مه‌ردم و قەیران!

شفق نيوز

ئه‌و قسه‌يشه‌ وه‌و مانا نيه‌ ك ئيلاوبيلا گشت مه‌ردم راسيه‌گه‌ جوور يه‌ك دوينن، به‌ڵكوو وه‌و ماناسه‌ ك قه‌يرانه‌يل گشت مه‌ردم ناچار ئه‌كا له‌شوون خوه‌يان هه‌ڵسن و ناچار بوون روى راسكانى خوه‌يان نيشان بيه‌ن، ئمجا له‌يرا ئه‌گه‌ر دقه‌ت بكه‌يم، دوينيم خوه‌مان و مه‌ردم و چشته‌يليش خاستر دوينيم.

راسييگ هه‌س ئه‌ويش ئه‌وه‌سه‌ ك ئادىميزاد هه‌م تواناى فامستن ديرێد و هه‌ميش وه‌ ئاگادارانه‌ هويره‌و ئه‌كاو ته‌نانه‌ت توانى ئه‌وه‌يش ديرێد قه‌يرانه‌يل سه‌ختيش ساده‌ بكاده‌و، وه‌ل ئه‌وه‌يشا زوورم مه‌ردم بيئاگايانه‌ هوير و بارودووخه‌ سه‌خته‌گان له‌بان بنه‌مايگ بى هيز و بنه‌ماى بى مه‌نتقيگ ساده‌وه‌ ئه‌كه‌ن.

راسه‌ فريه‌جار بڕيگ شيه‌وكردن و ساده‌كردنه‌وه‌ى هوير وڕايه‌يل هه‌وه‌جه‌يگ سازى ئه‌كا، وه‌لێ له‌ زوورم حاڵه‌ته‌يل ئاده‌ميزاد بيئاگايانه‌ چشته‌يل سه‌خت فريه‌ ساده‌وه‌ ئه‌كه‌ن، وه‌ل ئه‌وه‌يشا گشت كه‌سيگيش خوه‌ى وه‌ كه‌سيگ لۆژيك و ئه‌قڵانى دوينێد.

بيجگه‌ ئه‌وه‌يش فريه‌جار ئاده‌ميزاد بانگه‌واز ئه‌وه‌يش ئه‌كا ك له‌گشت وه‌خته‌يل برياره‌يلى له‌بان شيه‌وكردن و له‌يه‌كه‌وداين پڕ دقه‌تيگ ئه‌ياد، وه‌لێ راسى ئه‌وه‌سه‌ ك ئاده‌ميزاد ئه‌كريه‌ێد له‌و قه‌يرانه‌يله‌ نه‌ك هويره‌وكردنى بى هيز بدێ، به‌ڵكوو هويره‌وكردن و مه‌نتق هه‌ر لاوه‌ێد و ته‌نيا له‌بان بنه‌ماى ئحساس بريار بيه‌ێد.

ئه‌گه‌ر ته‌ماشاى قه‌يران ئيسه‌ى كوردستان بكه‌يم، دوينيم له‌يرا ميدياو كه‌ناڵه‌يل ته‌له‌فزيۆنى يه‌ك راسى و يه‌ك هه‌وه‌جه‌ى جه‌وهه‌رى ئه‌را ده‌رچگن له‌ه‌و قه‌يرانه‌ نيشانه‌ نايه‌ن، به‌ڵكوو رووژانه‌و بيس وچوار سه‌عات چه‌نه‌ها چشت و چه‌نه‌ها هه‌وه‌جه‌ نيشان ئه‌يه‌ن.

جوور ئه‌وه‌كيش ئاشكراس ك هه‌ر راسييگيش مه‌ردم و لايه‌نگر خوه‌ى ديرێد، يه‌يش نه‌ك ته‌نيا له‌وه‌ر ئه‌وه‌گ هه‌ر كه‌سيگ و ئه‌گه‌ردێده‌ شوون ئه‌و راسيه‌ ك ئه‌زه‌ره‌ته‌يلى وه‌دى ئه‌يه‌رێد و مقه‌يه‌تى له‌ به‌رژه‌وه‌نديه‌يلى ئه‌كا، به‌ڵكوو له‌ بونياده‌و ئحساس ئاده‌ميزاد ئه‌تويه‌نێد فريه‌ وه‌ ئاسانى فه‌ن و فێڵ له‌لى بكريه‌ێد.

ئمجا قسه‌ى خوه‌ش و قه‌وڵ خوه‌ش، چ راس چ دروو، ئه‌وه‌ وه‌هه‌مان راده‌ ئه‌كريه‌ێد له‌ڕى ميدياو رووژنامه‌و ره‌سم ته‌له‌فزيۆنه‌يل زوورمينه‌ى مه‌ردم ئاراسته‌ بكا، ك له‌ڕاسى كه‌سه‌يل خراو يا خاس ئه‌تويه‌نن له‌ى كه‌لين و خاڵه‌يل كزه‌ ك له‌ ئحساس ئاده‌ميزاد وجوود ديرێد نه‌ف وه‌ربگرن وه‌خاتر ئاراسته‌كردن زوورمينه‌ى مه‌ردم وه‌ره‌و ئاسوو و ئاينده‌يگ خاستر يا خراوتر.

ئسماعيل راوه‌ندوزى