گرفت وه‌رده‌وام پرۆسه‌ى سیاسى

شفق نيوز

گیر هاتنه‌ ناوى بنه‌ن چه‌؟ ئایا ناوى بنه‌ن سیمینار یا دانیشتن یا دیدار؟ له‌ڕاسى هه‌ر ئه‌وان خسته‌مانه‌ دامه‌و، دى نیه‌زانیم چوین له‌لى ده‌رمانكه‌ن؟! ئویشیم دام، چوینكه‌ ئیمه‌ تائیسه‌ له‌ساى مه‌ینه‌تیه‌یل سه‌ختیگ ژیه‌یم و كه‌مترین هه‌قه‌یل هاووڵاتى له‌تى فه‌وتیاگه‌ جوور شوون نیشته‌جى و زه‌مانه‌ت دارایى و تائیسه‌یش راده‌ى فه‌قیرى له‌وڵات ڕوى له‌ زیایبوین وه‌رده‌وام كردگه‌، ك خود وه‌رپرسه‌یل دگان وه‌ى راسیه‌ نه‌ن ك هه‌رچه‌نى گه‌نجینه‌ى ده‌وڵه‌ت پڕه‌ له‌خه‌یر و هه‌رچه‌نى ماوه‌ى 9ساڵه‌ ئاڵشتكارى له‌عراق رویدا وه‌پشتگیرى وڵاته‌یل یه‌كگرتگ ئه‌مریكا، وه‌لى وه‌ل ئه‌وه‌یشا زوورم هاووڵاتیه‌یل گه‌ردنه‌ شوون چشته‌یل فڕه‌دریاگ له‌بان زبڵدانه‌یل جاده‌ له‌وه‌ر ئه‌وه‌ك بفرووشنه‌ى و نان رووژانه‌ى خیزانیان وه‌پى ده‌ركه‌ن.

 

هیمان خزمه‌تگوزارى خاسیگ ناته‌سه‌ وجوودو له‌وانه‌یش كاره‌با، نه‌ له‌تاوسان و نه‌یش له‌ زمسان هه‌وه‌جه‌ى مه‌ردم پڕه‌و نه‌كردگه‌و ته‌نانه‌ت دینار عراقییش له‌شوون رمیان رژیم تویش نه‌خوه‌شى هات و نرخى كه‌مه‌و بویه‌.

 

ئویشیم خستنه‌مانه‌ دامه‌و، چوینكه‌ رژیمیگ سیاسى له‌بان خواست خوه‌یان تواسن ئه‌را جیوه‌جیكردن به‌رژه‌وه‌ندیه‌یل تایبه‌تیان نه‌ك به‌رژه‌وه‌ندى ملله‌ت، هه‌ر له‌وه‌ر ئه‌وه‌یش ده‌ستووریگ ناته‌واو دامه‌زرانن له‌وه‌ر خاتر رویداین كیشه‌ى چینایه‌تى و ره‌گه‌زى و ته‌نانه‌ت له‌ى كاریشه‌ جیاوازیم له‌ ده‌وڵه‌ته‌یل تر، چوینكه‌ ئه‌و وه‌رپرسه‌یله‌ ك ده‌ستوور دانان هه‌ر هه‌مان ئه‌و ئه‌ندامه‌یله‌نه‌ ك له‌یه‌كه‌م ده‌وره‌ هه‌ڵوژریان نه‌ك دادوه‌ر و یاساكاره‌یل تایبه‌تمه‌ند، ك یه‌یش چه‌واشه‌ى كار ده‌وڵه‌ته‌یل پیشكه‌فتگه‌، ته‌نانه‌ت"مسر"یش مه‌رج ئه‌وه‌ داشت ئه‌وانه‌ك ده‌ستوور دانه‌ن بایه‌سه‌ له‌ده‌یشت ئه‌نجوومه‌ن ملله‌ت و حكوومه‌ت بوون و له‌پیاوه‌یل گه‌وراى دادوه‌ر و پیشه‌كار بوون تا نه‌كه‌فنه‌ ژیر مه‌یل حزب ولایه‌نه‌یل، یه‌یش له‌وه‌ختیگ ئیمه‌ هه‌وڵ وته‌قلا دایم ئه‌را ده‌ستووریگ ك له‌تى هه‌وڵ رازیكردن سه‌ركرده‌ى چینه‌یل و حزبه‌یل دریا نه‌ك له‌وه‌ر خاتر وه‌دیهاوردن خواست هاووڵاتیه‌یل، ئنجا تویه‌نریا له‌گشت گرفتیگیش لابیه‌ن و له‌وانه‌یش گرفت چینایه‌تى و ره‌گه‌زى و ده‌روازه‌ى گه‌شه‌كردن و پیشكه‌فتن واز بكریه‌ێد، وه‌لى ئه‌وان ئى كاره‌ نه‌كردن و دویریشه‌ بكه‌نه‌ى.

