خانه‌قین پایته‌خت دیاله‌س‌

شفق نيوز

تايبه‌ت له‌و به‌شه‌گ تايبه‌ته‌ وه‌په‌يوه‌ندی پارێزگايل وه‌ل حكومه‌ت سه‌رۆك وه‌زيره‌يل نوری مالكيا.‌

 

پارێزگار دياله‌(عه‌بدلناسر مه‌هداوی) چه‌ن هه‌فته‌ێگه‌ له‌ به‌عقوبه‌ وايه‌و له‌ خانه‌قين جی گرتيه، ئه‌را ئه‌وه‌ ك له‌ی هه‌لومه‌رجه‌ی ئيسه ك هه‌س، خانه‌قين له‌ به‌عقوبه‌ سه‌قامگيرتر و سه‌لامه‌ت تره‌كه‌.‌

مه‌هداوی له لای له‌يواسه‌ ك به‌عقوبه‌ له‌ يه‌ ده‌رچيه‌ ك بتوانيد چوی پارێزگارێگ ئه‌ڵوژيای و خاوه‌ن ده‌سڵات كار له‌تێ بكا.

وه‌سه‌رهات هانابردن ئه‌را خانه‌قين فره‌تره‌ك په‌يوه‌ندی وه‌ مه‌سه‌له‌ی دروس بوين هه‌رێمه‌يل ديرێد، چوين ك مه‌هداوی و فره‌ له‌ ئه‌ندامه‌يل ئه‌نجومه‌ن پارێزگای دياله‌ لايه‌نگر پرۆژه‌ی دروس بوين هه‌رێم له‌ پارێزگای دياله‌ن. له‌ی روييه‌و، وه‌ ئه‌ساس ئه‌و ميكانيزمه‌يله‌ ك ياسای پێكهاوردن هه‌رێمه‌يل دانريايه‌، داوای فه‌رمی پێشكه‌ش وه‌ سه‌رۆك وه‌زيره‌يل كردنه‌.

وه‌لی سه‌رۆك وه‌زيره‌يل له‌ جياڵی وه‌گ ئه‌ی داوا ئه‌را كۆمسيۆن ئه‌ڵوژانن كلێ بكا، شيعه‌يل دياله‌و لايه‌نگره‌يل خوه‌ی هاندا تا خوه‌يپيشاندان دژ وه‌ پرۆژه‌ی فيدراليزم ساز بكه‌ن و په‌لامار بينای پارێزگای دياله‌ بيه‌ن و داگيرێ بكه‌ن‌.

مه‌هداوی له‌ به‌عقوبه‌ له‌ گيان خوه‌ی دڵنيا نيه‌، چوين ك وه‌ختێگ خوه‌يپيشانده‌ره‌يل نارازی شيعه‌ په‌لاماره‌ بيناگه‌ی دان، پۆليس و ئاسايش و سوپا نه‌توينستن بره‌سنه‌ هانای، خوه‌يشێ له‌ وه‌دڵنياس ك ته‌مام هێزه‌يل ئاسايش و پۆليس و هێزه‌يل چه‌كدار له‌ دياله‌ هانه‌ ژێركۆنترۆڵ شيعه‌يل ولايه‌نگره‌يل مالكی. هه‌ ئه‌را يه‌يشه‌ هێمان دودوڵه‌ له‌ هه‌ڵه‌وگه‌رديان ئه‌را به‌عقوبه‌!.

مانگ گوزه‌يشته‌، مه‌هداوی داواێگ فه‌رمی پێشكه‌ش وه‌ سه‌رۆك وه‌زيره‌يل عيراق ئه‌را نه‌قل كردن ئه‌ركه‌يل ئيداری له‌ به‌عقوبه‌ ئه‌را خانه‌قين كرد، چه‌ن مه‌رجێگيش ئه‌را هه‌ڵه‌وگه‌رديان وه‌ به‌عقوبه‌ نا، له‌وانه‌ پێكهاوردن هێزێگ ئه‌را پاراستن بينايل پارێزگا و  ئه‌نجومه‌ن پارێزگايش(ئه‌ی چنه‌ داوايگيش خوه‌ی به‌ڵگه‌ی له‌ نه‌وين متمانه‌ وه‌ هێزه‌يل پۆليس و ئاسايش له‌ ناو ئه‌ی پارێزگاسه‌).

هه‌روه‌يجووره‌يشه‌ داوا كرديه‌، فه‌رمان ده‌سگيركردن ئه‌ندامه‌يل ئه‌نجومه‌نی پارێزگای دياله‌هه‌ڵوه‌شێنده‌و، ‌گشت ئاژاوه‌ئه‌ونه‌ره‌يل ك ته‌ماميان سه‌ر وه‌ليست ده‌وڵه‌ت ياسان، بچنه ‌وه‌رده‌م دادگا.

