زه‌خم روح

شفق نيوز

و ئه‌زیزه‌یلى بڕیه‌یگ. ئنجا ژان ئاده‌میزاد له‌و زه‌خمه‌ نیه‌ ك كه‌فیگه‌ لاشه‌ى، به‌ڵكوو ژانه‌گه‌ى ها له‌و زه‌خم قویل و سه‌خته‌ ك كه‌فیگه‌ روحى. چوینكه‌ هه‌ر هویچ نه‌وگ وه‌لاى كه‌مه‌وه‌ تویه‌نیم بویشیم: زه‌خم لاشه‌ ئه‌گه‌ریگ هه‌س ئه‌را خاسه‌وبوین یا ساڕیژبوینى، وه‌لى ئایا چ چشتیگ ڕوحمان ساڕیژ ئه‌كا له‌وه‌ختى زه‌خمدار بوود؟

ئه‌گه‌ر كه‌سیگ له‌ئیمه‌ روح ئاده‌میزادیگ زه‌خمدار كردیم، ئه‌وه‌ گشت دونیا وه‌ك په‌شیمانییگ به‌یمنه‌پى هویچ نرخ و قیمه‌تیگ ئه‌ڕاى نه‌یریگ ، ئنجا ئایا چ هیزیگ هه‌س له‌دونیا روح شكیاكیگ خاسه‌و بكا؟ ماناى ئه‌وه‌سه‌ ئه‌را ئه‌وه‌ك روح كه‌س نه‌شكنیم، بایه‌سه‌ دڵ و ده‌روینمان پڕ بوود له‌سووز و خوه‌شه‌ویسى.

بڕیگ له‌ئیمه‌ تا ئه‌و رووژه‌ یا ئه‌و سه‌عاته‌ هایم وه‌ل دووس و براده‌رو ئه‌زیزه‌یلمانا، هویچ له‌ماناى په‌یوه‌ندى و خوه‌شه‌ویسى راسه‌قینه‌ى ناونیمان نیه‌زانیم، وه‌لى وه‌ختى وه‌هه‌ر شیوه‌و هووكاریگه‌وه‌ بوود و له‌ده‌سیان ده‌یم، دى مه‌گه‌ر ئه‌و وه‌خته‌ له‌ماناى خوه‌شه‌ویسى ناونیمان بڕه‌سیمنه‌وه‌. به‌ڵى له‌ قویلایى خوه‌شه‌ویسى نیه‌زانیم تاوه‌ختى له‌یه‌كترى جیاوه‌ بویمن.

ئه‌را نموونه‌: وه‌ختى له‌ناكاو وه‌بى خواست ئیمه‌، مه‌رگ خوه‌شه‌ویسیگمان له‌لیمان سینیگ، دوینید ئه‌و سه‌عاته‌ فره‌ ناڕه‌حه‌ت و دڵگران و خه‌فه‌تبار بویمن ئه‌ڕاى، وه‌لى شایه‌ت زویتر له‌یوا ڕویداگه‌ ك سه‌ده‌ها جار له‌بان چشتیگ بیقیمه‌ت ك نه‌تیه‌رزیه‌ دڵ هه‌مان ئه‌و كه‌سه‌ له‌خوه‌مان ڕه‌نجانیمنه‌ تا له‌ژیان بویه‌.

ماناى ئه‌وه‌سه‌ دویاى مه‌رگ گیرستن و ئه‌سر چه‌وه‌یلمان یا جارجاریگ سه‌ردان قه‌وره‌گه‌ى چ فایده‌یگ دیریگ ؟، یه‌یش له‌وه‌ختى ك وه‌رجه‌ مردنى روحى شكانیم، ئنجا ئایا وه‌ چ شیوه‌یگ و چوین بتویه‌نیم دڵى له‌ خوه‌مان ئاشته‌و بكه‌یم ك تا ئه‌زه‌ڵ دى له‌لیمان بڕیه‌یگ و نیه‌وینیمنه‌ى.

ئه‌وه‌ گرنگ نیه‌ دویاى مه‌رگ و داوڕیان ئه‌زیزه‌یلمان شیوه‌ن ئه‌ڕایان بكه‌یم و ئازیه‌تبار بویمن ئه‌ڕایان، به‌ڵكوو ئه‌وه‌ گرنگه‌ تا هانه‌ ژیان دڵیان نه‌ڕه‌نجیم و ڕوحیان زه‌خمدار نه‌كه‌یم و وه‌باوه‌شیگ یادگارى و ژیان هاوبه‌ش جوانه‌وه‌ له‌ى دونیا ره‌فتار وه‌لیانا بكه‌یم و خوه‌ش یه‌كترى بتوایم، ئنجا ئه‌وسا دویاى مه‌رگیانیش هه‌ر ئه‌و یادگارى و هه‌ڵویسته‌یل جوانه‌ له‌ دڵ و دروینمان مینیگه‌وه‌و هویچ وه‌ختیگ خه‌فتبار نیه‌ویمن وه‌ ئه‌وه‌ك رووژگاریگ زه‌خمیگ سه‌خت خستیمه‌سه‌ ڕوحیان و هویچ وه‌ختیگ په‌شیمانى نیه‌كیشیم ك كرده‌وه‌ى خراویگ ده‌رهه‌قیان ئه‌نجام دایمنه‌.