌یلى له‌ى خاڵه‌یله‌ بوى:

- له‌وه‌ر ئه‌وه‌ك كورد بوین دى زه‌حمه‌ت بوى ئه‌را باوه‌ڕ وه‌پیان بارید ئنتما بكه‌ن ئه‌را حزبیگ عرووبى نه‌ته‌وه‌یى جوور حزب به‌عس، ك هه‌رچه‌نى حزب به‌عسیش ماوه‌ى فره‌یگ جڵه‌و ده‌سڵات وه‌ده‌سیه‌و بوى.

- له‌وه‌ر ئه‌وه‌ك زوورمیان شیعه‌ بوین و یه‌یش مه‌حاڵه‌ باوه‌ڕ وه‌حزبیگ بارن خوه‌ى وه‌به‌شیگ له‌ ئسلام سنى بزانید وه‌ل ریز و حورمه‌تم ئه‌را سنیه‌یل و باقى پیكهاته‌یل تر عراق.

- له‌وه‌ر ئه‌وه‌ك هه‌ر له‌ساڵه‌یل په‌نجاى سه‌ده‌ى وه‌رین كورده‌یل فه‌یلى بازاڕه‌یل شۆرجه‌ وه‌ده‌س خوه‌یانه‌و بوى و زوورم بازرگانه‌یل كورد فه‌یلى حوكم وه‌ بازاڕ و ئابوورى عراق كردیان.

- كورده‌یل فه‌یلى جوور ئه‌وه‌ك ئشاره‌ت وه‌پى كردیم، وه‌فاو دڵسووزى داشتن ئه‌را نه‌ته‌وه‌و مه‌زه‌وه‌گه‌یان، بیگومان ئى سفه‌ته‌یلیشه‌ نگه‌ران بوى ئه‌را رژیم سه‌دام و جوور هه‌ڕه‌شه‌یگ راسه‌وخۆ بوى ئه‌را حوكم به‌عس له‌ عراق.

 

عه‌باس فه‌یلى

ج . أ