چپه‌ى بیده‌نگیگ له‌ گووش كورده‌یل فه‌یلى

شفق نيوز

ئایا مه‌سه‌له‌ى ئابوورى و قه‌ره‌بووكردن یا هاوردنه‌وه‌ى ماڵ و موڵك یا پۆستیگ له‌ ده‌وڵه‌ت له‌جیاى ئه‌و زوڵم و زووره‌ ك له‌لید كریاو جوور هاووڵاتى پله‌ دو دانریاید له‌عراق یا قه‌ره‌بووكردن مه‌عنه‌وى؟ بیگومان وه‌ ڕاى من گشت ئى چشته‌یله‌ گرینگه‌.

 

 

وه‌ل ئه‌وه‌یشا ئیمه‌ فره‌جار قسه‌ له‌بان هاوردنه‌وه‌ى هه‌ق كورده‌یل فه‌یلى ژنه‌فیم وه‌تایبه‌ت له‌ده‌م وه‌رپرسه‌یل و لایه‌نه‌یل، وه‌لى ئایا ئى لایه‌نه‌یل وه‌رپرسه‌ نه‌خشه‌یگ ئه‌را هاوردنه‌وه‌و قه‌ره‌بووكردن كورده‌یل فه‌یلى دانانه‌ یا ته‌نیا قسه‌و هویچ تر له‌وه‌ر وه‌ده‌سهاوردن ده‌نگ ئه‌را خوه‌یان له‌ئاینده‌.

 

ئه‌وه‌ك داواى قه‌ره‌بووكردن و هه‌قه‌یل ئیمه‌ى كورده‌یل فه‌یلى ئه‌كا، ئازایه‌تى فره‌یگ نیشان ده‌ێد و زانید ك چوین نه‌خشه‌ دابنه‌ێد ئه‌را ژیان و ئاینده‌ى، وه‌لى نازانێد چوین و كه‌ى هه‌ق كورده‌یل فه‌یلى تیه‌ێده‌و؟.

 

ئاده‌میزاد له‌سه‌ره‌تا هویر له‌وه‌ ئه‌كا ئه‌را سوو چه‌ بكا؟ ئنجا وه‌گووه‌رى گه‌شت ئاساییگ ئه‌راى ده‌ركه‌فید زویتر چه‌ كریاگه‌و بایه‌سه‌ چه‌ ئه‌را ئاینده‌ بكا، هه‌ر له‌وه‌ر ئه‌وه‌یش خوه‌ى ئه‌را ئه‌و كاره‌ ئاماده‌ ئه‌كا، دویاى ئه‌وه‌یش مه‌سه‌له‌گه‌ په‌ره‌ سینێد ئه‌را نه‌خشه‌ناین ساڵیگ و دویاخریش ئه‌را ساڵه‌یل تر، ك یه‌یش سه‌ره‌تاى نه‌خشه‌ى 2ستراتیجیه‌، جوور فكره‌و كار كومپانیایه‌یل ك چوین ركابه‌رى له‌بان داناین نه‌خشه‌یل كه‌ن جوور نه‌خشه‌ ئه‌را 10 ساڵ و 50 ساڵ و 500 ساڵ ئاینده‌، ك دى نازانیم چه‌ن ساڵ تر مه‌ندگه‌ كورده‌یل فه‌یلى هه‌قه‌یل خوه‌یان وه‌ربگرن؟.

 

باسكردنمان له‌بان نه‌خشه‌ناین ته‌نیا مه‌راممان له‌و لایه‌نه‌یله‌ نیه‌ ك داواى هه‌قه‌یلمان كه‌ن، به‌ڵكوو ئه‌را روڵه‌یل پیكهاته‌گه‌مانه‌ ك جى داخه‌ وه‌بى ئامانج دیاریكریاگ ژیه‌ن وه‌بى نه‌خشه‌ناین ئاشكرایگ ئه‌را ئاینده‌ جوو ئه‌وه‌ك ده‌س له‌ خوه‌یان شووردنه‌و كه‌سه‌یل تر نه‌خشه‌ ئه‌رایان نه‌ێد، ك یه‌یش له‌یوا هویره‌و له‌لى كریه‌ێد ك به‌رژه‌وه‌ندى خودیه‌ له‌بان شان ئیمه‌و له‌هساو به‌رژه‌وه‌ندى ئیمه‌ به‌رزه‌و بوون و دى نازانیم دویاخره‌گه‌ى چه‌ بوود.

 

راسه‌ هه‌ر یه‌كیگ له‌ ئیمه‌ جارجاریگ وه‌ختى له‌ماڵ ده‌رچوود یا له‌شوون كاركردنى ده‌رچوود و روى ئه‌كاده‌ جاده‌و كویچه‌و له‌شوونیگه‌و ئه‌را شوونیگ تر، نازانێد وه‌ره‌و كاملا چوود و پرسیاره‌یل فره‌یگ له‌لاى جه‌مه‌و بوودو هویچ جواویگ ئه‌رایان نه‌یرێد، ئنجا له‌وه‌ر خوه‌یه‌و ئویشێد ئایا بچمه‌و ئه‌را ماڵ یا بچمه‌ڕا لاى ره‌فیقه‌گه‌م؟ ئه‌را ئى كاره‌ هه‌ڵوژانم؟ ئه‌را سه‌بر له‌بانى بكه‌م؟ من ئه‌راچه‌ هامه‌ ئیرا؟ ئه‌را ئى هه‌مگه‌ زوڵم و سته‌مه‌ له‌لیمان كریا؟ گشت ئه‌یانه‌ پرسیارن و فره‌جار جواوداینیان زه‌حمه‌ته‌.

 

وه‌لى هه‌ر ئى پرسیاره‌یله‌ گام وه‌پیمان نه‌ن وه‌ره‌و دوینستنه‌وه‌ى چاره‌سه‌ر و نه‌خشه‌ناین و چپانن له‌گووش گشت كوردیگ فه‌یلى ك ئه‌و هه‌وڵ وته‌قلا یه‌یله‌ ك وه‌رپرسه‌یل ده‌نه‌ى ته‌نیا له‌وه‌ر ده‌سكه‌فتن مه‌رامه‌یلیانه‌ وه‌بى شیه‌وكردن ئاشكرا، ئنجا نه‌خشه‌یگ ئه‌را ژیاند دابنه‌ تا وه‌پى بڕه‌سیده‌ گشت هه‌قه‌یلدو ڕى مه‌یه‌ كه‌سیگ تر نه‌خشه‌ ئه‌راد بنه‌ێد، چوینگه‌ جوور كوور وه‌پید تیه‌ێد وه‌بى رینمایى و رینیشانده‌ر وه‌ راس و چه‌پا به‌یده‌د و نازانید وه‌ه‌و كوورا چید.

 

ئسرا شاواز

 

ج. ا