 

ئه‌و ریككه‌فتنه‌یلیشه‌ ك ئمزا له‌بانى كردن، جیوه‌جى نه‌كریا، له‌وانه‌یش: ریككه‌فتننامه‌ى هه‌ولێر ك چشته‌یل خاسیگ له‌تى دانریا وه‌ رووحیگ سه‌رده‌میانه‌، وه‌لى كار وه‌بڕگه‌یلى نه‌كریاو ئه‌گه‌ر جیوه‌جى بكریاتاد ئه‌وه‌ بیگومان پرۆسه‌ى سیاسى سه‌ركه‌فتن خاسیگ هاوردیاده‌ ده‌س. ئنجا ئه‌و ریككه‌فتن هه‌ولێره‌ یاسایه‌یل فره‌یگ له‌تى ئه‌را جیوه‌جیكردن دانریا وه‌ك: یاساى دادگاى یه‌كێتى و یاساى نه‌فت و غاز و یاساى دووسى نیشتمانى و یاساى ریكخستن ده‌زگایه‌یل ئاسایش و یاساى حزبه‌یل و یاساى ئه‌نجوومه‌ن یه‌كێتى و یاساى هه‌ڵوژاردنه‌یل و یاساى كۆمسیۆن هه‌ڵوژاردنه‌یل و یاساى تووڕ ره‌سانن و یاساى ژنه‌ى ده‌سپاكى و یاساى سه‌رپه‌رشیار گشتى و یاساى دیوان چه‌ودیرى دارایى و یاساى لژنه‌ى یه‌كسانى و یاساى ئیرادات یه‌كێتى و یاساى ده‌سڵات جیوه‌جیكردن و یاساى كار رووژنامه‌گه‌رى و مقه‌یه‌تى رووژنامه‌نویسه‌یل.

 

ئنجا شماره‌ى فره‌یگ له‌و یاسایه‌یله‌ تائیسه‌یش جیوه‌جى نه‌كریانه‌و بڕیگیش له‌لى وه‌ نیمه‌و ناته‌واو جیوه‌جى بوى، دى وه‌و جووره‌ وڵات وه‌بى جیوه‌جیكردن ئه‌و یاسایه‌یله‌ مه‌ند، یه‌یش له‌وه‌ختیگ ده‌وڵه‌تیگ جوور لیبیا ك ماوه‌ى كه‌میگه‌ ئاڵشتكارى له‌تى رویدا ته‌ماشاى مه‌ترسى ئى كاره‌یله‌ كردن و ئه‌نجوومه‌ن نیشتمانى وه‌ختى له‌ لیبیا وه‌رجه‌ چه‌ن رووژیگ  یاساى تازه‌یگ ئه‌را حزبه‌یل ده‌ركرد ك له‌تى وشیارى دا ئه‌را ئه‌وه‌ك حزبه‌یل سیاسى له‌بان بنه‌ماى دینى و چینایه‌تى دانه‌مه‌زریه‌ن.

 

بیگومان وه‌بى یاسا، هه‌رچى دانیشتن و دیداره‌ هویچ قانجازیگ نه‌یرێدو له‌هه‌مان وه‌خت وه‌رده‌وامى كیشمه‌كیش سیاسى ماناى هه‌یواینه‌ له‌ جیوه‌جیكردن قه‌وڵه‌یل و خه‌ریككردن راى گشتى و شایه‌ت بڕیگ له‌سه‌ركرده‌یل له‌یوا هویره‌و بكه‌ن ئى جیاوازى و ناكوكیه‌ تا كووتایى ده‌وره‌ى په‌رله‌مانى هه‌ر بمینێد ك یه‌یش گرفت پرۆسه‌ى سیاسى و كاره‌ساتیگه‌ له‌وڵات.

 

سادق ئه‌زره‌قى

 

ج