ده‌سڵات عه‌بدولڕه‌حمان پاشا(1789)

شفق نيوز

هویروڕا، هه‌ر له‌وه‌ر ئه‌وه‌یش هه‌میشه‌ وه‌ل وه‌الى به‌غدایا ناكووكى داشتنه‌و هه‌ر له‌سه‌ره‌تاى ده‌سڵاتیه‌وه‌ نیه‌چووگه‌ دڵ والیه‌وه‌و هه‌وڵ فره‌یگ داگه‌ جویر پاشایگ سه‌روه‌خوه‌ى كار بكا.

عه‌بدولڕه‌حمان پاشا وه‌رجه‌ ئه‌وه‌ك ده‌سڵات وه‌ربگریگ له‌سه‌رده‌م مه‌حموود پاشاى باوگى، وه‌ل باوگى و عوسمان برایا ناچار كریان بهه‌یوان وه‌ره‌و ئیران، له‌ورایش له‌لایه‌ن (عه‌لى مرادخان زه‌ند) شاى ئیرانه‌وه‌، پیشوازى گه‌رمیگ له‌لیان كریاو دویاخریش مه‌حموود پاشاى باوگى له‌لایه‌ن ده‌وڵه‌ت ئیرانه‌وه‌ كریا حاكم ناوچه‌ى سابڵاخ، یه‌یش بویه‌ هووكار قینگرتن سه‌رۆك هووزه‌یل ئازه‌ربایجان ك زویتر چه‌و بڕوینه‌ ئه‌و هه‌رێمه‌و تویه‌نستن مه‌حموود پاشا بكوشن و هه‌ردوگ كوڕه‌گه‌یشى ناچار بوین په‌نا بووه‌نه‌ وه‌ر ناوچه‌یل جه‌وه‌ڵى ك له‌ژیر ده‌س هووزه‌یل بڵباس بوى، له‌ساڵ 1785 هاتنه‌وه‌ ئه‌را ناو بابانیه‌یل.

عه‌بدولڕه‌حمان پاشا له‌شوون مردن عوسمان براى جاریگ تر ڕوى كرده‌ ئیران، وه‌یه‌یش والى فره‌ نیگه‌ران بوى، چوینكه‌ له‌و سه‌رده‌مه‌ په‌یوه‌ندى ناونى ئیران و به‌غدا كه‌میگ سه‌خت بوى. ئى پیاوه‌ له‌ماوه‌ى 24 ساڵ چه‌نه‌ها جار هاته‌ بان كار و لاوریا، تویه‌نیم بویشیم ئى پیاوه‌ یه‌كیگ بوى له‌ئازاترین میره‌یل بابان. له‌ساڵ 1789 دویاى ئه‌وه‌ك پیلان برا گه‌وراگه‌ى سه‌ر نه‌گرت عه‌بدولڕه‌حمان بویه‌ گه‌وراى بابان.

له‌و سه‌رده‌مه‌ ك عه‌بدولڕه‌حمان پاشا له‌ئیران بوى، (سلێمان پاشا)ى وه‌زیر چووگه‌ ناوچه‌یل نزیك (مه‌نه‌لى) ئه‌را ته‌فرى و سه‌یران و ڕاوكردن، عه‌بدولڕه‌حمانیش ك دیاره‌ وه‌زعه‌گه‌ وه‌دڵى نه‌ویه‌، نامه‌یگ  ئه‌را سلێمان كلكردو داواى وه‌خشین كرد، بیگومان (والى)یش خوه‌شى ناتگه‌ گه‌ورایه‌یل كورد په‌نا بووه‌نه‌ وه‌ر ئیران و له‌ورا بوونه‌ په‌نابه‌ر ئه‌و ده‌وڵه‌ته‌، هه‌ر له‌وه‌ر ئه‌وه‌یش رازى بوى و كلكرده‌ شوون عه‌بدولڕه‌حمان و ئه‌مان داپى ك وه‌دڵنیاییه‌و بایگه‌و، دویاخر عه‌بدولڕه‌حمان و مه‌ردمه‌گه‌ى چینه‌ به‌غداو له‌ورا نیشته‌جى بوین. دى ئه‌وه‌ بوى برایم پاشا له‌بان كار لاوریاو عه‌بدولڕه‌حمان پاشا كریا مته‌سه‌ڕف بابان و كۆیه‌و هه‌ریر.