هلال كوردستانی

شفق نيوز


ئیسه‌ زورم موسڵمانه‌یل به‌شه‌و بوێنه‌سه‌ بان دوو مه‌زه‌و (سوننه‌ و شیعه‌) به‌ش سوننه‌ى توركیه‌ ، عراق ، سوریه‌ ، ئوردون ، مسر ، سعودیه‌ و خه‌لیج وداواێ دروس بوێن هلال سوننی ئه‌كه‌ن ، وه‌لێ توركیه‌ و سعودیه‌ ململانی كه‌ن ئه‌ڕا سه‌روكاێه‌تى ئه‌و هلاله‌.

هلال سوننی
له‌ وه‌ختێگ ئێران سه‌روكاێه‌تى هلال شیعه‌ كه‌ێگ له‌ ژێر ده‌وڵه‌ت سه‌فه‌وى ك له‌ ئێرانه‌وه‌ ده‌س كه‌ێگه‌پێ و عراق و سوریه‌ و لوبنان ئه‌گریگه‌وه‌ر و هه‌رچه‌ن به‌عزێ ئوێشن له‌ پاكستان و ئه‌فغانستانیش ده‌س وه‌پێ كه‌ێگ و خه‌لیجیش گرێگه‌و ، ئه‌ویش وه‌هه‌مان شێوه‌ سنور خوه‌ێ خه‌ێگه‌ سه‌ر سنوری ئسرائیل و ئیسه‌یش جه‌خت له‌ بان ئه‌و باوه‌ڕه‌ كه‌ن جور ڕاوێژكار سه‌روك كومار ئێران عه‌لی یونسی ووت: ناوچه‌ێ خوه‌ر هه‌ڵات ناوڕاس ئێرانیه‌ و به‌غدا پایته‌خته‌گه‌ێه‌.  


هلال شیعی
وه‌لێ ئیسه‌ شیعه‌ێ عراق باس له‌ (هلال خه‌سیب) كه‌ێگ ك كوه‌یت و عراق و لوبنان و ئوردون و ئسرائیل و مسر و به‌شێگ بوێچگ له‌ توركیه‌ گرێگه‌وه‌ر. له‌ێ سێ هلاله‌ ده‌ركه‌فێگ ك كام وڵات پشتگیری داعشه‌ و كام وڵات دژاێه‌تیی كه‌ێگ.

هلال خه‌سیب
له‌ ناوه‌ند ئه‌و سێ هلاله‌ ، فه‌ره‌ ڕه‌واس ك هلالێگ چوارم دروس بووگ ئه‌ویش هلال كوردستانیه‌ !! ك هه‌ر چوار پارچه‌گه‌ێ كوردستان گرده‌و بكه‌ێگ ، جه‌مسه‌رێگ باكور كوردستان و ئه‌وه‌كه‌ى تر خوه‌رئاوا بووگ. ئه‌گه‌ر به‌راوردێگ ئه‌و هلاله‌ وه‌ل ئه‌وه‌كانتر بكه‌ێم ، دوێنیم سوننه‌ و شیعه‌ له‌ بان بنه‌وای مه‌زه‌بی بویه‌ (هلال خه‌سیب) ك وه‌خت خوه‌ێ له‌ بان بنه‌واێ ئاو وكشتوكاڵ باس له‌لێ كریاس و ئیسه‌ شیعه‌ێ عراق هاوردگه‌سه‌وه‌ى بان كار مه‌زه‌بی ، وه‌لێ هلال كوردستانی دویره‌ له‌ توندڕه‌وی ئایینی و مه‌زه‌بی ، له‌ بان بنه‌ماێگ فه‌ره‌ نه‌ته‌وه‌یی هاتگه‌سه‌ ئاراوه‌ و ڕچاو ئازادی ، ماف مروڤ ، دیموكراسیه‌ت ، ته‌عه‌ددیه‌ت و ئاشتی كه‌ێگ.

