يه‌ك توێت به‌سه‌

جه‌لال  شێخ عه‌لى

شه‌فه‌ق نيوز/ له‌ساڵ 2003ه‌و تارووژ ئمڕوومان سياسيه‌يل عراق بناخه‌ى ته‌قيه‌كردن وه‌ل كورد ئه‌يه‌رنه‌ كار، ئه‌وان له‌ كووايى گشت هه‌ڵوژاردنيگ و ده‌سوه‌پيكردن ئه‌را دامه‌زرانن حكومه‌ت تازه‌ رێ وه‌ره‌و كوردستان ئه‌گرنه‌ وه‌ر و قه‌وڵ جيوه‌جيكردن گشت داواكاريه‌يل كورد ئه‌يه‌ن، به‌ڵكوو باس له‌وه‌يش ئه‌كه‌ن هان وه‌ل كوردا له‌گشت مافه‌يلێ... وه‌لێ هه‌روه‌ختى بڕسنه‌ مه‌رام خوه‌يان و وه‌ل دامه‌زرانن حكومه‌ت يه‌كسه‌ر په‌شيمان بوونه‌و له‌ قه‌وڵه‌يليان وه‌بى ترس له‌ هساوكردن، چوينكه‌ ته‌قيه‌ وه‌گووره‌ى شه‌رع ئه‌وه‌سه‌ موسڵمان بڕيگ قه‌وڵ  كرده‌وه‌ ده‌ربخه‌ێد ئه‌را ئه‌هل كوفر يا كه‌نيز له‌و حاڵه‌ته‌ ك موسڵمانه‌گه‌ ناچار بدێ له‌وه‌ر دويرگرتن له‌ شه‌ڕيان وه‌ل سابتكردن دڵ له‌بان ئنكار ره‌زامه‌ندييان و بوغزه‌يليان، يه‌يش وه‌و مانا ك كورد له‌ ملله‌ت ئسلام نازانن...!!!

 

ئيسه‌يش دوياى ئه‌وه‌گ عراق بويه‌ مه‌يدانيگ له‌چوارچێوه‌ى ناوچه‌ى جه‌نگ ئابوورى ك شايه‌ت ئه‌مريكا به‌رپاى بكا دژ ئيران و دوياخريش بناخه‌ى ته‌قيه‌ وه‌ل ترامپ و ئه‌مريكيه‌يل فايده‌ نه‌يرێد جوور فايده‌يليان وه‌ل كورد، له‌ئاكام ئه‌وه‌يش هه‌وا وه‌ به‌رژه‌وه‌ندى كه‌شتيه‌يل سه‌ركردايه‌تى عراقى نايه‌ێد.

 

جارجاريگ شاره‌زايه‌يل سياسه‌ت ئه‌وه‌ ده‌رخه‌ن ك ئامانج ستراتيجى نه‌بايه‌د وه‌ موسايره‌ يا ته‌قيه‌ وه‌ل ده‌وڵه‌ته‌يل پيشكه‌فتگ جه‌هان جيوه‌جى بدێ و هه‌ڵويسته‌يليگيش هه‌ن فريه‌جار نه‌بايه‌د جيوه‌جى بوون زياتر له‌ مانوڕايگ ته‌كتيكى دياريكرياێ و ئه‌را ماوه‌يگ وه‌ختى قانجاز له‌لى نه‌كرياێ له‌وه‌ر لاوردن فشار ده‌ره‌كى و هه‌ر وه‌شيوه‌يگ گورجيش ئاشكراى ئه‌دێ و وه‌سزا وه‌رده‌مى ئه‌گرێد.

 

ئه‌گه‌ر سه‌ركردايه‌تى عراقى مراوغه‌ وه‌ل ئه‌مريكا بكاو بناخه‌ى ته‌قيه‌ هاورده‌ كار جوور ئه‌وه‌گ وه‌ل كوردا ئه‌نجامى دا، ئه‌وه‌ سياسيه‌يل ناوچه‌ێ سه‌وز تويش هه‌ڕه‌شه‌يگ راسه‌وخۆ ئه‌يه‌ن و ئاكامه‌گه‌يشى حه‌تمى و ئاشكراس، ك سه‌دام و ئاژاوه‌و نگه‌رانى ئه‌كه‌فێده‌و له‌گشت ده‌زگايه‌يل ده‌وڵه‌ت.

 

وه‌لێ له‌ حاڵه‌تيگ ئه‌گه‌ر سه‌ركردايه‌تى عراق جواو بڕياره‌يل ئه‌مريكاو هاوپه‌يمانه‌يلى بيه‌ێده‌و دژ ئيران، ئه‌وه‌ بايه‌سه‌ له‌ى حاڵه‌ته‌ روێ وه‌ڕوێ ئيران ئمايه‌تكه‌رى بيه‌ێده‌و وه‌ل بڕيگ هيزه‌يل ناوخوه‌يى ك خود ئيران دروسكه‌ريانه‌.

 

له‌يراوه‌، ئاست گرنگى سزايه‌يل ئه‌مريكى له‌بان ئيران ئه‌رامان ده‌رئه‌كه‌فێد، ئه‌ويش وه‌ جووريگ بخوليه‌ێده‌و له‌بان گشت پرووسه‌ى سياسى له‌ عراق، ئه‌گه‌ريش سه‌ركرده‌يل پرووسه‌ى سياسى له‌ عراق ئالشتكارى له‌ ريڕه‌و مراوغه‌كه‌ريان نه‌كه‌ن، ئه‌وه‌ سزا وه‌ ئه‌وانيش ئه‌ڕه‌سێد، ئه‌ويش وه‌ ئه‌وه‌گ خه‌رجى له‌بان سه‌رۆك ئه‌مريكى له‌ تویتێگ زياتر نيه‌ له‌ڕێ ماڵپه‌ڕه‌گه‌ى له‌ تويته‌ر.

جه‌لال شێخ عه‌لى