بوغز و كینه‌ت ئاده‌میزاد

شفق نيوز

  ره‌فتار و كه‌سایه‌تى و هه‌ڵسووكه‌فت ئاده‌میزاد پڕه‌ له‌ سفه‌ته‌یل جواروجوور، ئنجا له‌ كه‌سیگ ئه‌را كه‌سیگ تر شیواز ئه‌و ره‌فتار و هه‌ڵسووكه‌فته‌یله‌ جیاوازه‌و هه‌ر ئه‌وه‌یش بووده‌ ماه‌یى ده‌سنیشانكردن كه‌سایه‌تیه‌گه‌ى.

ژیان كوومه‌ڵایه‌تى له‌گشت دونیا بڕیگ مه‌ردم په‌یوه‌س ئه‌كاده‌ یه‌كه‌و، ك وه‌جووریگ وه‌رده‌وام ئاگادار یه‌كترى بوون و هه‌واڵ یه‌كترى بزانن و بڕیگیشى له‌وه‌ر هامشووكردن و دیدار هه‌میشه‌ى ناونیان تویه‌نستنه‌ له‌ شیواز هه‌ڵسووكه‌فت و ره‌فتار یه‌كترى وه‌ ئاسانى بڕه‌سنه‌و.

من سه‌رم سوڕ مینید له‌ كه‌سه‌یلیگ ك هه‌میشه‌ ئى دڵه‌ ك خودا وه‌پیان داسه‌ى ئه‌را ئه‌وه‌ك بكه‌نه‌ى شوون و میلكان سووز و خوه‌شه‌ویسى و نیازه‌یل پاك و بیگه‌رد، وه‌لى دوینید وه‌ چه‌واشه‌وه‌ كردنه‌سه‌ى كویزه‌ى كینه‌ت و نیازه‌یل پیس نا ئنسانى!!

ئى ره‌فتاره‌ بیجگه‌ ئه‌وه‌ك هه‌میشه‌ په‌تایگ كوشنده‌و نائنسانیه‌، وه‌ل ئه‌وه‌یشا فره‌جار له‌ سیماى ئه‌و كه‌سه‌یله‌ ك هه‌ڵگر ئى سفه‌ته‌نه‌ وه‌ ئاشكرا ده‌ركه‌فید، له‌هه‌مان وه‌خت شوونه‌وارى وه‌ روخساریشه‌و دیاره‌، چوینكه‌ جار له‌یوا هه‌س تیكه‌ڵ بوود وه‌ حه‌سره‌ت كاڵ بى قانجاز.

دویره‌وخستن كینه‌ت له‌ دڵ ئه‌و كه‌سه‌یله‌ ك ریخ برایى وه‌لیا نانه‌سه‌ چاڵ و ئه‌را یه‌ك چركه‌یش ده‌سوه‌ردارى نین، هویچ هه‌وڵ و ته‌قلایگ ئه‌راى به‌رهه‌مدار نیه‌و كه‌فته‌ پشت مه‌رز ئیراده‌ى كۆنترۆڵكردن، هه‌ر له‌وه‌ر ئه‌وه‌یش نوڕید كه‌سه‌یلیگ هه‌ن چه‌ویان برایى و سه‌ربه‌رزى و سه‌ركه‌فتن كه‌سه‌یل تر نیه‌وینید، وه‌تایبه‌ت له‌ناو كه‌سه‌یل قه‌وم و خیش، چوینكه‌ جوور ئه‌وه‌ك له‌ سه‌ره‌تا ئاماژه‌ وه‌پى كردم ئى جووره‌ حاڵه‌ته‌یلیگ فیشتر كه‌سه‌یلیگ ناسیار و نزیك هس وه‌پى كه‌ن.

له‌ رووژگار ئمڕوومان مه‌ردمانیگ هه‌ن وه‌ ئاشكراى دژایه‌تى كه‌سایه‌تى و مه‌ردایه‌تى و ریز و حورمه‌ت كه‌سه‌یلیگ كه‌ن ك تاڕاده‌یگ كینه‌ت فره‌یگ له‌وه‌رانوه‌ریان گرتنه‌سه‌ دڵ، وه‌لى دوینید وه‌ل ئه‌وه‌یشا له‌ وه‌رانوه‌رد خه‌نن و له‌پشتیشه‌و نه‌یزه‌ له‌لى وه‌شنن و هه‌میشه‌ وه‌ شكه‌ستد شاد و به‌خته‌وه‌رن!!

وه‌لى ئیمه‌ ئویشیم مه‌رد بایه‌سه‌ مه‌رد بوود و شانازى بكا وه‌ سه‌ركه‌فتن قه‌وم و خیش و دووس و ره‌فیق، نه‌ك هه‌میشه‌ بوغو و كینه‌تى وژدانى له‌ق بكاو له‌ناو گیژاو به‌دڕه‌فتارى و به‌دكارى بژیه‌ید.

ره‌نجده‌ر ئاواره‌