هلال كوردستانی
ئه‌گه‌ر بنوڕیمه‌ پێگه‌ جوغرافیه‌گه‌ێ هلال كوردستانی ، بووگه‌ بنه‌واێ ئاشتی له‌ ناوچه‌گه‌ ، له‌وه‌ر ئه‌وه‌گ هه‌رسێ هلاله‌ سوننه‌ و شیعه‌ و خه‌سیب له‌ یه‌ك جیاوه‌ كه‌ێگ. بێجگه‌ ئه‌وه‌یش ملله‌ت كوردستان باوه‌ڕ وه‌ وه‌یه‌كه‌وه‌ ژیان وفه‌ره‌ ئایینی و فه‌ره‌ ئایدولوجی و نه‌ته‌وه‌یی دێرێ ك ئه‌وه‌ مه‌ردم ناو هلاله‌گه‌ یه‌ك خه‌ێگ له‌ ئارامی ناوچه‌گه‌ و دروس كردن ژێر خانێگ بته‌و له‌ گشت بواره‌یل ژیان و دویا ڕوژێگ گه‌شه‌دار ئه‌ڕا نه‌وه‌یلتر و هه‌رێم كوردستان نمونه‌ێگ زینگه‌ ئه‌ڕا ئاینده‌ێ هلال كوردستانی.
(ئه‌وه‌یش له‌ هوێرمان نه‌چوگ له‌ێ ناوچه‌ هلالێگ تریش هه‌س ك هلال یه‌هودیه‌ و ئه‌ویش كه‌فێگه‌ ناونی هه‌ردوو  ڕووبار نیل و فورات و له‌ بان بنه‌واێ ئاینی دروس بوێه‌ ، وه‌لێ ئه‌وه‌ وه‌ل هلال كوردستانی یه‌كتری نیه‌وڕن).
ئه‌و جه‌نگ نگریسه‌ ك ئمڕو ڕوێ وه‌ ڕوێ مه‌ردم كوردستان بوێه‌سه‌و ، وه‌رچه‌و ڕونیێگ خستگه‌سه‌ وه‌رده‌م گشتمان ك بایه‌د وه‌یه‌كه‌وه‌ هه‌وڵ بێه‌یم ئه‌ڕا یه‌كخستن ماڵ كوردستان ، وه‌یه‌كه‌وه‌ هوێر له‌ ژیان و دویا ڕوژ بكه‌یم و وه‌هه‌مان شێوه‌یش وه‌یه‌كه‌وه‌ كردستان بپارێزیم.
 دی وه‌خت ئه‌وه‌ ڕه‌سیه‌ ك سه‌ركرده‌ سیاسیه‌گان هه‌وڵ بێه‌ن وه‌یه‌كه‌وه‌ بنه‌واێ ستراتیجیێگ گشتی دابنه‌ن ، جور ئه‌وانه‌گ چوین هه‌وڵ ده‌ن ئه‌را هلال سوننه‌ و شیعه‌ و خه‌سیب ، وه‌و ئومیده‌ ك ئێ خاڵه‌یل خواره‌ بوونه‌ بنه‌وا:

1-متمانه‌ێ مه‌ردم وه‌ سه‌ركرده‌گانێ
2- ڕێكخستن ماڵ كوردستان له‌ گشت پارچه‌یل كوردستان.
3-ڕێكخستن ماڵ مه‌ردم كوردستان له‌ گشت پارچه‌یل كوردستان.
4- پێكهاوردن ئاسایش نه‌ته‌وه‌یی.
5-دانان ئستراتیجی ئابووری یه‌كگرتگ سه‌روه‌خوه‌ی (جور بازار ئه‌وروپی)
6- دانان ئستراتیجی نه‌ته‌وه‌یی ئه‌ڕا گشت پارچه‌گان.
7- هه‌لوژاردن په‌رله‌مانێگ نه‌ته‌وه‌یی ئه‌ڕا گشت كوردستان (جور په‌رله‌مان ئه‌وروپی)
8- دانان ده‌ستورێگ یه‌كگرتگ ك گه‌ره‌نتی یه‌كسانی و مافه‌یل گشت مه‌ردم كوردستان جور یه‌ك په‌یڕه‌و بكه‌ێگ
9- پابه‌ند بوێن و ڕێزگردن له‌ گشت رانماییه‌گان یو ئێن.
10 باوه‌ڕ ته‌واو وه‌ وه‌یه‌كه‌و ژیان و ڕێزگردن له‌ بیروباوه‌ڕه‌ جیاجیاگان له‌ئایین ، مه‌زه‌و ، حزب وكلتور.
11- باوه‌ڕ ته‌واو وه‌ بنه‌وا سه‌ره‌كیه‌گان ئاشتی ، ئازادی ، دیموكراسیه‌ت.
12-پشتگیری و وه‌هێزكردن نه‌خش سیاسی ، كارگیڕى ، شارستانی ، كومه‌ڵاێه‌تى و نوێنه‌ره‌یل خانمه‌یل و جوانه‌یل له‌ بان گشت ئاسته‌یل.
13-ڕێزگردن له‌ سنور تازه‌ێ كوردستان و ده‌س نه‌خستنه‌ ناو كاروبار وڵاته‌یل هاوسا.
جه‌هان ڕێز له‌ ملله‌ته‌یل یه‌كگرتگ و ئازا و وه‌هێز گرێگ ، مه‌ردم كوردستان ملله‌تێگ ئازاو وه‌ هێزه‌ ، وه‌لێ وه‌داخه‌وه‌ یه‌كگرتوو نییه‌.
هه‌ر وه‌و جوره‌گه‌ ووتمه‌ و ئوێشم (ئوێشن كوردستان توركیه‌ ، كوردستان ئێران، كوردستان عراق ، و كوردستان سوریه‌) ئه‌ێ كوردستانیه‌ت مه‌ردم كوردستان هاله‌كو؟

ج ك