سياسه‌ت كورد هه‌وه‌جه‌ وه‌ وه‌رچه‌رخان ئه‌كا

شفق نيوز

هه‌رچه‌نی خوه‌رئاوا هويچ پايه‌يگ ياساييش نه‌يريد، وه‌لی له‌وه‌ر ئه‌وه‌ك سوريا تويش جه‌نگيگ ناوخوه‌يی هاتگه‌، كورده‌يل له‌ سێ هه‌رێم كانتۆن دامه‌زراننه‌و ناوماڵ خوه‌يان ئه‌وه‌نه‌ ڕييه‌و. جوور باشوور كوردستان ئه‌وه‌سه‌ خوه‌رئاوايش چه‌ن مانگيگه‌ وه‌ گه‌رمی بويه‌سه‌ ئامانج په‌لاماره‌يل داعش و هاوپه‌يمانی ناوده‌وڵه‌تييش هاوكار له‌ دژ داعش ك ئه‌مريكا سه‌رپه‌رشی ئه‌كا له‌ڕی په‌لاماره‌يل ئاسمانيه‌و.

ئمجا هاوكاری و ريككه‌فتن كورده‌يل باشوور و خوه‌رئاوا وه‌يه‌كه‌و له‌ دژ داعش فريه‌ گرينگه‌و گشتمان وه‌يه‌كه‌و وه‌رپرسيارێتی ئه‌وه‌ كه‌فته‌سه‌ بانمان ك ئه‌كته‌ره‌يل سياسيمان هان بيه‌يم ئه‌را يه‌كگرتگی و يه‌كده‌نگی فيشتر.

يه‌كه‌م گام ئه‌را يه‌يش ئه‌وه‌سه‌ ك كورده‌يل له‌ناو خوه‌يان ده‌قيگ ريككه‌فتننامه‌ی نيشتمانی داشتوون و ده‌ستووريگ ئه‌را خوه‌يان بنويسن له‌جيای چه‌مك"من كردم و من كه‌م" شيواز مامڵه‌كردنمان ئاڵشت بكه‌يم ئه‌را ئه‌وه‌ك كه‌س دويره‌و نه‌خريه‌يد و گشتمان جوور يه‌ك به‌شدار بويمن.

شايه‌ت له‌ وه‌خت جه‌نگ ريز و خوه‌شه‌ويسی جوور فه‌نتازيا ته‌ماشا بكريه‌يد، وه‌لی له‌ قوناغ بونياتناين ئه‌را ئه‌وه‌ك هاوكاری و ده‌سميه‌ت بته‌و بكريه‌يد، ريزگرتن ئه‌دێدی مه‌رجيگ حاشاهه‌ڵنه‌گر.

ئمجا ئه‌را ئه‌وه‌ك پرووسه‌ی ئازادی له‌ خوه‌رئاواو باكوور خاستره‌و بكه‌يم و دونيا به‌شكرياگه‌گه‌ی كورد يه‌كه‌و بخه‌يم، بايه‌سه‌ وه‌ل هه‌رێم فيدراڵ كوردستان و هاوپه‌يمانی دژه‌ داعش هاوكار بويمن و خوه‌مان وه‌ليا بگونجنيم، ك چه‌وه‌ڕی ئی چشتيشه‌ له‌ گشت لايه‌نه‌يل سياسی ئه‌كه‌يم، دی ئه‌وانه‌ك له‌ به‌رژه‌وه‌ندی وه‌رته‌نگ حزبی خوه‌يان دويننه‌و، بيگومان ئه‌وانه‌ هه‌م زه‌ره‌د وه‌ كوومه‌ڵگا ره‌سنن هه‌م خوه‌يانيش گشت چشتيگ له‌ده‌س ئه‌يه‌ن.

سيدار باسوت

ج . أ