جه‌هان ئاژه‌ڵ له‌ناونى نه‌فت كوردستان و نه‌فت ئوردن وه‌ په‌تى..!

شفق نيوز

هویچ"ره‌فیق"یگ نه‌كه‌ن له‌هه‌ر بار و وه‌زعیگ، ئنجا گشتیان پابه‌ند بڕیاره‌گه‌ بوین، وه‌لى ڕووى فه‌نباز تواس یاساگه‌ بشكنێد له‌وه‌ختیگ ته‌ماشا كرد كه‌ڵه‌شیریگ خه‌ریك له‌بان جوویگ مینه‌ى خواردن ئه‌كا، رووى وته‌پى: ئه‌ى كه‌ڵه‌شیر ئه‌ڕاچه‌ ته‌پ وتووز دروس كردیده‌؟ كه‌ڵه‌شیر وت: من هامه‌ كنار ئاویگ و مینه‌ى مه‌ل وموورى كه‌م ت باس چه‌كه‌ید ئه‌ى ره‌فیق؟ روویه‌گه‌ وته‌پى: گه‌ردین ئه‌را مه‌ل وموورى له‌ناو ئاوه‌گه‌یش ته‌پ وتووز كه‌ێد.. ئه‌گه‌ر وه‌رده‌وام بوید له‌ى كار وه‌شكیه‌مه‌ پیده‌و..!!

ئنجا ئه‌وه‌ك له‌یرا مایه‌ى خه‌نستن و ئه‌ڵڵاجه‌ویه‌، ئه‌ویش هه‌ڵویست حكوومه‌ت به‌غداس له‌و چالاكى نه‌فتى حكوومه‌ت هه‌رێمه‌. چوینكه‌ كیشه‌ى ناونى هه‌ردوگلا مه‌سه‌له‌ى دراوردن نه‌فته‌ له‌لایه‌ن كومپانیایه‌یل جه‌هانى نه‌ك كیشه‌ى ره‌فتار وه‌ داهات، ك یه‌یش گرینگه‌ ئه‌رائیمه‌ى هاووڵاتیه‌یل.

حكوومه‌ت هه‌رێم ته‌ئكید له‌وه‌ ئه‌كا ك داهات فرووشتن چووده‌ خه‌زینه‌ى به‌غدا، له‌هه‌مان وه‌خت به‌غدایش ئنكار ئه‌وه‌ ناكا، وه‌لى پیشبینى دیرێد له‌بان به‌ش كومپانیایه‌یل ك خه‌ریك دراوردن نه‌فتن له‌چاڵه‌یل هه‌رێم.

ئنجا كیشه‌گه‌ ئاسانه‌، چوینكه‌ داهاته‌گه‌ ئه‌را گشت عراقیه‌یله‌، هه‌ر له‌وه‌ر ئه‌وه‌یش بایه‌سه‌ له‌بان به‌غداو هه‌ولێر وه‌جووریگ بسازیه‌ن دویر له‌ ته‌سریحه‌یل ئاگرین. وه‌ل ئه‌وه‌یشا دیاره‌ بڕیگ له‌ وه‌رپرسه‌یل له‌بان كاروبار وزه‌ له‌به‌غدا هویچ وه‌ختیگ رازى نین له‌بان چالاكیه‌یل نه‌فتى هه‌رێم و توان وه‌هه‌ر جووریگ بوود كیشه‌و گرفت دروس بكه‌ن له‌وه‌ر هووكاره‌یل مه‌گه‌ر خوه‌یان بزاننه‌ى، ئنجا جاریگ ره‌خنه‌ له‌شیواز ئمزانامه‌ى هه‌ولێر وه‌ل كومپانیایه‌یل نه‌فتى بیگانه‌یا گرن و جاریگیش نیه‌توان پویل ئه‌و كومپانیایله‌ بیه‌ن ك له‌هه‌رێم كار كه‌ن و جار له‌یوایش هه‌س بوخت دزین نه‌فت كه‌نه‌ هه‌رێم، ئنجا ئه‌و بڕه‌ وه‌رپرسه‌یله‌ جوور ڕوویه‌گه‌ن ك چوین مه‌هانه‌ گرت له‌كه‌ڵه‌شیره‌گه‌و تاوانبارى كرد..!

وه‌لى ئوردن نازپه‌روه‌ر، ك سه‌دان و هه‌زاران ترۆریست ئه‌رامان هه‌واڵه‌ كردو پرسه‌ى سه‌دام حسێن نا له‌خوسه‌ى عراقیه‌یل و له‌وه‌ر خاتر زه‌رقاوى و تاوانه‌یلى، تائیسه‌یش نه‌فت وه‌رگرێد له‌عراق وه‌نرخ ئه‌رزانیگ و نیمه‌زانیم مه‌سه‌له‌ چه‌یگه‌و خاسى ئوردن له‌بانمان چه‌س ئى نه‌فت گرانه‌ وه‌نرخ خوڵ به‌یمنه‌پى؟

ئوردن دو ساڵه‌ نیه‌تواید پویل ئه‌و نه‌فته‌ به‌ێده‌ عراق، ئه‌ویش وه‌مه‌هانه‌ى ئه‌وه‌ك قه‌رد كویه‌ن دیرێد له‌لاى عراق و نزیكه‌ى 400ملیۆن دۆلاره‌..! وه‌ل ئه‌وه‌یشا عراق یه‌ك به‌رمیل نه‌فت وه‌نرخ 30دۆلار فرووشیده‌ ئوردن، ئنجا رووژیگ ده‌ هه‌زار به‌رمیل فرووشیده‌ ئوردن و نرخ ئیسه‌ى به‌رمیلیگیش نزیكه‌ى 100دۆلاره‌، ئنجا وه‌هساو ئاسایى ئه‌وه‌ ده‌ركه‌فێد ك ساڵانه‌ عراق 3 ملیۆن و 600هه‌زار به‌رمیل نه‌فت فرووشیده‌ ئوردن وه‌نرخ یه‌ك ملیار و 8ملیۆن دۆلار، وه‌لى نرخ راسى نه‌فته‌گه‌مان ئه‌گه‌ر وه‌ 100دۆلاره‌گه‌ بفرووشیمنه‌ پى ئه‌كاده‌ 3 ملیار و 600هه‌زار دۆلار.

له‌یرا ئویشیم: ئایا ئى هه‌مگه‌ مه‌هانه‌یله‌ چه‌س له‌وه‌رانوه‌ر چالاكیه‌یل نه‌فتى هه‌رێم و تاوانباركردنى وه‌تاڵانكردن دارایى؟ هه‌ر له‌وه‌ر ئه‌وه‌یش پیشنیار كرده‌ حكوومه‌ت هه‌رێم نیمه‌ى به‌رهه‌مه‌گه‌ى وه‌په‌تى به‌یده‌ ئوردن له‌وه‌ر ئه‌وه‌ك به‌غدا رازى بوود.!

 

خدر خلات به‌حزانى

ج