له‌ داڵگبوین تازه‌یگ ... دى چه‌؟

شفق نيوز

 

ئى گامه‌ وه‌ له‌داڵگبوین دیره‌وه‌ختیگ له‌ پایته‌خت رووشنهویرى مه‌زه‌نه‌ى پیشكه‌فتنى وه‌ گورجى و پیشبینى وه‌رده‌وامبوینى سه‌خته‌ وه‌ شیوه‌یگ وه‌رفراوان و فیشتر ، وه‌ل ئه‌وه‌یشا دابینكردن زه‌مینه‌یگ وه‌بى ئاماده‌بوین مه‌ردم په‌یوه‌ندیدار گرفت ئه‌خاده‌ وجوود راسكانى فه‌یلیه‌یل له‌ شار سلێمانى ك ناسریاگه‌ وه‌ چالاكى له‌ په‌یوه‌ندیه‌یل كوومه‌ڵایه‌تى و جوور ئه‌وه‌ك نواڕه‌میگه‌ له‌ جموجویل رووشنهویرى، ك هه‌ر وه‌و خاتریشه‌ زانیم هه‌ر له‌ زویه‌و مه‌یل بته‌ویگ له‌لاى فه‌یلیه‌یل هه‌س ئه‌را په‌یوه‌ندى وه‌ل دڵسووزه‌یلیان له‌ سلێمانى و بگر سه‌قامگیرى له‌و شاره‌، ك هه‌رچه‌نى ئى گامه‌ دیره‌وه‌ختیگ نریا، وه‌لى جوور خواستیگ زانیمنه‌ى.

ئمجا له‌یرا زه‌حمه‌ته‌ ره‌سم ئاشكرایگ ئه‌را روخسار ئیچنه‌ ئاماده‌بوینیگ دروس بكه‌یم وه‌ل گاریگه‌ریه‌گه‌ى له‌ بواره‌یل جیاجیا له‌وه‌ر ئه‌و ئه‌زموونه‌یل وه‌رینه‌ له‌ مه‌سه‌له‌ى دامه‌زرانن ریكخریاگه‌یل فه‌یلى و نه‌وین ئاماره‌یل فه‌رمى له‌باوه‌ت ریژه‌ى ئه‌و كورده‌یل فه‌یلیه‌ ك وجوود دیرن له‌ كوردستان، وه‌لى بیگومان ئه‌تویه‌نیم بویشیم ئاماده‌بوین كزیگ ئه‌كه‌فیده‌ وه‌رچه‌و له‌گشت ئاستیگ و ئى دریغیكردنیشه‌ ته‌نیا ناكه‌فیده‌ بان فه‌یلیه‌یل، به‌ڵكوو لایه‌نه‌یلیگ فه‌رمى حكوومى و ته‌نانه‌ت حزبییش نه‌خش دیرن له‌ كه‌مه‌وكردن ئاماده‌بوینمان و ده‌رنه‌خستن توانایه‌یلمان وه‌ راده‌ى خواستیگ و خاسترین به‌ڵگه‌یش وزاره‌تیگ جوور وزاره‌ت رووشنهویرى له‌ هه‌رێم هویچ ره‌واییگ نه‌یرید باس كیشه‌گه‌مان بكا.

"دامه‌زرانن ریكخریاگ كورده‌یل فه‌یلى" له‌ سلێمانى رویداگیگه‌ نیشانه‌ى خواست ئیچنه‌ چالاكیه‌یلیگه‌ و هسكردنیش وه‌ زه‌فتكردن مافه‌یلمان و نه‌هاتن كه‌سه‌یل تر وه‌ره‌و پیمان وه‌ بوونه‌ى پشتگووشخستن ئاشكرایگ وه‌ دریژایى ساڵه‌یل گوزه‌یشت ناچارمان ئه‌كا یه‌كه‌و بگریم و هاوكارى یه‌كترى بكه‌یم وه‌گووره‌ى وه‌خت و شوون و توانایى له‌ڕوى مادى و مه‌عنه‌وى و بایه‌سه‌ له‌بانمان هویره‌و بكه‌یم و پلان بنه‌یم و بریار بیه‌یم و جیوه‌جى بكه‌یم، ك یه‌یش ته‌نیا چاره‌سه‌ریگه‌ ئه‌را لاوردن بیده‌نگى و دووسى و وه‌رده‌وامى ناونیمان.

یه‌یش وه‌و ئومیده‌ ك ئى هه‌وڵ و ته‌قلا نه‌ف وه‌ربگرید له‌ ئه‌زموونه‌یل وه‌رین و گشت ئه‌و كیشه‌و گرفته‌یله‌ بخریه‌نه‌ كنار و له‌وانه‌یش خواست به‌شداریكرن زینگیگ له‌لایه‌ن جایه‌ڵ جوانه‌یل و پشتگیریكردنیان له‌لایه‌ن خاوه‌ن فكره‌و خاوه‌ن توانایه‌یله‌و.

جاریگتر وه‌ناو خوه‌م و ده‌زگاى شه‌فه‌ق ده‌سخوه‌شى له‌وانه‌ ئه‌كه‌م ئى پرووژه‌ى دڵخوه‌شكه‌ره‌ ئه‌نجام دانه‌و ئومید فیشتر هه‌وڵ و به‌رهه‌میلیان ئه‌كه‌یم جوور ره‌سیدیگ رووشنهویرى ئه‌رشیفى و كوومه‌ڵایه‌تى ئه‌را یپكهاته‌گه‌مان و باقى پیكهاته‌یل تر كوومه‌ڵگا.

عه‌لى حسێن فه‌یلى

ج . أ