تا ئيسه‌يش هويچ به‌ڵگه‌ی له‌ بان يه نيه‌ ك ماڵكی ئاماده‌ بوود، داوايل مه‌هداوی جيوه‌جی بكا و وه‌پێشی ناچێ نياز پێشكه‌ش كردن هويچ پێشنيازێگ ئه‌را چاره‌سه‌ كردن ئه‌ی كێشه‌يشه‌ داشتوود.

مالكی وه‌بێ مسۆگه‌ر بوين په‌شيمانی ته‌مام و يه‌كجاره‌كی له‌ پرۆژه‌ی دروسكردن هه‌رێم، هويچ گام تره‌ك ئه‌را چاره‌سه‌ری ئه‌ڵ ناگرێ.

له‌ گه‌وهه‌ريش، ته‌مام ستراتيژی سياسی ماليكی له‌ سه‌ربنه‌مای شكست هاوردن وه‌ پرۆژه‌يل دروسكردن هه‌رێمه‌يله‌، تاكتيك په‌يڕه‌وكريايش له‌ی باوه‌ته‌، فره‌وه‌و كردن ده‌سڵاته‌ي ئه‌نجومه‌ن پارێزگايل ئه‌را مه‌به‌س له‌هويره‌وبردن و فكره‌و نه‌كردن وه ‌پرۆژه‌ی دروسكردن هه‌رێمه‌. فره‌ له‌ پارێزگايليش دڵخوه‌ش بوينه‌ وه‌ پرۆژه‌ی فره‌وه‌و بوين ده‌سڵاته‌يليان، وه‌لی ئه‌وه‌گ سه‌رۆك ئه‌نجومه‌ن باڵای ئيسلامی(عه‌مار حه‌كيم) له‌ رووژ چوارشه‌ممه‌ی گوزه‌يشته ‌وت، هويچ ئوميدێگ ئه‌را پرۆژه‌ی فره‌وه‌و كردن ده‌سڵات پارێزگايل نامێنێد.

حه‌كيم وت: جی داخه‌ ك هه‌مواركردن ئه‌ی دوياييه له‌بان‌ ده‌سڵات ئه‌نجومه‌ن پارێزگايل، له‌جياڵی وه‌گ ده‌سڵات كه‌م ئه‌نجومه‌نه‌يل فره‌تره‌ بكريه‌يد، كه‌متره‌و ئه‌كا‌.

يه‌يشه‌ وه‌رپرسياريه‌تی گه‌ورا له‌ باوه‌ت پارێزگاری كردن له‌ ده‌ستوور و ده‌سڵاته‌يله‌ ده‌ستووری حكومه‌ت لۆكاڵيه‌يل و ئه‌نجومه‌ن پارێزگايل ئه‌خاده‌ سه‌رشانمان.

ئه‌ی چنه‌ قسه‌يليگ وه‌ دو چشت ئيشاره‌ ئه‌كا، يه‌كم ئه‌وه‌سه‌ ك قه‌وڵ فره‌وه‌و كردن ده‌سڵات پارێزگايل هويچ له‌لێ سه‌و‌نزه‌ نه‌ويه‌و ماليكی په‌شيمانه‌و بويه‌و ئه‌وه‌ی تره‌كيش ئه‌وه‌سه‌ ك حه‌كيم خوه‌ی ها سه‌ر ئه‌ی باوه‌ڕه‌ ك ده‌ستوور و ديموكراسی له‌ عيراق هويرده‌ هويرده‌ ئه‌كه‌فنه‌ وه‌ر هه‌ڕه‌شه‌.

ئه‌ی مه‌سڵانه‌، ته‌ماميان وه‌يه‌كه‌و به‌سيانه‌و هويچ كاميان له‌ ئه‌وه‌كه‌ی تره‌ك جياوه‌و ناده‌ی. له‌ باوه‌ت دياله‌يش، له‌يوا وه‌ پێ چوود ك تا ئه‌و وه‌خته‌ ك‌ چاره‌سه‌رێگ گونجيای ئه‌را په‌يوه‌ندی گرژێگ ها له‌ ناونی به‌غداو به‌عقوبه‌ بوينيه‌يده‌و، خانه‌قين وه‌ شێوه‌يگ وه‌ختی چوی پايته‌خت دياله‌ بمێنێدو پارێزگارو فره‌يش له‌ ئه‌ندامه‌يل ئه‌نجومه‌ن پارێزگايش له‌وره‌ بمينن و ئه‌ركه‌يل ئيداری خوه‌يان له‌وره‌ وه‌ جی بارن، مه‌سه‌له‌ی‌ ئه‌وه‌گ يه‌ تاكه‌ی وه‌ی جووره‌ وه‌رده‌وام ئه‌ده‌ی، چشتێگه‌ ك كه‌س ناتوانێ وه‌ هويردی پێشبينی بكا.

فه‌رید ئه‌سه‌سه‌رد‌