نه‌وه‌ى ئاژاوه‌ له‌سه‌رده‌م دیمۆكراسى

شفق نيوز

 

گشت ئى پێكهاته‌یل تێكه‌ڵه‌ تواناى جمداین وه‌ل پرۆسه‌ى سیاسى نه‌یرن و گشتیان چه‌وه‌ڕێ سه‌رچه‌مانن له‌ یه‌ك لایه‌نه‌و كه‌ن یا چه‌وه‌ڕێ چاره‌سه‌ریگ ده‌ره‌كیانه‌. زووان راسى تیه‌ڵه‌و كیشمه‌كیش ئیسه‌یش له‌ به‌رژه‌وه‌ندى داروده‌سه‌ى به‌عسیه‌یل و لایه‌نگره‌یلیانه‌. كوشیاگ و بكوش هه‌ردوگیان زه‌ره‌دن ئه‌را ملله‌ت و گه‌ناته‌كارى دارایى و ئدارییش هه‌ر زه‌ره‌ده‌و كه‌مى خزمه‌تگوزارى و بگر نه‌وینى زه‌ره‌د پڕ ژانیگ تره‌ له‌ سه‌رده‌م دویاى به‌عس ك یه‌یش دویره‌و كه‌فتنه‌ له‌ رێڕه‌و له‌ڕێ دیمۆكراسیه‌و ك یه‌یش وه‌رده‌وامیداینه‌ وه‌و ساڵه‌یل سیه‌ى وه‌رینه‌ ك له‌تى حوكم ئاسن و ئاگر كریا.

ئیمه‌ گشتمان بویمنه‌ به‌شیگ له‌ى بازى مه‌ترسیداره‌، ئمجا ئه‌گه‌ر شیعه‌ید گرێده‌ده‌ ئامانج و ئه‌گه‌ریش سوننیید یا كورد یا عه‌ره‌ب هه‌ر هه‌مان حاڵه‌، یه‌یش وه‌رجه‌ ئه‌وه‌ك ئه‌و تیرۆریست خوه‌یكوشه‌ خوه‌ى بته‌قێنده‌و له‌ هه‌ر وه‌خت و شوونیگ دیاریكریاگ دوینید سه‌رچه‌وه‌یلیگ تر مه‌ترسیدار هه‌ن ك كاریگه‌رى خراو كه‌نه‌ بان بار عراق. كه‌سه‌یلیگ هه‌ن وه‌ پۆست موسته‌شار و ئى نه‌خشه‌ داشتنه‌ له‌ گشت ئاسته‌یل هه‌ر له‌ قاعیده‌ تا سه‌ركردایه‌تى و ئه‌وه‌ك تواناى داشتنه‌ ویرانى كردنه‌. به‌ڵێ فه‌وجه‌یلیگ هه‌ن له‌ موسته‌شاره‌یل و شاره‌زایه‌یل ك فه‌تواى حه‌ڵاڵكردن ئه‌و پویله‌ ده‌ن ك وه‌پیان دریه‌ێد له‌ ئاكام ره‌سانن زانیارى نادروس و ناپه‌سه‌ن و پێشنیار ناوه‌جییش ده‌رخه‌ن و گشت كێشه‌یگ گه‌وراوه‌ كه‌ن و بووده‌ قه‌یران. ئمجا وه‌ى حاڵیشه‌و عراقیه‌یل هه‌وه‌جه‌ى فره‌یگ وه‌ دووس و ره‌فیق پشتگیر دیرن له‌ڕوى كوومه‌ڵایه‌تى و سیاسى و ئابوورى و رووشنهویرى، یه‌یش فیشتر له‌ هه‌ر وه‌ختیگ تر گوزه‌یشته‌.

ئه‌گه‌ر ئه‌و كێشه‌یل جیاوازى و ناكووكى قویله‌ له‌ناونى كورد و عه‌ره‌ب و سوننى و شیعه‌ وه‌ى جووره‌ سه‌خته‌و نه‌ویاتاد، ئه‌وه‌ نه‌كه‌فتیایمنه‌ ناو ئى جووره‌ قه‌یرانیگ ك ئیسه‌ له‌تى ژیه‌یم. رووژیگ له‌ رووژان كێشه‌یگ نه‌ویه‌ بویشنه‌پێ ناوچه‌یل كوردستانى ده‌یشت هه‌رێم ئه‌گه‌ر رژیم وه‌رین ئه‌و په‌یوه‌ندیه‌یل مێژوویى ناونى كورد و عه‌ره‌ب و باقى نه‌ته‌وه‌یل تره‌ نه‌ویاتاد و سیاسه‌ت ئاڵشتكارى دیمۆگرافى و جوگرافى ناوردیاده‌ كار وه‌ جووریگ ك ئمڕوو بویه‌سه‌ كێشه‌یگ سه‌خت و چاره‌نویسساز له‌ هه‌ر تاوتوێكردن و گفتگوویگ له‌ ناونى به‌غداو كوردستان. گشت كه‌سێگ ئه‌و كێشه‌ وه‌ جووریگ له‌ یه‌كه‌و ئه‌یاد، وه‌لى كى هویر له‌وه‌ كرد ئه‌گه‌ر بڕه‌سیمنه‌ ڕێ به‌سیاگیگ له‌ چاره‌سه‌ر مه‌سه‌له‌و كێشه‌یل چاره‌سه‌ر نه‌كریاگ؟ ئه‌گه‌ریش مه‌سه‌له‌ى به‌شبه‌شه‌وبوین رویدا له‌بان بنه‌ماى تایفه‌گه‌رى و ره‌گه‌زى، ئه‌وه‌ كورد و عه‌ره‌ب و توركمان و باقى نه‌ته‌وه‌یل تر له‌ گشت حاڵه‌ته‌یل هه‌ر هاوسان و نه‌بایه‌د دیوار جیاكه‌ر له‌ناونى خوه‌یان دروس بكه‌ن له‌ناونى خوه‌یان. هه‌ر له‌وه‌ر ئه‌وه‌یش بایه‌سه‌ راوێژكاره‌یل رێزدار واز له‌ ده‌رخستن ئه‌و پێشنیاره‌یله‌ بارن ك بووده‌ مایه‌ى تویچیان كوومه‌ڵگاو ئه‌و ئامووژگاریه‌یله‌ ك بووده‌ بایس له‌ده‌سداین گیان هاووڵاتیه‌یل جوور ئه‌وه‌ك وه‌ل ئامێر وه‌دیكردن ته‌قینه‌وه‌یل نادروس كردنه‌ى ك هه‌زاران قوربانى بیتاوان له‌لى كه‌فته‌و.

هه‌ر له‌ى باوه‌تیشه‌و بایه‌سه‌ وه‌رپرسه‌یل له‌ حكوومه‌ت و فراكسیۆنه‌یل سیاسى خوه‌ندنه‌وه‌ى خاسیگ ئه‌را ئه‌و پێشنیاره‌یله‌ بكه‌ن ك راوێژكاره‌یل پێشكه‌شى كه‌ن، چوینكه‌ ئه‌وانه‌ نه‌وه‌ى ئاژاوه‌ن له‌ سه‌رده‌م دیمۆكراسى و زه‌ره‌د بڕیاره‌یل تونڕه‌ویانه‌ كاریگه‌رى له‌بان به‌رژه‌وه‌ندى ملله‌ت دیرێد و سه‌ركرده‌یلیش وه‌بێ ملله‌ت حاڵه‌ت تازه‌یگه‌ راوێژكاره‌یل بایه‌سه‌ ئاشكراى بكه‌ن.

عه‌لى حسێن فه‌یلى

ج . أ