وه‌رزش و هس نه‌ته‌وایه‌تى

شفق نيوز

  مه‌ردمانیگ هه‌ن له‌یوا هویره‌و كه‌ن ك وه‌رزش ته‌نیا ئه‌را وه‌سه‌ربردن وه‌خت و كاریگ بى مه‌رام و بى به‌رهه‌مه‌، وه‌لى له‌ڕاسى وه‌رزش بیجگه‌ ئه‌وه‌ك هه‌وه‌جه‌ى گرینگیگه‌ ئه‌را ته‌ندروسى گشت كه‌سیگ ، وه‌ل ئه‌وه‌یشا سیمایگ شارستانى و چالاكى خاسیگیشه‌ ك ژیان ئاده‌میزاد وه‌پى جیا كریه‌یده‌و له‌ دروسكریاگیگ تر.

بیجگه‌ ئه‌وه‌یش تویه‌نیم بویشیم ك وه‌رزش خوه‌ندنگاى خاسیگیشیگه‌ ئه‌را دروسكردن و په‌روه‌رده‌كردن هس و ڕه‌فتاڕه‌یل پاك و سه‌بردارى و داڵوه‌خشى و جموجویلداین وه‌ وژدان ئاده‌میزاد.

ئه‌نجامداین دروس وه‌رزش خوه‌ى له‌ خوه‌ى سه‌رچه‌وه‌ى گه‌شه‌سه‌ندن و جموجویلده‌ر هس نه‌ته‌وایه‌تیه‌. ئنجا هه‌ر كه‌سیگ خوه‌ى وه‌ وه‌رزشكار و لایه‌نگر وه‌رزش بزانید له‌وه‌ختیگ ك ته‌ماشاى وازى ناونى دو تیم وازیزان ئه‌كا ناتویه‌نید خوه‌ى بیلایه‌ن بگرید له‌ وازیه‌گه‌و هه‌ر بایه‌سه‌ یه‌كیگ له‌و تیمه‌یله‌ هسى باریده‌ جموجویل.

یه‌یش وه‌تایبه‌ت ئه‌گه‌ر ئه‌و تیمه‌ هه‌ڵوژارده‌ى یانه‌گه‌ى یا هه‌ڵوژارده‌ى شاره‌گه‌ى یا وڵاته‌گه‌ى بوود، ئه‌وه‌ له‌ى حاڵه‌ته‌ ته‌ماشاكه‌ر وه‌بى به‌رنامه‌ ده‌س ئه‌كاده‌ هانداین ئه‌و تیمه‌ ك له‌خوه‌یه‌و نزیكه‌و هه‌ر وه‌و خاتریشه‌ هس و سووزى وه‌ل یه‌كا جویلیه‌ید ئه‌را ئه‌وه‌ك زاڵ بووده‌ بان ئه‌و تیمه‌گه‌ى تر و سه‌ركه‌فتن وه‌ده‌س بارید.

دیارده‌ى جموجویلكردن هس نه‌ته‌وایه‌تى له‌ وه‌رزش كاریگه‌ریه‌گه‌ى فیشتره‌ له‌ ئاڵشتكارى له‌ بواره‌یل تر جیاجیاى كوومه‌ڵگا، هه‌ر له‌وه‌ر ئه‌وه‌یش دوینید مه‌ردم فریه‌یگ روى له‌ وازیگا كه‌ن و له‌ هه‌مان وه‌خت وازیگایه‌یلیش بوینه‌سه‌ شوون ده‌رخستن ئى هس پیرووزه‌.

ئنجا خاستر ئه‌وه‌سه‌ ك هه‌وڵ و ته‌قلاى خاسیگ بدریه‌ید ئه‌را ره‌سینه‌وه‌ى جایه‌ڵ جوانه‌یل كورد و خه‌ڵك شاره‌یل كوردستان ك وه‌ گیان وه‌رزشى و په‌روه‌رده‌كردن هس نه‌ته‌وایه‌تیه‌و په‌ره‌ بیه‌ن وه‌ى لایه‌ن گرینگه‌.

فه‌رهاد خه‌یات

ج . أ