حكوومەت ‬كوردستان متمانە دروس ئەكاو ئه‌واكان تريش‮..گومان‮!!‬

شفق نيوز

حكوومه‌ت هه‌رێم كوردستان ئه‌ركه‌يلی له‌ی باوه‌ته‌و قورس و گشتلايه‌نه‌، ك بايه‌سه‌ متمانه‌ ئه‌را ناوخوه‌ی كوردستان و لايه‌نه‌يل سياسی دروس بكا، هه‌ر له‌وه‌ر ئه‌وه‌يش جاريگتر بڕيگ دانيشتن وه‌ل رووژنامه‌نويسه‌يل و لايه‌نه‌يل سياسی و نوێنه‌ره‌يل كورد له‌ به‌غدا وه‌ جياجيا ده‌س وه‌پيكرد، بيجگه‌ ئه‌وه‌يش بايه‌سه‌ متمانه‌ وه‌ل به‌غدايش دروس بكاو بايه‌سه‌ باوه‌ڕ و متمانه‌ ئه‌را بڕيگ له‌ نوێنه‌ره‌يل كوردستانيش له‌ به‌غدا دروس بكاو بايه‌سيشه‌ متمانه‌ له‌لای ئۆرپاو ئه‌مريكايش بته‌وتر بكا.

كاريگ ئاساييه‌ هه‌ولێر كيشه‌ی متمانه‌ی وه‌ل به‌غداو ئۆرپا و ئه‌مريكا داشتوود، يه‌كيگيان لايه‌ن سه‌ره‌كی كيشه‌يله‌و ئه‌واكانتريش بيگانه‌و بڕيگيانيش وه‌ وڵاته‌يل دووس دانريه‌ن، وه‌لی سه‌ختی كيشه‌گه‌ ها له‌وه‌ ك حكوومه‌ت هه‌رێم كيشه‌ی متمانه‌ وه‌ل نوێنه‌ره‌يل كوردستان له‌ به‌غدا داشتوود و مه‌ردمانيگ باوه‌ڕيان ئه‌وه‌ بوود ك هه‌ولێر هووكار و سه‌رچه‌وه‌ی كيشه‌يله‌ وه‌ل به‌غدا، ك شايه‌ت كه‌سه‌يليگ له‌يوا هويره‌و بكه‌ن ئی حكوومه‌ته‌ له‌پشت ئيراده‌ی ئه‌وانه‌و كار ئه‌كاو بڕيار ئه‌ياد، ك هه‌ر وه‌و خاتريشه‌ حكوومه‌ت و لايه‌نه‌يل وه‌رپرس جوور سه‌رۆكايه‌تی هه‌رێم ده‌س كردنه‌سه‌ دانيشتن هاوبه‌ش وه‌ل خود لايه‌نه‌يل ناو حكوومه‌ت و نوێنه‌ره‌يليان و رووژنامه‌نويسه‌يل.

ئيمه‌ ئی كاره‌ وه‌ كاريگ ئاسايی زانيم ك به‌شيگی با په‌يوه‌س بكريه‌يد وه‌ پيكهاته‌ی ديموكراسی پرووسه‌ی سياسی له‌ هه‌رێم كوردستان و ئه‌و فريه‌ييه‌ ك وجوود ديريد له‌ حزبه‌يل و ئايدۆلۆجياو ئايين و به‌رژه‌وه‌ندی سياسی جياجيا.

دی هه‌ر وه‌ختيگ هه‌ر كوومه‌ڵگايگ بخوازيد بدێده‌ كوومه‌ڵگای خاسيگ بايه‌سه‌ فريه‌يی له‌تی وجوود داشتوود، ئمجا شايه‌ت كه‌سه‌يليگ بخوازن كزی و ناكووكی و كيشه‌يل ئه‌را به‌رزه‌وكردن ريژه‌ی مه‌ردم خوه‌يان بارنه‌ كار، يا مه‌ردمانيگ بخوازن كيشه‌يل ناوخوه‌يی خوه‌يان له‌ی ڕييه‌و بووه‌نه‌ ده‌يشت چوارچيوه‌ی به‌سياگيان و له‌ليانيش هه‌ن وه‌ سروشتی زاننه‌ی ك قه‌يران نه‌وين مووچه‌و بودجه‌ باريده‌ كار ئه‌را كزكردن پايه‌ی ركابه‌ره‌ سه‌ره‌كيه‌گه‌ی خوه‌ی.

تا ئيره‌ په‌يوه‌ندی وه‌ سياسه‌ت و ركابه‌ری ناونی حزب و كه‌سه‌يله‌و ديريد، ئمجا ئه‌گه‌ر سروشتی نه‌ون و زه‌ره‌دبه‌خش بوون ئه‌كريه‌يد وه‌ سياسه‌ت و ركابه‌ری حزبی دابنريه‌ن، ك له‌لايگ تريشه‌و ئه‌كريه‌يد بويشيد ئه‌يه‌ دونيای سياسه‌ته‌و مه‌سه‌له‌ی فريه‌ييش ئی ئاراسته‌و نيه‌ت و به‌زمه‌ له‌تی وجوود ديريد، وه‌لی كاره‌سات قه‌وميه‌يد ئه‌گه‌ر ئی ديده‌يل جياوازه‌ بكريه‌نه‌ په‌يمانه‌ و بنه‌ما ئه‌را مامڵه‌كردن لايه‌نه‌يل وه‌ جياجيا وه‌ل به‌غدا.

هه‌ر وه‌و خاتريشه‌ ئويشيم كار خاسيگه‌ ئه‌گه‌ر حكوومه‌ت هه‌رێم وه‌رده‌وام ئه‌و كه‌ش وه‌ هه‌وا دروس بكا ك بوونه‌ مايه‌ی بته‌وكردن په‌يوه‌ندی و متمانه‌ وه‌ل لايه‌نه‌يل سياسی و ده‌زگايه‌يل ره‌سانن و هاووڵاتيه‌يل، چوينكه‌ ئه‌گه‌ر به‌ره‌ی ناوخوه‌يی بته‌و و يه‌كگرتگ نه‌دێ، ئه‌وه‌ به‌ره‌يل تر كز و پڕ كه‌لين بوون.

غازی حەسەن

ج . أ