كیشه‌ى(كورد فه‌یلى)و كه‌مته‌رخه‌مى ڕه‌سانن(اعلام) كوردى!

شفق نيوز

تویشیان، وه‌ل ئه‌وه‌یشا هه‌میشه‌ گله‌یى له‌وڵاته‌یل باڵاده‌س و هه‌قه‌یل ئاده‌میزاد و ره‌سانن یا ئعلام جه‌هانى كردیمه‌و تاوانباریان وه‌ ئه‌وه‌ كردیمه‌ گرنگى یا ئه‌همیه‌ت نه‌یانه‌سه‌ كیشه‌و گرفته‌یل كورد له‌و وه‌خته‌یله‌ ك سته‌مكار تیر جه‌رگبڕ دیاد له‌ ملله‌ت كورد.

سه‌ركرده‌و رووشنهویره‌یل كورد، ئیسه‌یش هه‌ر ئه‌و گله‌یى و ناڕه‌زاییه‌ دوواره‌وه‌ كه‌ن له‌وه‌ختیگ خه‌ڵك كوردستان قه‌تڵ وعام كریاو ئاواره‌ى زووره‌ملى ئۆردگاى وڵاته‌یل هاوسا كریاو هه‌ر باس له‌وه‌ كریا ك گوایا كورد، دووس خه‌مخوه‌ر نه‌یاشتگه‌و هویچ میدیایگ باس له‌به‌دبه‌ختى و مه‌ینه‌تیه‌یل كورد نه‌كردگه‌. ئمجا ئى دونیا ده‌وران ده‌ورانه‌و زاڵم و سته‌مكار له‌تى تاسه‌ر ئه‌وزه‌ڵ ناكه‌ن، تا خودا كاریگ كرد كوردستان ئازاد بوى و ملله‌ت كوردمان له‌باشوور كوردستان ره‌سینه‌ ئه‌و ئازادى و سه‌رفرازیه‌ ك له‌سایه‌ى خوه‌شگوزرانى كه‌ن. ئیمه‌ ئویشیم خودا خوه‌شیمان نه‌شیونێد، چوینكه‌ هیمان زه‌خمه‌یل كویه‌نمان ساڕیژ نه‌ویه‌و تام سه‌روه‌خوه‌یى ته‌واویگ نه‌كردیمنه‌و ئومیده‌واریم له‌ڕووژگار نزیكیگ ئه‌ویش باێده‌دى. وه‌لى با خوه‌مانیش گله‌یى كورد وه‌ كوردیگ له‌ یه‌كترى بكه‌یم و ئى دونیا بنى دویره‌!!

رووژگاریگ وه‌ناو شوڕش و سه‌رده‌میگیش سه‌نگه‌ر و ئه‌شكه‌فت و بنار كویه‌و سه‌ختى جه‌وه‌ڵه‌یل هه‌وه‌جه‌ وه‌ ئیراده‌ى پوڵاین و خه‌بات بى وچان روڵه‌یل كورد داشت، فره‌كه‌س ژیان ئاسایى له‌خوه‌ى شیوان و په‌نا برده‌ وه‌ر خه‌بات چه‌كدارى و خوه‌ى له‌ خه‌و ئاسووده‌یى بنماڵ ناهمى كردو كه‌رامه‌ت و غیره‌تى ڕى وه‌پى نه‌یا له‌دویره‌و ته‌ماشا بكاو برایه‌یلى وه‌ مه‌ویسى و به‌دبه‌ختى بوینێد، هه‌ر له‌وه‌ر ئه‌وه‌یش چه‌ك مه‌ردایه‌تى و پێشمه‌رگایه‌تى كردنه‌ شان و ڕى رزگارى كوردستان گرتنه‌وه‌ر. به‌ڵێ ڕوڵه‌یل كورد فه‌یلى وژه‌ وه‌ وژه‌ى خاك باشوور كوردستان هه‌ر له‌گه‌رمه‌سێرى تا ئاخرین خاڵ مه‌رزى ناسن و خوین پاكیان له‌تى رشیا. به‌مۆ و شمیران و چه‌م ڕێزان و قه‌ندیل و پیره‌مه‌گروون شایه‌تحاڵن. وه‌لى وه‌داخ فره‌یگه‌و گله‌ییمان ئه‌وه‌سه‌ له‌ ره‌سانن یا ئعلام كوردى هه‌ر وه‌ختیگ باس له‌كیشه‌ى كورد فه‌یلى كریه‌ێد یا هه‌وڵ و ته‌قلایگ دریه‌ێد له‌باوه‌ت كیشه‌ى ئى چین زوڵملیكریاگه‌، خوه‌ى وه‌خاوه‌نى نیه‌زانێد ك ئه‌ویش به‌شیگه‌ له‌مه‌سه‌له‌گه‌و له‌ئاستى كه‌مته‌رخه‌مه‌. وه‌لى ئه‌گه‌ر گرفتیگ له‌سودان یا هه‌ر وڵاتیگ عه‌ره‌بى روى بیه‌ێد هه‌زار جار باس كریه‌ێد و ته‌علیق له‌بانى دریه‌ێد!!

سیاسه‌ت كورد له‌ى باوه‌ته‌و كه‌مته‌رخه‌مه‌، له‌جیاى ئه‌وه‌ك هه‌وڵ بیه‌ن بیگانه‌یگ بكه‌نه‌ قه‌وم، خاستر ئه‌وه‌سه‌ گرنگى یا ئه‌همیه‌ت بیه‌نه‌ كیشه‌ى به‌شیگ له‌ملله‌ته‌گه‌یان ك ئومید گشت چشتیگ له‌لیان كریه‌ێد له‌ئاینده‌. بیجگه‌ ئه‌وه‌یش گشتمان خه‌ممان یه‌كیگ بویه‌و بگر كورده‌یل فه‌یلى یه‌كه‌مین مه‌ردمانیگ بوین له‌ى عراقه‌ كه‌فتنه‌ ژیر زوڵم و سته‌م و ماڵویرانى و تائیسه‌یش چاره‌نویس روڵه‌یلیان نادیاره‌. هه‌ق ئه‌وه‌سه‌ ره‌سانن یا ئعلام و میدیاى كوردى وه‌رجه‌ گشت میدیایگ بانه‌ ته‌نگ كیشه‌ى كورده‌یل فه‌یلى و خوه‌یان وه‌خاوه‌ن كیشه‌گه‌ بزانن، نه‌ك له‌دویره‌و ته‌ماشا بكه‌ن و كه‌مته‌رخه‌م بوون، هه‌ر له‌وه‌ر ئه‌وه‌یش گله‌یى فره‌یگ دیریم له‌ى لایه‌نه‌و، چوینكه‌ ئمڕوو قسه‌ى ره‌سانن ده‌ور دیرێد و دونیاگه‌مان دونیاى ره‌سانن یا ئعلامه‌.

 

ج.عه‌لى میرى