سه‌لاح حيده‌ر: ديكتاتۆريه‌ت بڕيگ بويه‌ بايس دوياكه‌فتن وه‌رزش عيراق

شفق نيوز

و پيشخستن وه‌رزش عيراق له‌ گشت به‌شه‌يليه‌و نه‌خش كاريگه‌ريگ داشتگه‌، يه‌كيگ له‌و به‌شه‌يليشه‌ وه‌رزش هونه‌ره‌يل ره‌زميه‌ ك كورده‌يل فه‌يلی تويه‌نستن له‌ ميدانه‌يل مه‌حه‌لی و جه‌هانی شوون خاسيگ وه‌ده‌س بارن. شه‌فه‌ق هه‌ر له‌ی باوه‌ته‌ وه‌ی پۆسپۆر وه‌رزش هونره‌يل جه‌نگی سه‌لاح حيده‌ر مه‌حمود ديدار و گفتوگوويگ داشت ك وه‌ی جووره‌س:

* سه‌به‌بيل سه‌ركه‌ی دوياكه‌فتن وه‌رزش ئيسه‌ی عيراق چه‌س؟

- وه‌زرش عيراق وه‌گشتی كه‌فته‌يسه‌ژير ده‌س ديكتاتوريه‌ت بڕيگ له‌ يه‌كيتيه‌يل و په‌خشه‌و بوين شه‌هاده‌ يا بروانامه‌يل وه‌رزشی ساخته‌، له‌لايگتره‌و نه‌بوين ته‌جروبه‌ بويه‌ بايس دوياكه‌فتن وه‌رزش وڵاته‌گه‌مان و له‌لايگتره‌و ميدان و ساڵونه‌يل وه‌رزشی گۆنجياگيگ ئه‌را به‌رپا كردن پاڵه‌وانيه‌تيه‌يل وه‌رزشی وجود نه‌يريگ ك نيشانه‌ی كه‌می ميزانيه‌و دارايه‌يل دياری كرياگ ئه‌را وه‌رزش هونه‌ره‌يل جه‌نگی‌.

* ئايا تويه‌نيد ئشاره‌ت بكه‌يده‌ گرنگترين ئاماده‌كاريه‌يليگ بايه‌د ئه‌را چالاكه‌و كردن حه‌ركه‌ت وه‌رزشی وڵاتمان ئه‌نجام بگريگ؟

- وه‌ ديدگای منه‌و بايه‌د هه‌رچ زويتر ده‌وره‌يل ته‌دريب داين و به‌رزه‌و كردن ته‌جروبه‌ی وه‌رزش كاره‌يل له‌ هونه‌ره‌يل جه‌نگی به‌رپا بكريه‌يگ و پشت بوه‌سيمنه‌ ته‌جروبه‌ وه‌رزشكاره‌يل كويه‌نه‌ تا بتويه‌نن وه‌رزش وڵات وه‌ گشتی پيش بخه‌ن و هه‌ميش بايه‌د گرنگی بده‌يمنه‌ وه‌رزشكاره‌يل بويچگ و تازه‌كار تا تواناييان نيشان بيه‌ن و بايه‌د رووشه‌نهويری وه‌رزش به‌رزه‌و بكريه‌يگ.

* به‌شداری كورده‌يل فه‌يلی له‌ وه‌رزش عيراق چوين مه‌زه‌نه‌ كه‌ی؟

- وه‌رزشكاره‌يل كورد فه‌يلی فره‌ چاڵاكن و گشت جاريگ تويه‌نستنه‌ نه‌تيجه‌يل خاسيگ وه‌ده‌س بارن وه‌لی وه‌داخه‌وا هه‌وجوره‌گ ئاشكراس وه‌خاتركورد بوينيان وه‌شيوه‌ی وه‌رده‌وام له‌وه‌رچه‌و نه‌گريانه‌ وه‌يخارته‌ يه‌كيتيه‌يل وه‌رزشی بايه‌د له‌ ته‌فره‌قه‌ و هوير شوفينيانه‌ و جياوازی كردن له‌ناونی نه‌ته‌وه‌يل دويری بگرن و وه‌شيوه‌ی راسيگ كار بكه‌ن.

* وه‌ناو بانگترين ياريزانه‌يل وه‌خت خوه‌د كي بوينه‌؟

- عماد سابر و جه‌ميل ئبراهيم

* كام موده‌ربه‌يل له‌باند خاسی ديرن؟

- كيم يونگ پسپۆر كوريای باشوور ، ئو فۆنگ ، فيصل داود و تيرس عودشيو

* گه‌وراترين پاڵوانيه‌تيه‌يليگ له‌تی به‌شداری كردی و سه‌ركه‌فتی ؟

- پاڵه‌وانيه‌تی كاراته‌ی مناڵه‌يل عيراق له‌ ساڵ 1979، پاڵه‌وانيه‌تی ناديه‌يل واز ئه‌را جه‌نگ وه‌همی(بومزی) له‌ كوريای باشوور و هه‌ميش له‌ هه‌ڵوژارده‌ی جايل و جوانه‌يل  و گه‌ورايل عيراق له‌ ساڵه‌يل 1979 تا 1997 به‌شداری داشتم.

سه‌لاح حيده‌ر له‌ چه‌ن خه‌ت:

- سه‌لاح حيده‌ر له‌داڵگ بوی ساڵ 1958

- پسپۆر هونه‌ره‌يل جه‌نگی

- له‌ ساڵ 1976 له‌ نادی مه‌حه‌ليگ له‌ كه‌رخ ده‌سوه‌پی كرد

- له‌ 7 ده‌وره‌ی هووكاره‌ كردن و داوه‌ری ناوده‌وڵه‌تی به‌شداری كردگه‌

- ٨ باوه‌رنامه‌ يا شه‌هاده‌ی ناوده‌وڵه‌تی له‌ يه‌كيتی جه‌هانی تكواندو(WTF) دريگ

- باوه‌رنامه‌ی جوورA له‌ مه‌عهه‌د كوريای باشوور وه‌رگرتگه‌

- له‌بان گشت هه‌ڵوژارده‌يل عيراق چه‌وديری كردگه‌

- جوور چه‌ودير و هه‌ڵوگردانيگ ئه‌را 3 پسپۆر له‌ كوريای باشوور وه‌ ناوه‌يل(جوان باك) له‌ساڵ 1987 و (كيم هی سام) له‌ ساڵ 1997 و (سونك بوك تام) له‌ ساڵ 2005 كار كردمه‌.