چوین هه‌ڵبكه‌یم له‌ى ژیان پڕ شیوایشیوه‌؟

شفق نيوز

ته‌كنۆلۆژى له‌ بازاڕه‌یل خراو وه‌كارهاوردنیان و نه‌ف وه‌رگرتن له‌و به‌رهه‌مه‌یله‌و گرانى نرخ و كه‌مى داهات و ركابه‌رى بى بنه‌ماو گرده‌وكردن زیاتر سه‌رمایه‌ له‌لایگ و، ئاماده‌ نه‌وین دادپه‌روه‌رى كومه‌ڵایه‌تى و گه‌ناته‌كارى و شیویان شیرازه‌ى داب ونه‌ریته‌یل و گورجى ئاڵشتكاریه‌یل له‌گشت مه‌یدانیگه‌وه‌ له‌لایگ تره‌و، گشت ئه‌یانه‌ شیوایشیو گه‌وراو فشاریگ ده‌روینى له‌یوا دروس كردگه‌ ئه‌را ئاده‌میزاد ك وه‌بى باجداین كه‌س نیه‌تویه‌نیگ له‌لیان قورتار بوود.
جواودانه‌وه‌ى ئاده‌میزاده‌یل ئه‌را ئى وه‌زع و فشاره‌یله‌ به‌سیاسه‌ چه‌ن هووكاریگه‌وه‌ له‌وانه‌یش: ئاست رووشنهویرى تاك، بار كومه‌ڵایه‌تى و ئابووریه‌گه‌ى، ئه‌زموونیگ زویتر ژیان تاك، ڕه‌گه‌ز، عومر، په‌روه‌رده‌ى خیزانى، هویر وباوه‌ڕ،...هتد.
وه‌لى له‌یرا چه‌ن رینماییگ خه‌یمنه‌ڕوى له‌ى باوه‌ته‌وه‌ ئه‌را كه‌مه‌وكردن ئه‌و باجه‌یله‌:
1- فره‌ خوه‌د وه‌ ڕویداگه‌یل گوزه‌یشته‌وه‌ خه‌ریك مه‌كه‌ وه‌تایبه‌ت ئه‌وانه‌ك له‌ده‌س چینه‌، هه‌ر ئه‌وه‌نه‌ ته‌ماشاى گوزه‌یشته‌ بكه‌ ك خزمه‌ت وه‌ئیسه‌و ئاینده‌د بكا.
2- خوه‌د له‌و كه‌سه‌یله‌ دویر بگر ك بیجگه‌ سه‌رژان و كیشه‌و گرفت هویچ تر له‌لیان نیایگه‌ دى.
3- وه‌ختى كیشه‌یگ ئه‌راد په‌یا بوود، ئارام به‌و گشت لایه‌نه‌یلى شیه‌و بكه‌و بزان ئه‌و كیشه‌ ك گه‌ورایه‌و كردیده‌ ئه‌وه‌ تیه‌رزیگ خوه‌د وه‌پیه‌وه‌ خه‌ریك بكه‌ید، ئه‌وجا نه‌خشه‌یگ ئه‌را روى وه‌ڕوى بوینه‌وه‌ى دابنه‌و بڕیار له‌بانى بیه‌.
4- په‌یاكردن كه‌سیگ ك خه‌مه‌یل خوه‌د ئه‌ڕاى هه‌ڵڕشنید، چوینكه‌ وه‌ك قه‌زان هه‌ڵم وه‌ختى گه‌رمى ئاگر فشار فره‌یگ له‌بانى دروس ئه‌كا، ئه‌گه‌ر ده‌رچه‌یگ نه‌وگ ئه‌و هه‌ڵمه‌ له‌لیه‌وه‌ ده‌ربچووگ، ئه‌وه‌ بیگومان وه‌رگه‌ نیه‌گریگ و ته‌قیگه‌وه‌، ئنجا وه‌هه‌مان شیوه‌ ئاده‌میزاد ئه‌را لاوردن خه‌م و په‌ژاره‌و ئارامه‌وكردن ژانه‌یلى هه‌وه‌جه‌ وه‌ كه‌سیگ دیریگ گووش له‌لى بگریگ و ئه‌و خه‌مه‌یله‌ ساڕیژ بكا ئه‌ڕاى.
5- له‌وه‌خت پیشهاتن گرفت و سه‌ختیه‌یل، راى كه‌سه‌یل دڵسووز و خومخوه‌ر خوه‌د وه‌ربگر، چوینكه‌ ئاده‌میزاد له‌و وه‌خته‌یله‌ هاوسه‌نگى خوه‌ى له‌ده‌سده‌یگ و نیه‌تویه‌نیگ بڕیار گونجیاگ به‌یگ و له‌ ئه‌نجامیش كیشه‌و گرفته‌گه‌ له‌خوه‌ى سه‌خته‌و ئه‌كا.
6- بى ئومید مه‌و له‌ شكه‌ست خواردند له‌ هویچ وه‌زعیگ و هه‌وڵ تر بیه‌ وه‌ نه‌خشه‌ى تازه‌یگه‌وه‌ گام تر بنه‌ید.
7- وه‌خت له‌وه‌رچه‌و بگر له‌گشت كاریگد، هه‌وڵ بیه‌ گشت چشتیگ له‌واده‌و وه‌خت خوه‌ى ئه‌نجام به‌ید.
8- گرنگى یا ئه‌همیه‌ت بیه‌ ته‌ندروسى خوه‌د، خاس بخه‌ف، سستمیگ خواردن گونجیاگ ئه‌را خوه‌د دابنه‌.