عين العرب

شفق نيوز

له‌وه‌ر ئه‌وه‌ك گشتمانيش زانيم ك يه‌كيگ له‌ گرينگترين ئه‌ندامه‌يل له‌ش ئاده‌ميزاد"عين"ه‌ و جوور ئه‌وه‌ك مارف نۆدی له‌ كتاو"ئه‌حمه‌د"ى له‌يوا تاريفی ئه‌كاو ئويشيد: "رأس" سه‌ره‌و "عين" چه‌وه‌..ئمجا ئه‌گه‌ر ئاده‌ميزاد نه‌ويشيد له‌گشتيان گرينگتره‌ ئه‌وه‌ له‌ گرينگی عين ئه‌ڕه‌سيده‌و.

دياره‌ مه‌رام عرووبيه‌يل شام هه‌ر ئه‌وه‌ بويه‌ ك بويشن ئه‌و شارۆچكه‌ نه‌ك ته‌نيا جوور چه‌وه‌يل كه‌و سووريه‌يله‌، به‌ڵكوو جوور چه‌و گشت نه‌ته‌وه‌ی عه‌ره‌به‌.

جارى با واز له‌وه‌ باريم ك شۆفينيه‌يل حوكمڕان ئيسه‌و ئه‌وسای سوريا هه‌ميشه‌ له‌ هه‌وڵ وه‌عه‌ره‌بكردن كوردستان خوه‌رئاوا بوينه‌و چه‌نه‌ها ده‌يه‌ له‌و هه‌وڵه‌يليانه‌ وه‌رده‌وامن، هه‌ر ئه‌را نموونه‌يش شۆفينيستيگ عه‌ره‌ب وه‌ناو"محمد گلب هلال" له‌ ساڵه‌يل شه‌س وه‌ هساو خوه‌ی شيه‌وكردنيگ ئه‌نجامداگه‌و ناوی ناگه‌"توێژينه‌وه‌يگ له‌باوه‌ت پاريزگای جزيره‌"سه‌باره‌ت وه‌ دروسكردن شاڵيگ عه‌ره‌بی وه‌ ده‌ور ناوچه‌يل كوردنشين، ك مه‌رام سه‌ره‌كی له‌لی داوڕين كورده‌يل خوه‌رئاوا بويه‌ له‌ باكوور و باشوور، هه‌ر له‌وه‌ر ئه‌وه‌يش يه‌كه‌مين گاميان ئاڵشتكردن ناو شار و شارۆچكه‌و ته‌نانه‌ت ئاوايه‌يليش بويه‌ ئه‌را عه‌ره‌بی، ك ئه‌وه‌سه ‌"سه‌ری كانی" كرياسه‌ "رأس العين"و...هتد.

ئمجا ئه‌گه‌ر ئی فه‌رمانڕه‌وايه‌يل سوريا ئه‌وه‌نه‌ خوه‌شيان له‌و شار و شاروچكه‌يله‌ ئه‌ياد و تاريفی وه‌ چه‌و ئه‌كه‌ن، ئه‌ی ئه‌ڕاچه‌ ئيسه‌ ك وه‌ وه‌رچه‌و ئه‌وانه‌و له‌لايه‌ن دڕنده‌ترين ريكخرياگ ترۆريستيه‌و هه‌وڵ داگيركردنی ئه‌دريه‌يد و هويچ ده‌سيگ يارمه‌تييگ ئه‌ڕای دريژ ناكه‌ن وه‌و جبه‌خانه‌ی گه‌وراوه‌ ك ديرنه‌ی و پيكهاتگه‌ له‌ چه‌ك رووسی وه‌گشت جووره‌يليه‌و هه‌ر له‌ تووپ و تانك و ته‌ياره‌ی پيشكه‌فتگ تا ئه‌ڕه‌سيده‌ به‌رميل T.N.Tو چه‌ك كيمياوی؟ ئه‌را ناچيد دژ ئه‌و گرووپه‌ جه‌نگ بكا ك وه‌هساو دژ ئه‌وانيه‌و ئه‌خوازن ته‌خت و به‌خت "ئه‌سه‌د"يش بشيونن!

يه‌يش هه‌ر ئه‌و راسی حاشاهه‌ڵنه‌گره‌ ئه‌چه‌سپنيد ك ئه‌وانه‌ هه‌رچه‌نی ناو شاره‌يل كوردنشين ته‌عريب كردنه‌، وه‌لی له‌ڕاسی هه‌ر وه‌خاك كورده‌يل زاننه‌ی و ئه‌گه‌ر خوه‌يان وه‌ ته‌عريب نه‌تويه‌نستنه‌ له‌ناوی بيه‌ن، ئه‌وه‌ بيگومان خوه‌شاڵن وه‌ ئه‌وه‌ك كه‌سه‌يل تر ته‌نانه‌ت ئه‌گه‌ر وه‌ هساو دوشمنه‌يل خوه‌يانيش بدێ جوور داعشيه‌يل ئه‌و كاره‌يل قه‌يزنه‌ ئه‌رايان ئه‌نجام بيه‌ن ته‌نانه‌ت ئه‌گه‌ر ناوی "عين العرب"يش بدێ خوه‌يان له‌لی بيده‌نگ ئه‌كه‌ن و وه‌ختای ك پێشمه‌رگه‌يش ئه‌را ده‌سميه‌تيان ئه‌چێد وه‌ دسوه‌رداين ده‌ره‌كی ده‌نه‌ی قه‌ڵه‌م! يا"رأس العين" ك "سه‌ری كانی"يه‌، ئه‌ويش كووره‌و بكه‌ن ئه‌وان خوه‌يان وه‌ ته‌مامی له‌لی كڕ وكپ ئه‌كه‌ن.

سه‌لام عه‌بدوڵڵا

ج . أ